Malaki 4

“Ti-itherũ mũthenya wa ituĩro nĩ ũrooka, naguo ũgaakana ta icua rĩa mwaki. Arĩa othe etĩi, na arĩa aaganu, magaatuĩka maragara ma mahuti, naguo mũthenya ũcio wakinya magaacinwo, maniinwo biũ. Gũtirĩ mũri kana rũhonge rwao rũgaatigara,” ũguo nĩguo Yahweh Mũnene wa ita ekuuga.

“No inyuĩ mwĩtigĩrĩte rĩĩtwa rĩakwa-rĩ, Ũkengu-ũrĩa-wa-Ũthingu nĩ akaamwarĩra arĩ na ũhoro wa kũhonania mathagu-inĩ make. Na inyuĩ nĩ mũkoima nja mũtũũhe ta tũcaũ tũhingũrĩirwo tũkoima kiugũ.

Na nĩ mũkarangĩrĩria arĩa aaganu matuĩke mũhu rungu rwa makinya manyu mũthenya ũrĩa ngeeka maũndũ macio,” ũguo nĩguo Yahweh Mũnene wa ita ekuuga.

“Ririkanai watho wa ndungata yakwa Musa, na irĩra ciakwa cia kũrũmĩrĩrwo, o na mawatho marĩa ndaamũheire kũu Horebu marĩ ma andũ a Isiraeli othe.

“Oneei, nĩ ngamũtũmĩra mũnabii Eliya mũthenya ũcio mũnene na wa kũmakania wa Yahweh ũtanakinya.

Nĩ akagarũra ngoro cia maithe icookerere ciana ciao, na agarũre ngoro cia ciana icookerere maithe mao, nĩgetha ndigooke hũũre bũrũri na kĩrumi.”