Malaki 2

“Na rĩu inyuĩ athĩnjĩri-Yahweh-rĩ, rĩathani rĩrĩ nĩ rĩanyu.

Mũngĩrega gũthikĩrĩria na kũiga ũhoro wa kũgoocithia rĩĩtwa rĩakwa ngoro-inĩ,” ũguo nĩguo Yahweh mũnene wa ita ekuuga, “nĩ ngaamũtũmĩra kĩrumi, na nĩ ngaagarũra irathimo cianyu ituĩke irumi. Ti itherũ, nĩ ngarũrĩte irathimo igatuĩka irumi, tondũ mũtiraiga ũhoro ũcio ngoro-inĩ.”

“Toneei! Nĩ ũndũ wanyu, nĩ ngaananga mbegũ cianyu iria ihandĩtwo, na nĩ ngaamũminjĩria taatha mothiũ manyu, taatha ũcio wa ciathĩ cianyu; na nĩ mũgaakuuo mũtwarũo harĩ guo.

Hĩndĩ ĩyo nĩ mũkaamenya atĩ ndĩmũheete rĩathani rĩrĩ nĩguo kĩrĩkanĩro gĩakwa na Lawii gĩthiĩ na mbere,” ũguo nĩguo Yahweh mũnene wa ita ekuuga.

“Kĩrĩkanĩro gĩakwa hamwe nake kĩarĩ kĩa muoyo na thayũ, o icio ndamũheire hamwe na guoya. Nĩ aanjĩtigagĩra, ti itherũ, nĩ aaheete rĩĩtwa rĩakwa gĩtĩo kĩnene.

Watho wa ũhoro wa ma warĩ kanua-inĩ gake, na gũtirĩ ũndũ ũtarĩ wa ũthingu woonekire mĩromo-inĩ yake. Aatwaranaga hamwe na niĩ arĩ na thayũ na ũrũngĩrĩru, na nĩ aagarũrire andũ aingĩ kuuma mahĩtia-inĩ

Nĩ gũkorũo mĩromo ya mũthĩnjĩri-Yahweh yagĩrĩirũo kũgitĩra ũmenyo, na andũ magĩrĩirũo gũcaria watho kuuma kanua-inĩ gake tondũ nĩwe mũtũmwo wa Yahweh mũnene wa ita.

“Ĩndĩ inyuĩ ene nĩ mũgarũrũkĩte mũgatiga njĩra. Nĩ mũtũmĩte andũ aingĩ mahĩngwo ũhoro-inĩ wĩgiĩ watho. Nĩ mũthũkĩtie kĩrĩkanĩro kĩa Lawii,” ũguo nĩguo Yahweh mũnene wa ita ekuuga

“Nĩ ũndũ ũcio nĩ ngaatũma mũnyararũo na mũconorithio mbere ya andũ othe, tondũ mũtiarũmĩrĩire njĩra ciakwa no mwarĩ na mũthutũkanio ũhoro-inĩ wĩgiĩ kũhũthĩra watho.”

“Na githĩ ithuothe tũtirĩ a ithe ũmwe? Na githĩ tũtiombirũo nĩ El ũmwe? Nĩ kĩĩ gĩgĩtũmaga tũkorũo tũtarĩ ehokeku mũndũ na ũrĩa ũngĩ, tũgathahia kĩrĩkanĩro kĩa maithe maitũ ma tene

Yahuda nĩ akunyanĩire akaregenyũka, na ũndũ ũrĩ magigi nĩ wĩkĩtwo thĩinĩ wa Isiraeli na thĩinĩ wa Yahrushalayim; nĩ gũkorũo Yahuda nĩ athahĩtie kwamũrwo kwa Yahweh, ũrĩa we endete, na nĩ oete mwarĩ wa el ngʼeni atuĩke mũhiki wake

Yahweh nĩ akaaniina mũndũ o wothe wĩkaga ũguo ehere hema-inĩ cia Jakubu, o na angĩkorũo arĩ ũ, o na gũtuĩka nĩ arutagĩra Yahweh mũnene wa ita igongona.”

“Na nĩ kũrĩ ũndũ ũngĩ mwĩkaga, ũrĩa ũtũmaga kĩgongona kĩa Yahweh kĩhumbĩrũo nĩ maithori na kĩrĩro na gũcaya, nĩkĩo atatindanagĩra na igongona rĩrĩa mũrutaga kana agetĩkĩra kĩndũ o gĩothe kuuma guoko-inĩ kwanyu

Na inyuĩ muugaga atĩrĩ, ‘Nĩkĩ hihi?’ Nĩ tondũ Yahweh nĩ atuĩkĩte mũira gatagatĩ gaku na mũhiki wa wĩthĩ waku, o ũcio wee ũkunyanĩire, o na gũtuĩka nĩ mũthiriti waku na mũkaguo kũgerera kĩrĩkanĩro.

No nĩ harĩ ũmwe ũteekire ũguo, tondũ aarĩ na roho ũrĩa watigarĩte. Na hihi ũcio nĩ kĩĩ aacaragia? Aacaragia mbeũ ya Kĩhoti. Nĩ ũndũ ũcio, mwĩmenyagĩrĩrei ũhoro-inĩ wĩgiĩ roho wanyu, na ndũgekage mũhiki wa wĩthĩ waku maũndũ ma ũtharia

Nĩ gũkorũo nĩ thũire ndigano,” ũguo nĩguo Yahweh Kĩhoti wa Isiraeli ekuuga, “na ngathũũra ũrĩa ũhumbagĩra nguo yake na ũhinya,” ũguo nĩguo Yahweh mũnene wa ita ekuuga. “Mwĩmenyagĩrĩrei ũhoro-inĩ wĩgiĩ roho wanyu, na mũtigekage maũndũ matarĩ ma wĩhokeku.

“Nĩ mũnogetie Yahweh na ciugo cianyu. No muugaga atĩrĩ, ‘Tũmũnogetie na njĩra ĩrĩkũ?’ Na njĩra ya kuuga ũũ, ‘Mũndũ o wothe wĩkaga maũndũ moru nĩ mwega maitho-inĩ ma Yahweh, na nĩ amũkenagia,’ kana na njĩra ya kuuga ũũ, ‘Kĩhoti ũrĩa ũtuanagĩra arĩ ha?’”