Mariko 1
Kĩambĩrĩria kĩa ũhoro ũrĩa mwega wĩgiĩ Yahshua Messiya, Mũrũ wa Yahweh:
O ta ũrĩa kwandĩkĩtwo ũũ nĩ mũnabii Isaiya: “(Oneei! nĩ ngũtũma mũtũmwo wakwa mbere yaku, ũrĩa ũgũkũhaarĩrĩria njĩra.)
Harĩ mũgambo wa mũndũ ũranĩrĩra werũ-inĩ ũkoiga: ‘Haarĩriai njĩra ya Yahweh! Rũngai barabara ciake.’”
Johana Mũbatithania aarĩ werũ-inĩ akĩhunjia atĩ andũ mabatithio ĩrĩ njĩra ya kuonania kwĩrira nĩguo moherũo mehia
Na gĩcigo gĩothe kĩa Yahuda na aikari othe a Yahrushalayim nĩ maathiaga kũrĩ we, na makabatithio nĩwe Rũũĩ-inĩ rwa Jorodani, makiumbũraga mehia mao matekũhithĩrĩra
Na rĩrĩ, Johana eehumbaga nguo cia guoya wa ngamĩra na akeyoha mũcibi wa rũũa njohero, na aarĩaga ngigĩ na ũũkĩ wa gĩthaka
Na aahunjagia akiugaga atĩrĩ: “Nĩ harĩ mũndũ ũrĩ na hinya kũngĩra ũroka thutha wakwa, na ndirĩ mwagĩrĩru wa kũinamĩrĩra njohore rũrigi rwa iratũ ciake
Niĩ ndĩmũbatithagia na maĩ, ĩndĩ ũcio akaamũbatithagia na roho mwamũre.”
Matukũ-inĩ macio, Yahshua akiuma Nazarethi ya Galili na agĩthiĩ akĩbatithio nĩ Johana Rũũĩ-inĩ rwa Jorodani
Na o rĩmwe arĩkia kuumĩra maĩ-inĩ, akĩona igũrũ rĩkĩhingũka, na roho wa Yahweh ũgĩikũrũka ũhaana ta ndutura ũgĩũka igũrũ rĩake.
Na mũgambo ũkiuma igũrũ ũkiuga atĩrĩ: “Wee nĩwe Mũrũ wakwa, ũrĩa nyendete; nĩ ngwĩtĩkĩrĩte.”
Na o hĩndĩ ĩyo agĩtindĩkwo nĩ roho gũthiĩ werũ-inĩ
Agĩikara kũu werũ-inĩ thikũ 40, akĩgeragio nĩ Shaitani. Na aarĩ hamwe na nyamũ cia gĩthaka, ĩndĩ araika nĩ maamũtungatagĩra.
Thutha wa Johana kũnyitwo, Yahshua agĩthiĩ Galili, akĩhunjagia ũhoro ũrĩa mwega wa Yahweh
akiugaga: “Ihinda rĩrĩa rĩtuĩtwo nĩ ikinyu, naguo Ũthamaki wa Yahweh nĩ ũkuhĩrĩirie. Mwĩrirei, na mũgĩe na wĩtĩkio harĩ ũhoro ũrĩa mwega.”
Na rĩrĩa aathiagĩra rũteere-inĩ rwa Iria rĩa Galili, akĩona Simoni na mũrũ wa nyina Andrea magĩikia neti ciao iria-inĩ, nĩ gũkorũo maarĩ ategi a thamaki
Nĩ ũndũ ũcio Yahshua akĩmera ũũ: “Nũmĩrĩrai, na nĩ ngũmũtua ategi a andũ.”
Na o hĩndĩ ĩyo magĩtiga neti ciao, makĩmũrũmĩrĩra
Athiathia hanini, akĩona Jakubu mũrũ wa Zebedi na Johana mũrũ wa nyina, marĩ thĩinĩ wa gatarũ kao magĩtuma neti ciao,
na ategũte mahinda akĩmeta. Nĩ ũndũ ũcio, magĩtiga ithe wao Zebedi hau gatarũ-inĩ arĩ na andũ a wĩra na makĩmũrũmĩrĩra
Na magĩthiĩ Kaperinaumu.
Nao makĩgegio nĩ njĩra yake ya kũrutana, tondũ aamarutaga ta mũndũ warĩ na wathani, no ti ta aandĩki-marũa
Kahinda-inĩ o ro kau kũu thunagogi-inĩ yao nĩ kwarĩ na mũndũ warĩ na roho mũũru, na akĩanĩrĩra akiuga atĩrĩ:
“Tũrorania kĩ nawe, Yahshua Mũnazarethi? Hihi woka gũtũnina? Nĩ njũĩ wega wee ũrĩ ũ, wee nĩwe Ũrĩa Mwamũre wa Yahweh!”
