Mariko 15
Na gwakinya rũcinĩ o ũguo, anene a athĩnjĩri-Yahweh, athuri, aandĩki-marũa, Sanhedrini yothe magĩciira marĩ hamwe, na makĩoha Yahshua makĩmũtwara makĩmũneana kũrĩ Pilato
Nĩ ũndũ ũcio Pilato akĩmũũria atĩrĩ: “Wee nĩwe Mũthamaki wa Ayahudi?” Nake akĩmũcokeria: “Wee mwene nĩ woiga.”
No anene a athĩnjĩri-Yahweh nĩ maamũthitangagĩra maũndũ maingĩ
Na Pilato akĩambĩrĩria o rĩngĩ kũmũũria atĩrĩ: “Ndũrĩ na ũndũ ũngĩcokia? Ta igua maũndũ marĩa mothe maragũthitangĩra.”
No Yahshua ndarĩ ũndũ ũngĩ ooigire, nĩ ũndũ ũcio Pilato akĩgega mũno.
Na rĩrĩ, o gĩathĩ o gĩathĩ, Pilato nĩ aamenyerete kuohorera andũ mũndũ ũmwe ũrĩa moria mohorerũo.
Hĩndĩ ĩyo, nĩ kwarĩ mũndũ wetagwo Bar-Abba warĩ njera hamwe na aregani a thirikari, arĩa mooraganĩte makĩregana na thirikari
Kwoguo kĩrĩndĩ kĩa andũ gĩgĩũka na makĩambĩrĩria kũhoya Pilato amekĩre ũrĩa aamenyerete kũmekĩra
Nake akĩmoria atĩrĩ: “Nĩ mũkwenda ndĩmuohorere Mũthamaki wa Ayahudi?”
Nĩ gũkorũo Pilato nĩ aamenyaga atĩ anene a athĩnjĩri-Yahweh maaneanĩte Yahshua nĩ ũndũ wa ũiru
No anene acio a athĩnjĩri-Yahweh magĩcogera andũ moige Bar-Abba ohorũo arĩ we
O rĩngĩ Pilato akĩmoria atĩrĩ: “Nake mũndũ ũyũ mwĩtaga Mũthamaki wa Ayahudi ndĩmwĩke atĩa?”
Nao makĩanĩrĩra o rĩngĩ makiuga: “Nĩ acuurio mũtĩ-inĩ!”
No Pilato akĩmoria atĩrĩ: “Nĩkĩ? Nĩ ũũru ũrĩkũ ekĩte?” No magĩkĩrĩrĩria kwanĩrĩra: “Nĩ acuurio mũtĩ-inĩ!”
Nĩ ũndũ ũcio, Pilato akĩmohorera Bar-Abba nĩ ũndũ wa kwenda gũkenia kĩrĩndĩ; agĩcoka akĩhũũrithia Yahshua iboko na akĩmũneana akoragĩrũo mũtĩ-inĩ.
Nacio thigari ikĩmũtwara nja kũu kwa ngavana mũciĩ na igĩĩta mbũtũ yothe ya thigari.
Na makĩmũhumba nguo ya rangi wa papũ na magĩtuma thũmbĩ ya mĩigua makĩmwĩkĩra;
na makĩambĩrĩria kũmwĩra ũũ: “Geithĩka, wee Mũthamaki wa Ayahudi!”
Ningĩ nĩ maamũringaga mũtwe na ithanjĩ na makamũtuĩra mata, na makĩmũturĩria maru makĩmũinamĩrĩra
Na thutha wa kũmũnyũrũria, makĩmũruta nguo ĩyo ya rangi wa papũ na makĩmũhumba nguo ciake cia igũrũ. Magĩcoka makĩmũtwara makamũhũũrĩrĩre mũtĩ-inĩ na mĩcumarĩ
Ningĩ magĩcemania na mũndũ wahĩtũkaga wa kuuma Kurene, wetagwo Simoni ithe wa Aleksanda na Rufasi akiuma mĩgũnda-inĩ na makĩmũtindĩkĩrĩria akuue mũtĩ wa Yahshua wa kũnyarirĩrũo.
Nĩ ũndũ ũcio makĩmũtwara kũndũ gwĩtagwo Gologotha, rĩĩtwa rĩu rĩataũrũo nĩ kuuga, “Kũndũ kwa Ihĩndĩ rĩa Kĩongo.”
Na marĩ kũu makĩgeria kũmũhe ndibei ĩtukanĩtio na manemane,
Magĩcoka makĩmũhũũrĩra mũtĩ-inĩ na mĩcumarĩ na makĩgayana nguo ciake cia igũrũ na njĩra ya gũcuka mĩtĩ nĩguo mamenye kĩrĩa o mũndũ egũthiĩ nakĩo
Na rĩrĩ, kwarĩ thaa ithatũ cia rũcinĩ, nao makĩmũhũũrĩra mũtĩ-inĩ na mĩcumarĩ
Na maandĩko megiĩ ũndũ ũrĩa aathitangĩirũo maandĩkĩtwo ũũ: “Mũthamaki wa Ayahudi.”
