Mathayo 14
Na rĩrĩ, hĩndĩ ĩyo, Mũthamaki Herode nĩ aiguire ngumo ya Yahshua,
nake akĩĩra arĩa maamũtungataga atĩrĩ, “Ũcio nĩ Johana Mũbatithania; nĩ ariũkĩte kuuma kũrĩ arĩa akuũ! Nĩkĩo arĩ na hinya mũnene ũguo wa kũringa ciama.”
Na rĩrĩ, Herode nĩ anyitĩte Johana akamuoha, na akamũikia njera nĩ ũndũ wa Herodia, ũrĩa warĩ mũka wa mũrũ wa nyina Filipu,
tondũ Johana nĩ amwĩrĩte atĩrĩ: “Watho ndũgwĩtĩkĩrĩtie ũmũhikie.”
Herode nĩ endaga kũũraga Johana, no nĩ etigagĩra andũ, tondũ nĩ metĩkĩtie atĩ Johana aarĩ mũnabii.
Mũthenya wa gũkũngũĩra gũciarwo kwa Herode-rĩ, mwarĩ wa Herodia nĩ ainĩire andũ, na agĩkenia Herode mũno.
Nĩ ũndũ ũcio Herode akĩĩhĩta na mwĩhĩtwa atĩ nĩ ekũmũhe kĩrĩa gĩothe angĩendire.
Nake mũirĩtu ũcio aarĩkia gũtaarwo nĩ nyina, akiuga atĩrĩ, “He mũtwe wa Johana Mũbatithania o rĩu ũrĩ thĩinĩ wa kiuga.”
Mũthamaki nĩ atangĩkire mũno, no nĩ ũndũ wa mwĩhĩtwa wake, na ageni arĩa maarĩ iruga-inĩ rĩake-rĩ, agĩathana atĩ mũirĩtu ũcio aheo kĩrĩa eetĩtie.
Nĩ ũndũ ũcio agĩtũmana kũu njera na Johana akĩrengwo mũtwe.
Naguo mũtwe ũcio wake ũkĩrehwo na kiuga, ũkĩnengerwo mũirĩtu ũcio, nake akĩũtwarĩra nyina.
Nao arutwo a Johana magĩthiĩ makĩoya kĩimba gĩake, magĩgĩthika, magĩcoka magĩthiĩ makĩĩra Yahshua.
Na rĩrĩa Yahshua aiguire ũhoro ũcio, akiuma kũu ahaicĩte gatarũ andũ matekũmenya, agĩthiĩ handũ hataarĩ na andũ. Nakĩo kĩrĩndĩ kĩaigua ũguo-rĩ, gĩkiuma matũũra-inĩ gĩkĩmũrũmĩrĩra na magũrũ.
Rĩrĩa Yahshua oimire gatarũ-inĩ na akĩona andũ aingĩ, akĩmaiguĩra tha, na akĩhonia arũaru ao.
Na gwakuhĩrĩria gũtuka-rĩ, arutwo ake magĩthiĩ harĩ we, makĩmwĩra atĩrĩ, “Gũkũ nĩ kũndũ gũtarĩ mĩciĩ, na nĩ kũratuka. Ĩra andũ aya mathiĩ, nĩgetha makegũrĩre irio icagi-inĩ.”
Yahshua akĩmacokeria atĩrĩ, “Hatirĩ bata wa mathiĩ. Mahei gĩa kũrĩa inyuĩ ene.”
Nao makĩmũcokeria atĩrĩ, “Haha tũrĩ na mĩgate ĩtano tu na thamaki igĩrĩ.”
Akĩmera atĩrĩ, “Ndeherai haha.”
Nake agĩathana andũ maikare thĩ nyeki-inĩ. Akĩoya mĩgate ĩyo ĩtano na thamaki icio igĩrĩ, akĩrora igũrũ, agĩcokia ngatho, akĩenyũranga mĩgate ĩyo. Agĩcoka akĩmĩnengera arutwo, nao arutwo makĩhe andũ.
Othe makĩrĩa makĩhũna, nao arutwo makĩũngania cienyũ iria ciatigarĩte makĩiyũria ciondo ikũmi na igĩrĩ.
Mũigana wa andũ arĩa maarĩire waarĩ ta arũme ngiri ithano, andũ-a-nja na ciana matatarĩtwo.
O hĩndĩ ĩyo Yahshua akĩĩra arutwo ake matonye gatarũ, mathiĩ mbere yake mũrĩmo ũrĩa ũngĩ wa iria mũira wa oigĩre kĩrĩndĩ ũhoro.
Thutha wa kũmoigĩra ũhoro-rĩ, akĩambata kĩrĩma-inĩ arĩ wiki nĩguo akahoe. Na gũgĩtuka aarĩ o ho wiki,
no gatarũ nĩ karĩkĩtie gũthiĩ itĩĩna iraiharaihu kuuma thĩ nyũmũ, gakĩhũragwo nĩ makũmbĩ ma maĩ tondũ kerekeire na kũrĩa rũhuho ruoimaga.
Na rĩrĩ, ta thaa kenda cia ũtukũ-rĩ, Yahshua agĩthiĩ kũrĩ o agereire maĩ igũrũ.
Hĩndĩ ĩrĩa arutwo maamuonire agĩthiĩ agereire maĩ igũrũ, makĩnyitwo nĩ guoya, makiuga atĩrĩ, “Ĩrĩa nĩ ngoma,” na magĩkaya nĩ gwĩtigĩra.
No hĩndĩ o ĩyo Yahshua akĩmera atĩrĩ, “Ũmĩrĩriai! Nĩ niĩ. Tigai gwĩtigĩra.”
Kepha akĩmũcokeria atĩrĩ, “Mwathi, akorwo nĩwe-rĩ, njĩĩra njũke kũrĩ we ngereire maĩ igũrũ.”
Nake Yahshua akĩmwĩra atĩrĩ, “Ũka.” Hĩndĩ ĩyo, Kepha akiuma gatarũ, agĩthiĩ agereire maĩ igũrũ erekeire harĩ Yahshua.
No rĩrĩa oonire rũhuho, agĩĩtigĩra, na akĩambĩrĩria gũtonyerera maĩ-inĩ, agĩkaya, akiuga atĩrĩ, “Mwathi, honokia!”
O rĩmwe, Yahshua agĩtambũrũkia guoko, akĩmũnyiita, akĩmwĩra atĩrĩ, “Wee kaĩ ũrĩ na wĩtĩkio mũnini-ĩ! Wagĩa na nganja nĩkĩ?”
Na hĩndĩ ĩrĩa maahaicire gatarũ-rĩ, rũhuho rũgĩtiga kũhurutana.
Hĩndĩ ĩyo arĩa maarĩ thĩinĩ wa gatarũ makĩmũgooca, makiuga atĩrĩ, “Nĩ ma wee nĩwe Mũrũ wa Yahweh.”
Na maarĩkia kũringa mũrĩmo ũrĩa ũngĩ, magĩkinya bũrũri wa Genesareti.
Na hĩndĩ ĩrĩa andũ a kũu maamenyire atĩ nĩ Yahshua, makĩhunjia ũhoro ngʼongo ciothe iria ciamarigiicĩirie. Nao makĩmũrehera andũ othe arĩa maarĩ arũaru,
na makĩmũthaitha areke arũaru mahutie gĩcũrĩ kĩa nguo yake, na arĩa othe maamũhutirie makĩhonio.