Macakaya 3
Nĩ niĩ mũndũ ũrĩa wonete mĩnyamaro nĩ ũndũ wa rũthanju rwa mang’ũrĩ make.
Nĩ anyingatĩte na atũmaga thiĩre nduma-inĩ, no ti ũtheri-inĩ.
Ti itherũ, arehaga guoko gwake kũnjũkĩrĩre rĩngĩ na rĩngĩ mũthenya wothe. ב [Beth]
Atũmĩte nyama cia mwĩrĩ wakwa na ngothi yakwa ithire; Nĩ oinangĩte mahĩndĩ makwa.
Nĩ andigicĩirie; athiũrũrũkĩirie na thumu mũrũrũ na thĩna.
Anjikarĩtie thĩ kĩa hinya kũndũ kũrĩ na nduma, ta andũ maakuire tene. ג [Gimel]
Nĩ andigicĩirie na rũthingo, nĩgetha ndikae kũũra; Nĩ anjohete na bĩngũ nditũ cia gĩcango.
Na rĩrĩa ndarĩra mũno ngĩhoya ũteithio, nĩ aregaga kũigua ihoya rĩakwa.
Nĩ ahingĩte njĩra ciakwa na mahiga maicũhie; Nĩ atũmĩte njĩra ciakwa ciogome. ד [Daleth]
Anjohagia nĩguo aatharĩkĩre ta nduba, o ta mũrũthi wĩhithĩte.
Nĩ anjeheretie njĩra-inĩ kĩa hinya na akandambura tũcunjĩ; Atũmĩte ngire ihooru.
Nĩ ahaarĩirie ũta wake, na akanjiga nduĩke kĩndũ gĩa kũrathwo na mũguĩ. ה [He]
Athecete higo ciakwa na mĩguĩ ya thiaka wake.
Nduĩkĩte kĩndũ gĩa gũthekererũo nĩ ikundi ciothe cia andũ, makanyũrũria na rwĩmbo rwao mũthenya wothe.
Anjiyũrĩtie maũndũ marũrũ na agatũma njikare ngĩnyuaga mũmera mũrũrũ. ו [Waw]
Oinangaga magego makwa na kagoto; Atũmaga nyinamĩrĩre mũhu-inĩ.
Wee nĩ ũnjagithagia thayũ; nĩ ndiganĩirũo nĩ maũndũ marĩa mega.
Nĩ ũndũ ũcio njugaga atĩrĩ: “Riri wakwa nĩ ũthirĩte, o hamwe na kĩĩrĩgĩrĩro gĩakwa harĩ Yahweh.” ז [Zayin]
Ririkana mĩnyamaro yakwa na atĩ ndirĩ na kũndũ gwa gũikara, ũririkane mũmera mũrũrũ na thumu mũrũrũ.
Hatarĩ nganja nĩ ũkaaririkana na ũinamĩrĩre nĩguo ũndeithie.
Nĩ ndirikanaga ũndũ ũcio ngoro-inĩ yakwa; nĩkĩo nguonania mwerekera wa gweterera. ח [Heth]
Tondũ wa tha cia Yahweh nĩkĩo tũtathirĩte, Nĩ gũkorũo gũcaĩra gwake gũtithiraga.
Ikoragwo irĩ njerũ rũcinĩ o rũcinĩ; wĩhokeku waku nĩ mũingĩ.
Niĩ njugĩte atĩrĩ, “Yahweh nĩwe igai rĩakwa, nĩkĩo nguonania mwerekera wa kũmweterera.” ט [Teth]
Yahweh nĩ mwega harĩ mũndũ ũrĩa ũigaga kĩĩrĩgĩrĩro gĩake harĩ we, harĩ mũndũ ũrĩa ũikaraga akĩmũcaragia.
Nĩ wega mũndũ gweterera ũhonokio wa Yahweh akirĩte.
Nĩ wega mũndũ gũkuua icoki rĩrĩa arĩ mwĩthĩ. י [Yod]
Nĩ aikare arĩ wiki na aikare akirĩte rĩrĩa Yahweh aramũigĩrĩra icoki rĩu.
Nĩ aturumithie kanua gake tĩri-inĩ; no gũkorũo nĩ harĩ kĩĩrĩgĩrĩro.
Nĩ aneane ikai rĩake kũrĩ mũndũ ũrĩa ũramũgũtha; nĩ anyũrũrio nginya aiganie. כ [Kaph]
Nĩ gũkorũo Yahweh ndegũtũũra atũtiganĩirie tene na tene.
O na gũtuĩka nĩ arehete kĩeha, nĩ akoonania tha kũringana na ũrĩa matha make maingĩhĩte.