Ningĩ magĩcuuria aici erĩ mĩtĩ-inĩ hakuhĩ nake, ũmwe mwena wake wa ũrĩo na ũcio ũngĩ mwena wake wa ũmotho.
Namo Maandĩko makĩhingio, marĩa moigĩte atĩrĩ, nĩ ataranĩirio hamwe na agarari Watho.
Nao andũ arĩa maahĩtũkagĩra hau maamwaragĩria na kĩnyũrũri makĩinagia mĩtwe yao makiugaga ũũ: “Haiya! Wee ũroigaga atĩ nĩ ũkũmomora hekarũ na ũmĩake na thikũ ithatũ,
wĩhonokie wĩrute mũtĩ-inĩ ũcio wa kũnyarirĩrũo.”
O nao anene a athĩnjĩri-Yahweh na aandĩki-marũa nĩ maamũnyũrũragia gatagatĩ-inĩ kao makoiga ũũ: “Nĩ arahonokagia arĩa angĩ no we mwene ndangĩhota kwĩhonokia!
Messiya! Mũthamaki wa Isiraeli, rĩu nĩ erute mũtĩ-inĩ wa kũnyarirĩrũo nĩguo tuone na twĩtĩkie!” O nao arĩa maacuurĩtio mĩtĩ-inĩ hamwe nake nĩ maamũnyũrũragia.
Rĩrĩa gwakinyire ta thaa thita cia mũthenya, gũkĩgĩa nduma bũrũri-inĩ ũcio wothe o nginya ta thaa kenda cia mũthenya
Na kũrĩ ta thaa kenda cia mũthenya, Yahshua akĩanĩrĩra na mũgambo mũnene akiuga: “Eli, Eli, lama sabakithani?” Ciugo icio ciataũrũo ciugaga ũũ: “Kĩhoti wakwa, Kĩhoti wakwa, ũndiganĩirie nĩkĩ?”
Na rĩrĩa andũ amwe arĩa maarũgamĩte hau maaiguire ũguo, makĩĩrana atĩrĩ: “Ta iguai! Areta Eliya!”
Na mũndũ ũmwe akĩhanyũka, akĩrikia thibonji ndibei-inĩ ngagatu, akĩmĩthecereria ithanjĩ-inĩ na akĩmũhe anyue akiuga ũũ: “Tiganai nake! Rekei tuone kana Eliya nĩ egũka kũmũcuurũria mũtĩ-inĩ.”
No Yahshua akĩanĩrĩra na mũgambo mũnene na agĩtuĩkana
Na gĩtama kĩa hekarũ gĩgĩtarũkana icunjĩ igĩrĩ kuuma igũrũ nginya thĩ
Na rĩrĩa mũnene wa mbũtũ ũrĩa warũgamĩte hau amũrorete oonire maũndũ macio meekĩkire Yahshua agĩkua, akiuga ũũ: “Hatarĩ nganja mũndũ ũyũ ararĩ Mũrũ wa Yahweh.”
Ningĩ nĩ kwarĩ na andũ-a-nja meeroragĩra marĩ haraya. Amwe ao nĩ Mariamu Mũmagidali o hamwe na Salome na Mariamu nyina wa Jose na Jakubu ũrĩa Mũnini,
arĩa maathiaga hamwe na Yahshua na makamũtungatĩra rĩrĩa aarĩ Galili, o na andũ-a-nja angĩ aingĩ arĩa maathiĩte nake Yahrushalayim.
Na rĩrĩ, tondũ kwarĩ hakuhĩ gũtuka, na kwarĩ mũthenya wa Kũhaarĩria, ũguo nĩ kuuga mũthenya ũmwe mbere ya Thabatũ,
hagĩũka mũndũ wetagwo Jusufu wa Arimathea, warĩ mũthuri wa Kĩama waheetwo gĩtĩo, ningĩ we mwene nĩ eetereire Ũthamaki wa Yahweh. Akĩĩyũmĩrĩria akĩingĩra kũrĩ Pilato na akĩhoya anengerũo mwĩrĩ wa Yahshua
No Pilato akĩrigwo kana hihi no akorũo akuĩte, na kwoguo agĩĩta mũnene wa mbũtũ akĩmũũria kana Yahshua nĩ akuĩte
Na thutha wa kwĩrũo nĩ mũnene wa mbũtũ atĩ nĩ akuĩte, agĩtĩkĩria Jusufu oe mwĩrĩ ũcio
Thutha wa kũgũra gĩtambaya gĩa gatani ĩrĩa njega na kũmũcuurũria mũtĩ-inĩ, akĩmũthaya na gĩtambaya kĩu kĩa gatani ĩrĩa njega, na akĩmũkomia thĩinĩ wa mbĩrĩra yenjetwo rwaro-inĩ rwa ihiga; agĩcoka akĩgaragaria ihiga nginya mũromo-inĩ wa mbĩrĩra ĩyo
No Mariamu Mũmagidali na Mariamu nyina wa Jose magĩthiĩ na mbere kũrora harĩa aakometio.