Macakaya 4
Kaĩ thahabu ĩrĩa ĩkengaga nĩ ĩtigĩte gũkenga-ĩ, o yo thahabu ĩrĩa njega! Mahiga marĩa maamũre-rĩ, kaĩ nĩ mahurunjũkĩte kona-inĩ ciothe cia barabara-ĩ! ב [Beth]
Ha ũhoro wa ariũ a Zayuni arĩa atĩĩku, o acio maakoragwo marĩ a goro o ta thahabu ĩrĩa therie, Kaĩ nĩ matuĩkĩte o ta ndigithũ cia rĩũmba-ĩ, Wĩra wa moko ma mũũmbi wa nyũngũ! ג [Gimel]
O na ngui cia gĩthaka nĩ ciongithagia twana twacio, No mwarĩ wa andũ akwa atuĩkĩte mũndũ ũtarĩ tha, o ta nyaga cia werũ-inĩ. ד [Daleth]
Rũrĩmĩ rwa gakenge karĩa karonga rũnyitanĩte na karakara nĩ ũndũ wa kũnyota. Ciana ihoyaga mũgate, no gũtirĩ mũndũ ũciheaga. ה [He]
Andũ arĩa maarĩaga irio njega, rĩu makomete barabara-inĩ mahũtiĩ. Arĩa maarerirũo makĩĩhumbaga nguo ndune, rĩu mahĩmbĩirie hĩba cia mũhu. ו [Waw]
Iherithia rĩa mwarĩ wa andũ akwa nĩ inene gũkĩra iherithia rĩa mehia ma Sodomu, Ĩrĩa yang’aũranirio o rĩmwe, gũtarĩ na guoko gwa kũmĩteithia. ז [Zayin]
Anaziri ake maarĩ atheru gũkĩra mbarabu, meerũhĩte gũkĩra iria. Maarĩ atune gũkĩra ruru; maatariĩ ta tũhiga tũkumuthe twa safia. ח [Heth]
Rĩu mairĩte gũkĩra mũrarĩ; Matimenyekaga marĩ barabara-inĩ. Ngothi yao yũmanĩrĩire igũrũ rĩa mahĩndĩ mao; ĩniarĩte o ta mũtĩ mũũmũ. ט [Teth]
Nĩ kaba arĩa moragĩtwo na rũhiũ rwa njora gũkĩra arĩa moragĩtwo nĩ ng’aragu, O acio morĩtwo nĩ hinya, arĩa mathecetwo nĩ ũndũ wa kwaga irio kuuma mũgũnda-inĩ. י [Yod]
Moko ma atumia arĩa acayanĩri nĩ matherũkĩtie ciana ciao ene. Cituĩkĩte irio ciao cia gũcakaya hĩndĩ ya mwanangĩko wa mwarĩ wa andũ akwa. כ [Kaph]
Yahweh nĩ onanĩtie mang’ũrĩ make; Nĩ aitũrũrĩte marakara make mahiũ. Na nĩ akagia mwaki Zayuni ũrĩa ũcinaga mĩthingi yakuo. ל [Lamed]
Athamaki a thĩ na aikari othe a bũrũri ũrĩa ũrĩ maciaro matietĩkagia Atĩ mũniinani, o ũcio warĩ thũ nĩ angĩaingĩrire ihingo cia Yahrushalayim. מ [Mem]
Ũndũ ũcio wekĩkire tondũ wa mehia ma anabii a kuo, o na mahĩtia ma athĩnjĩri-Yahweh a kuo, Arĩa maaitaga thakame ya andũ athingu thĩinĩ wakuo. נ [Nun]
Morũraga barabara-inĩ ta atumumu. Nĩ methahĩtie na thakame, Ũũ atĩ gũtirĩ mũndũ ũngĩgeria kũhutia nguo ciao. ס [Samekh]
Andũ managĩrĩra makameera. “Thiĩi! Inyuĩ mũrĩ na thahu! Thiĩi! Thiĩi biũ! Mũtigatũhutie!” Nĩ gũkorũo matirĩ na gwa gũikara na nĩ kũũrũra morũraga. Andũ moigaga ũũ gatagatĩ-inĩ ka ndũrĩrĩ: “Matingĩikara gũkũ hamwe na ithuĩ. פ [Pe]
Ũthiũ wa Yahweh nĩ ũmahurunjĩte; Gũtirĩ hĩndĩ ĩngĩ agaakenio nĩo. Andũ matirĩheaga athĩnjĩri-Yahweh gĩtĩo, na matirĩtĩaga athuri.” ע [Ayin]
O na rĩu maitho maitũ nĩ morĩtwo nĩ hinya nĩ ũndũ wa gũcaria ũteithio na tũtiwone. Twacaririe ũteithio rĩngĩ na rĩngĩ rũrĩrĩ-inĩ rũtangĩahotire gũtũhonokia. צ [Tsade]
Maatũhĩtaga ikinya gwa ikinya ũũ atĩ tũtingĩahotire kũgerera ihaaro-inĩ citũ cia mũingĩ. Mũico witũ nĩ ũkuhĩrĩirie; matukũ maitũ nĩ mathiru, tondũ mũico witũ nĩ mũkinyu. ק [Qoph]
Acio maatũthingataga maarĩ na ihenya gũkĩra nderi cia rĩera-inĩ. Maatũteng’eririe irĩma-inĩ; maatuohirie werũ-inĩ nĩguo matũtharĩkĩre. ר [Resh]
Ũrĩa mũitĩrĩrie maguta wa Yahweh, o ũcio mĩhũmũ ya maniũrũ maitũ, nĩ anyitĩirũo irima-inĩ rĩao inene, O ũcio twoigaga ũhoro wake atĩrĩ: “Tũrĩikaraga rungu rwa kĩĩruru gĩake gatagatĩ-inĩ ka ndũrĩrĩ.” ש [Sin]
Kena na ũcanjamũke, wee mwarĩ wa Edomu, o wee ũikaraga bũrũri-inĩ wa Uzu. Ĩndĩ o nawe nĩ ũkaanengerũo gĩkombe, na nĩ ũkaanyua ũrĩĩo na ũguũrie njaga yaku. ת [Taw]
Iherithia rĩa mahĩtia maku nĩ rĩkinyĩte mũthia, wee mwarĩ wa Zayuni. Ndagaakuoya rĩngĩ agũtware ithamĩrio. No nĩ akeerekeria meciria make harĩ mahĩtia maku, wee mwarĩ wa Edomu. Nĩ akaaguũria mehia maku.