No Yahshua agĩkũũma roho ũcio mũũru, akiuga ũũ: “Kira, na uume thĩinĩ wake!”
Na thutha wa roho ũcio mũũru gũtugutania mũndũ ũcio na gũkayũrũrũka na mũgambo waguo wothe, ũkiuma thĩinĩ wake
Na rĩrĩ, andũ othe makĩgega mũno na makĩambĩrĩria kwĩrana atĩrĩ: “Ĩ nĩ atĩa ũũ? Ũyũ nĩ ũrutani mwerũ! Arĩ na hinya wa gwatha nginya maroho moru, na makamwathĩkĩra.”
Nĩ ũndũ ũcio ũhoro wake ũgĩtherema na ihenya mĩena yothe gĩcigo-inĩ kĩu gĩothe kĩa Galili.
Hĩndĩ ĩyo makiuma thunagogi-inĩ magĩthiĩ mũciĩ gwa Simoni na Andrea marĩ na Jakubu na Johana.
Na rĩrĩ, nyina wa mũtumia wa Simoni nĩ aakomete arĩ mũrũaru mũrimũ wa kũhiũha mwĩrĩ, na makĩmwĩra ũhoro wake o rĩo
Nake agĩthiĩ harĩ we, akĩmũnyita guoko na akĩmũũkĩria. Agĩthirũo nĩ mũrimũ ũcio wa kũhiũha mwĩrĩ, na akĩambĩrĩria kũmatungatĩra.
Rĩrĩa gwakinyire hwaĩ-inĩ riũa rĩathũa, andũ makĩambĩrĩria kũmũrehera arĩa othe maarĩ arũaru na arĩa maarĩ na ndaimono;
na andũ othe a itũũra rĩu makĩgomana hau mũrango-inĩ
Nĩ ũndũ ũcio akĩhonia andũ aingĩ arĩa maarĩ na mĩrimũ mĩthemba mĩingĩ, na akĩingata ndaimono nyingĩ, ĩndĩ ndeetĩkagĩria ndaimono icio kwaria, nĩ gũkorũo nĩ ciamenyaga atĩ nĩwe Messiya.
Rũcinĩ tene kũrĩ o na nduma, agĩũkĩra na akiuma nja, agĩthiĩ kũndũ gũtaarĩ na andũ, na arĩ kũu akĩambĩrĩria kũhoya
No rĩrĩ, Simoni na arĩa maarĩ nao makĩambĩrĩria kũmũcaria
na maamuona, makĩmwĩra ũũ: “Andũ othe nĩwe maracaria.”
No we akĩmera atĩrĩ: “Nĩ tũthiĩi kũndũ kũngĩ, taũni-inĩ iria irĩ hakuhĩ, nĩguo ngahunjie kũu o nakuo, tondũ nĩkĩo gĩatũmire njũke.”
Na agĩthiĩ akĩhunjagia thunagogi-inĩ ciao kũu Galili guothe akĩingataga ndaimono.
Ningĩ hagĩũka mũndũ warĩ na mangũ, akĩmũthaitha o na akĩmũturĩria maru, akĩmwĩra atĩrĩ: “Angĩkorũo no wende, theria.”
Nĩ ũndũ ũcio akĩringwo nĩ tha, agĩtambũrũkia guoko gwake na akĩmũhutia akĩmwĩra: “Nĩ ngwenda! Thera.”
Hĩndĩ o ĩyo mangũ macio magĩthira, na agĩthera
Na o rĩo akĩmwĩra athiĩ na akĩmũhe mũkaana mũrũmu,
akĩmwĩra ũũ: “Ndũkere mũndũ o na ũrĩkũ, no thiĩ wĩyonanie kũrĩ mũthĩnjĩri-Yahweh, na nĩ ũndũ wa gũtherio gwaku ũrute indo iria Musa aathanire, nĩguo magĩe na ũira.”
No thutha wa gũthiĩ, mũndũ ũcio akĩambĩrĩria kũmemerekia ũhoro ũcio na njĩra nene na kũũtheremia kũndũ guothe, nginya Yahshua akĩremwo nĩ kũingĩraga matũũra-inĩ akĩonagwo nĩ andũ, no aathiaga kũndũ gũtaarĩ na andũ. Ĩndĩ andũ no maathiaga kũrĩ we moimĩte mĩena yothe.