Mariko 16

Na thutha wa Thabatũ, Mariamu Mũmagidali, na Mariamu nyina wa Jakubu, na Salome makĩgũra mahuti marĩa manungaga wega nĩguo mathiĩ makahake mwĩrĩ wa Yahshua

Na rũcinĩ tene mũthenya wa mbere wa kiumia riũa rĩaratha, magĩthiĩ mbĩrĩra-inĩ ĩyo.

Mooranagia atĩrĩ: “Nũ ũgũtwehereria ihiga mũromo-inĩ wa mbĩrĩra?”

No rĩrĩa maatiirire maitho, makĩona atĩ ihiga rĩu rĩarĩ rĩeherie, o na gũtuĩka rĩarĩ inene mũno

Rĩrĩa maatonyire mbĩrĩra-inĩ, makĩona mwanake aikarĩte thĩ mwena wa ũrĩo ehumbĩte kanjũ ya rangi mwerũ, makĩmaka mũno

Akĩmera atĩrĩ: “Tigai kũmaka. Nĩ njũĩ mũracaria Yahshua ũrĩa Mũnazarethi ũroragĩirũo mũtĩ igũrũ. Nĩ ariũkĩtio. Ndarĩ haha. Ta rorai, haha nĩho maramũkometie.

No rĩrĩ, thiĩi mwĩre arutwo ake o hamwe na Kepha atĩrĩ, ‘Nĩ egũthiĩ mbere yanyu Galili. Na nĩ mũkũmuona kũu, o ta ũrĩa aamwĩrĩte.’”

Nĩ ũndũ ũcio, rĩrĩa moimire mbĩrĩra-inĩ, magĩthiĩ matengʼerete makĩinainaga na magegete. Na gũtirĩ mũndũ o na ũrĩkũ meerire ũndũ, nĩ gũkorũo maarĩ na guoya. (Maandĩko mamwe ma tene matirĩ gacunjĩ gaka kuuma Mariko 16:9-20)

Mũthenya wa mbere wa kiumia wambia oũguo Yahshua ariũka-rĩ, aambire kuumĩrĩra Mariamu Mũmagidali ũrĩa aarutĩte ndaimono mũgwanja.

Nake Mariamu agĩthiĩ akĩĩra arĩa maatũire na Yahshua, akĩmakora magĩcakaya na makĩrĩra.

Nao maigua atĩ Yahshua nĩ ariũkĩte, na atĩ Mariamu nĩ amuonete, makĩrega gwĩtĩkia.

Thutha ũcio Yahshua akiumĩrĩra andũ angĩ erĩ ao, ahaana ũndũ ũngĩ, rĩrĩa maathiaga mĩgũnda-inĩ

Andũ acio makĩhũndũka, magĩthiĩ makĩĩra arutwo arĩa angĩ; no-o nao makĩrega kũmetĩkia.

Thutha ũcio Yahshua akiumĩrĩra arutwo arĩa ikũmi na ũmwe makĩrĩa irio; akĩmatetia nĩ ũndũ wa kwaga gwĩtĩkia na nĩ ũndũ wa ũmũ wa ngoro ciao, nĩ ũndũ wa kũrega gwĩtĩkia arĩa maamuonete thutha wa kũriũka gwake.

Akĩmera atĩrĩ, “Thiĩi thĩ yothe mũkahunjĩrie andũ othe Ũhoro-ũrĩa-Mwega.

Na mũndũ o wothe ũgetĩkia na abatithio nĩ akahonoka, no ũrĩa wothe ũtagetĩkia nĩ agatuĩrwo cira.

Nacio ciama ici nĩ igatwaranaga na arĩa metĩkĩtie: Nĩ makaingata ndaimono thĩinĩ wa rĩĩtwa rĩakwa; na nĩ makaaria na thiomi njerũ;

na nĩ makanyita nyoka na moko mao; na rĩrĩa makaanyua thumu, ndũkamathũkia o na hanini; nĩ makaigagĩrĩra andũ arĩa arũaru moko, nao mahone.”

Yahshua aarĩkia kũmaarĩria ũhoro ũcio, agĩtwarwo igũrũ na agĩikara thĩ guoko-inĩ kwa ũrĩo kwa Yahweh

Nao arutwo magĩcoka makiumagara na makĩhunjia ũhoro kũndũ guothe, nake Yahweh akĩrutithania wĩra nao, na agekĩraga ũhoro wake hinya na ũndũ wa ciama iria ciatwaranaga na ũhoro ũcio.