Macakaya 1
Kaĩ itũũra rĩrĩa rĩraiyũrĩte andũ rĩu nĩ rĩtigĩtwo rĩrĩ riki-ĩ! O rĩu rĩrakoragwo na andũ aingĩ gatagatĩ-inĩ ka ndũrĩrĩ, kaĩ nĩ rĩhaanĩte o ta mũtumia wa ndigwa-ĩ! Kaĩ ũcio ũrarĩ mwarĩ wa mũthamaki gatagatĩ-inĩ ka icigo cia bũrũri nĩ arutithĩtio wĩra wa ũkombo-ĩ! ב [Beth]
Arĩraga mũno ũtukũ, na maithori make makahumbĩra makai make. Endwa ake othe gũtirĩ o na ũmwe ũrĩ ho amũũmĩrĩrie. Arata ake othe nĩ mamũkunyanĩire; nĩ matuĩkĩte thũ ciake. ג [Gimel]
Yahuda nĩ atwarĩtwo ithamĩrio rungu rwa mĩnyamaro na ũkombo mũritũ. Arĩikaraga gatagatĩ-inĩ ka ndũrĩrĩ; ndarĩ na handũ ha kũhurũka. Arĩa othe mamũnyariraga nĩ mamũkinyĩire arĩ ihinda-inĩ rĩake rĩa mĩtangĩko. ד [Daleth]
Njĩra cia gũthiĩ Zayuni nĩ iracakaya, tondũ gũtirĩ mũndũ ũrathiĩ gĩathĩ-inĩ. Ihingo ciake ciothe nĩ ndiganĩrie; athĩnjĩri-Yahweh ake nĩ gũcaya maracaya. Airĩtu ake marĩ na kĩeha, nake arĩ na ruo rũnene. ה [He]
Arĩa mamũũkagĩrĩra rĩu matuĩkĩte mwathi wake; thũ ciake itirĩ na mĩtangĩko. Tondũ Yahweh nĩ atũmĩte anyitwo nĩ kĩeha nĩ ũndũ wa mehia make maingĩ. Ciana ciake nĩ itahĩtwo nĩ ũrĩa ũmũũkagĩrĩra. ו [Waw]
Riri wothe nĩ wehereire mwarĩ wa Zayuni. Anene ake matariĩ ta thwariga itarĩ na ũrĩithio, Na marathiĩ manogereire mbere ya ũrĩa ũramathingata. ז [Zayin]
Matukũ-inĩ marĩa Yahrushalayim arĩ na mĩnyamaro na atarĩ na kũndũ gwa gũikara, nĩ aririkanaga Indo ciothe cia goro iria aarĩ nacio matukũ-inĩ ma tene. Rĩrĩa andũ ake maagũire guoko-inĩ gwa thũ na ndaarĩ na wa kũmũteithia, Thũ ciamuonire igĩtheka tondũ wa kũgũa gwake. ח [Heth]
Yahrushalayim nĩ ehĩtie na njĩra nene. Nĩkĩo atuĩkĩte kĩndũ kĩmene. Arĩa othe maamũheete gĩtĩo rĩu mamuonaga atariĩ ta kĩndũ gĩa kũnyararũo, tondũ nĩ monete njaga yake. We mwene akayaga na akahũgũka nĩ ũndũ wa thoni. ט [Teth]
Thahu wake ũrĩ nguo-inĩ ciake. We ndeeciririe ũhoro wĩgiĩ ihinda rĩake rĩa thutha. Kũgũa gwake kwarĩ gwa kũmakania; ndarĩ na mũndũ wa kũmũhooreria. Wũũiii Yahweh, ona mĩnyamaro yakwa, tondũ thũ nĩ ĩĩtũũgĩrĩtie. י [Yod]
Thũ nĩ ĩigĩrĩire moko mayo igũrũ rĩa mĩthithũ yake yothe. Tondũ nĩ eyoneire ndũrĩrĩ ikĩingĩra handũ hake harĩa hamũre, O icio waathanire atĩ itiagĩrĩirũo kũingĩra thĩinĩ wa kĩũngano gĩaku. כ [Kaph]
Andũ ake othe nĩ gũcaya maracaya; nĩ mũgate maracaria. Nĩ makũũranĩtie indo ciao cia goro na kĩndũ gĩa kũrĩa, nogetha matũũre muoyo. Wũũiii Yahweh, ta rora wone atĩ nduĩkĩte ta kĩndũ kĩ magigi. ל [Lamed]
