Malaki 3

Na rĩrĩ, Yahweh El Shaddai ekuuga atĩrĩ, “Nĩngũtũma mũtũmwo wakwa, ũrĩa ũgaathondeka njĩra mbere yakwa. Hĩndĩ ĩyo Yahweh ũcio mũcaragia nĩagooka o rĩmwe thĩinĩ wa hekarũ yake; mũtũmwo ũcio wa kĩrĩkanĩro ũrĩa mwĩriragĩria nĩ agooka.”

No nũũ ũgetiiria mũthenya wa gũũka gwake? Nũũ ũkomĩrĩria rĩrĩa akooneka? Nĩgũkorwo akahaana ta mwaki wa mũturi ũrĩa ũtheragia cuuma, kana thabuni ũrĩa ũtheragia nguo.

Agaikara thĩ ta mũturi wa betha na mũtheria wacio; nĩ agatheria Alawii, amatherie ta ũrĩa thahabu na betha itheragio. Hĩndĩ ĩyo Yahweh nĩ agakorwo na andũ arĩa makamũrehera maruta ma ũthingu;

namo maruta ma Yahuda na Yahrushalayim nĩ magetĩkĩrĩka nĩ Yahweh, o ta matukũ marĩa mathirĩte, o na ta mĩaka ĩrĩa ya mbere.

“Nĩ ũndũ ũcio nĩ ngamũkuhĩrĩria ndĩmũciirithie na ndĩmũtuĩre. Nĩ ngahiũha gũtuĩka mũira wa gũtuĩra cira arogi, na itharia, na arĩa mehĩtaga na maheeni, na njũkĩrĩre arĩa matunyaga aruti wĩra mĩcaara yao, na arĩa mahinyagĩrĩria atumia a ndigwa na ciana cia ngoriai, na arĩa maagithagia ageni kĩhooto na makaaga kwĩĩndigĩra,” ũguo nĩguo Yahweh mũnene wa ita ekuuga.

“Niĩ Yahweh ndigarũrũkaga. Nĩ ũndũ ũcio, inyuĩ njiaro cia Jakubu nĩkĩo mũtarĩ mwaniinwo.

Na kuuma hĩndĩ ya maithe manyu-rĩ, mũtũire mũtiganĩirie irĩra ciakwa cia kũrũmĩrĩrwo na mũkaaga gũcirũmia. Njookererai na niĩ nĩ ngũmũcookerera.” Ũguo nĩguo Yahweh Mũnene wa ita ekuuga. “No mũũragia atĩrĩ, ‘Tũgũgũcookerera atĩa?’

“Mũndũ-rĩ, aahota gũtunya Kĩhoti indo ciake? No inyuĩ nĩ mũndunyĩte indo ciakwa. “No mũũragia atĩrĩ, ‘Nĩ kĩĩ tũgũtunyĩte?’ “Mũnduunyĩte maruta na icunjĩ cia ikũmi.

Rũrĩrĩ rwanyu ruothe rũgwatĩtwo nĩ kĩrumi, tondũ nĩ mũndunyaga indo ciakwa.

Yahweh Mũnene wa ita ekuuga atĩrĩ, rehei gĩcunjĩ gĩa ikũmi gĩothe thĩinĩ wa ikũmbĩ, nĩgetha nyũmba yakwa ĩkoragwo na irio. Ngeriai na njĩra ĩno muone kana ndikũmũhingũrĩra ndirica cia igũrũ, ndĩmuurĩrie irathimo nyingĩ mũno nginya mwage handũ ingĩiganĩra.

Ningĩ nĩ ngagiria cianangi ithũkie irio cia mĩgũnda yanyu, nayo mĩthabibũ ya mĩgũnda yanyu ndĩgaacooka gũita maciaro mayo matarĩ makũrũ.” Ũguo nĩguo Yahweh Mũnene wa ita ekuuga.

Yahweh Mũnene wa ita ekuuga atĩrĩ, “Ndũrĩrĩ ciothe nĩ ikamwĩtaga andũ arathime, nĩgũkorwo bũrũri wanyu ũgaakorwo ũrĩ wa gĩkeno.”

Yahweh ekuuga atĩrĩ, “Nĩ mwarĩtie maũndũ mooru ma kũnjambia. “No mũũragia atĩrĩ, ‘Tũgũcambĩtie atĩa?’

“Inyuĩ muugĩte atĩrĩ, ‘Gũtungatĩra Kĩhoti nĩ ũndũ wa tũhũ. Nĩ uumithio ũrĩkũ tuonire nĩ kũhingia kwenda gwake, na gũthiiaga mbere ya Yahweh Mũnene wa ita ta andũ maracakaya?

No rĩrĩ, andũ etĩi nĩo twĩtaga arathime. Ti-itherũ arĩa aaganu nĩo magaacagĩra, na arĩa makararagia Kĩhoti matiherithagio.’ ”

Nao arĩa meetigĩrĩte Yahweh nĩ maaranĩirie o mũndũ na ũrĩa ũngĩ, nake Yahweh agĩthikĩrĩria na akĩigua ũhoro ũcio. Ibuku rĩa kĩririkano nĩ rĩandĩkirwo ũhoro wa andũ acio metigĩrĩte Yahweh na magatĩa rĩĩtwa rĩake, rĩkĩigwo hau mbere yake.

Yahweh Mũnene wa ita ekuuga atĩrĩ, “Acio nĩo magaatuĩka andũ akwa mũthenya ũrĩa ngaacookereria indo ciakwa cia bata. Nĩ ngamaiguĩra tha, o ta ũrĩa mũndũ aiguagĩra mũriũ tha ũrĩa ũmũtungatagĩra.

Na inyuĩ nĩ mũkona rĩngĩ ngũũrani gatagatĩ ka arĩa athingu na arĩa aaganu, na gatagatĩ ka arĩa matungatagĩra Kĩhoti na arĩa matamũtungatagĩra.