Tondũ ngoro-inĩ yake ndendete kũnyamaria na kũrehera ariũ a andũ kĩeha. ל [Lamed]
Mũndũ kũhehenja na makinya make arĩa othe mohetwo thĩinĩ wa thĩ,
Kũima mũndũ kĩhooto mbere ya Ũrĩa ũrĩ Igũrũ Mũno,
Kũhinyĩrĩria mũndũ cira-inĩ wake —Yahweh ndakiragĩrĩria maũndũ ta macio. מ [Mem]
Gũkĩrĩ ũguo-rĩ, nũũ ũngĩkĩhota kuuga ũndũ na wĩkĩke tiga Yahweh athanire wĩkĩke?
Kanua ka Ũrĩa ũrĩ Igũrũ Mũno Gatiumaga maũndũ moru na maũndũ mega ihinda-inĩ o rĩmwe.
Nĩ kĩĩ kĩngĩgĩtũma mũndũ ũrĩ muoyo atete nĩ ũndũ wa moimĩrĩro ma mehia make? נ [Nun]
Nĩ tũthuthuriei na tũtuĩrie mĩthiĩre itũ, na tũcokerere Yahweh.
Nĩ twambararie ngoro citũ hamwe na moko maitũ kũrĩ El ũrĩa ũrĩ igũrũ tuuge atĩrĩ:
“Nĩ tũhĩtĩtie na tũkarema, nawe ndũtuoheire. ס [Samekh]
Nĩ ũtũgirĩrĩirie ũrĩ na marakara nĩguo tũtigagũkuhĩrĩrie; Ũtũthingatĩte na ũgatũũraga ũtegũtũcaĩra.
Nĩ ũigĩte itu rĩa kũgirĩrĩria ũkuhĩrĩrio, nĩgetha ihoya ritũ rĩtigagũkinyĩre.
Ũtũmaga tũhaane ta makũrũro na o ta gĩko gatagatĩ-inĩ ka ikundi cia andũ.” פ [Pe]
Thũ citũ ciothe itwathamagĩria tũnua twacio.
Tũiguaga guoya na tũkona mogwati hĩndĩ ciothe, o hamwe na mwanangĩko na nguraro.
Tũrũũĩ twa maĩ tũthereraga kuuma maitho-inĩ makwa nĩ ũndũ wa nguraro ya mwarĩ wa andũ akwa. ע [Ayin]
Maitho makwa maitaga maithori mategũtigithĩria, matitigithagĩria,
O nginya rĩrĩa Yahweh akaarora arĩ igũrũ one.
Maitho makwa nĩ matũmĩte ngorũo na kĩeha nĩ ũndũ wa airĩtu othe a itũũra rĩakwa. צ [Tsade]
Hĩtagwo nĩ thũ ciakwa ta nyoni hatarĩ gĩtũmi.
Nĩ cinjikĩtie irima-inĩ ndĩ muoyo ikahingĩra kuo na ihiga.
Maĩ maathereraga igũrũ rĩa mũtwe wakwa, na niĩ ngiuga: “Nĩ ndathira!” ק [Qoph]
Ndakaĩire rĩĩtwa rĩaku, wee Yahweh, ndĩ kũndũ kũrĩa kũriku irima-inĩ.
Igua mũgambo wakwa; ndũkahinge gũtũ gwaku wage kũigua kĩrĩro gĩakwa gĩa kũhoya ũteithio, gĩa kũũmĩrĩrio.
Nĩ wanguhĩrĩirie mũthenya ũrĩa ndagũkaĩire. Ũkĩnjĩra atĩrĩ: “Ndũgetigĩre.” ר [Resh]
Wee Yahweh nĩ ũteteire cira wakwa, nĩ ũkũũrĩte muoyo wakwa.
Wee Yahweh nĩ wonete ũũru ũrĩa njĩkĩtwo; ndagũthaitha ũndeithie kuona kĩhooto.
Nĩ wonete kwĩrĩhĩria kwao guothe, ũkona njama ciao ciothe cia kũnjũkĩrĩra. ש [Sin] kana [Shin]
Nĩ ũiguĩte inyũrũri ciao, wee Yahweh, ũkaigua njama ciao ciothe cia kũnjũkĩrĩra,
Ũkaigua mĩromo ya arĩa manjũkagĩrĩra hamwe na ũrĩa maheehanagĩrĩra igũrũ rĩakwa mũthenya wothe.
Ta marore; rĩrĩa maikarĩte thĩ kana rĩrĩa marũgamĩte, no kũũnyũrũria manyũrũragia nyĩmbo-inĩ ciao! ת [Taw]
Wee Yahweh nĩ ũkaamarĩha kũringana na ciĩko ciao.
Ũgaatũma momie ngoro, ũndũ ũcio ũtuĩke kĩrumi gĩaku harĩ o.
Ũkaamathingata ũrĩ na marakara na ũmaniine mehere mũhuro wa igũrũ rĩa Yahweh.