Kaĩ mũrona ta atarĩ ũndũ mũnene inyuĩ arĩa othe mũrahĩtũka njĩra-inĩ? Rorai muone! Hihi nĩ harĩ ruo rũngĩ rũtariĩ ta ruo rũrĩa ndaiguire, Rũrĩa Yahweh aatũmire njigue mũthenya wa marakara make mahiũ? מ [Mem]
Nĩ atũmĩte mwaki thĩinĩ wa mahĩndĩ makwa kuuma igũrũ, na akamahoota mothe. Nĩ ambĩire magũrũ makwa neti; nĩ atũmĩte njoke na thutha kĩa hinya. Atũmĩte nduĩke mũndũ mũtiganĩrie. Mũthenya wothe ndindaga njũrĩtwo nĩ hinya. נ [Nun]
Mehia makwa mohetwo o ta icoki, makohanio hamwe nĩ guoko gwake. Maigĩrĩirũo ngingo-inĩ yakwa, na hinya wakwa nĩ ũthirĩte. Yahweh nĩ aneanĩte guoko-inĩ kwa arĩa itangĩhota gwĩtiiria. ס [Samekh]
Yahweh nĩ eheretie andũ othe arĩa marĩ hinya thĩinĩ wakwa. Nĩ anjĩtĩire kĩrĩndĩ kĩa andũ nĩguo mahehenje anake akwa. Yahweh nĩ arangĩrĩirie mũirĩtu gathirange wa Yahuda kĩhihĩro-inĩ kĩa ndibei. ע [Ayin]
Ndĩrarĩra nĩ ũndũ wa maũndũ macio; maitho makwa maranyũrũrũkia maithori. Tondũ mũndũ ũrĩa ũngĩnyũmĩrĩria na aahoorerie, arĩ kũraya mũno na niĩ. Ariũ akwa nĩ matiganĩirio, nĩ gũkorũo thũ nĩ ĩhootanĩte. פ [Pe]
Zayuni nĩ atambũrũkĩtie moko make; ndarĩ na mũndũ wa kũmũũmĩrĩria. Yahweh nĩ aheete thũ ciothe iria ithiũrũrũkĩirie Jakubu watho wa kũmũũkĩrĩra. Yahrushalayim ĩtuĩkĩte kĩndũ kĩmene harĩ o. צ [Tsade]
Yahweh nĩ mũthingu, nĩ gũkorũo niĩ nĩ kũremera nemeire mawatho make. Thikĩrĩriai inyuĩ ikundi ciothe cia andũ, na muone ruo rwakwa. Airĩtu akwa o na anake akwa nĩ matahĩtwo. ק [Qoph]
Nĩ ngaĩire endwa akwa, ĩndĩ o nĩ mangunyanĩire. Thĩinĩ wa itũũra athĩnjĩri-Yahweh akwa na athuri akwa nĩ mathirĩte, Magĩcaria irio nĩguo matũũre muoyo. ר [Resh]
Rora wee Yahweh, tondũ ndĩ na mĩtangĩko mĩnene. Mara makwa marĩ na ruo. Ngoro yakwa ĩrĩ na mĩtangĩko, tondũ ngoretwo ndĩ mũremi biũ. Kũu nja rũhiũ rwa njora nĩ rũũragĩte ciana ciakwa; thĩinĩ wa nyũmba gũtariĩ ta gĩkuũ. ש [Shin]
Andũ nĩ maiguĩte gũcaya gwakwa; ndirĩ na mũndũ wa kũnyũmĩrĩria. Thũ ciakwa ciothe nĩ ciiguĩte ũhoro wa thĩna wakwa. Nĩ ikenete tondũ wee nĩ waũrehire. Ĩndĩ nĩ ũkaarehe mũthenya ũrĩa wamenyithanirie, rĩrĩa o nao makaahaana o ta niĩ. ת [Taw]
Ũũru wao wothe nĩ ũũke mbere yaku, na ũromaherithia na njĩra nene, O ta ũrĩa ũũherithĩtie na njĩra nene nĩ ũndũ wa mehia makwa mothe. Tondũ mĩcayo yakwa nĩ mĩingĩ, na ngoro yakwa nĩ ndwaru.