Mathayo 15
Na rĩrĩ, thutha ũcio Afarisai amwe na aandĩki-marũa magĩũka kũrĩ Yahshua moimĩte Yahrushalayim, makĩmũũria atĩrĩ,
“Nĩ kĩ gĩtũmaga arutwo aku mathũkie kĩrĩra kĩa athuri? Matiĩthambaga moko rĩrĩa mekũrĩa irio!”
Nake Yahshua akĩmoria atĩrĩ, “Na inyuĩ mũthũkagia watho wa Yahweh nĩ ũndũ wa irĩra cianyu nĩkĩ?
Nĩgũkorwo Yahweh oigire atĩrĩ, ‘Tĩa thoguo na nyũkwa’ na ‘Mũndũ wa kũruma ithe kana nyina no nginya ooragwo.’
No inyuĩ muugaga atĩ mũndũ angĩra ithe kana nyina atĩrĩ, ‘Ũteithio ũrĩa ingĩagũteithia naguo, nĩ kĩheo kĩamũrĩre Yahweh,’
mũndũ ũcio ndarĩ bata wa ‘gũtĩa ithe’ naguo. Nĩ ũndũ ũcio mũgagĩtua kiugo kĩa Yahweh gĩa tũhũ nĩ ũndũ wa kĩrĩra kĩanyu.
Inyuĩ hinga ici! Isaiya nĩ amenyete wega hĩndĩ ĩrĩa aarathire ũhoro wanyu, akiuga atĩrĩ:
“ ‘Andũ aya maaheaga gĩtĩo na mĩromo, no ngoro ciao irĩ kũraya na niĩ.
Nao maahoyaga o tũhũ; morutani marĩa marutanaga no mawatho ma andũ.’ ”
Nake Yahshua agĩĩta kĩrĩndĩ kĩu gĩũke harĩ we, agĩkĩĩra atĩrĩ, “Thikĩrĩriai na mũtaũkĩrwo.
Kĩrĩa gĩtonyaga na kanua ka mũndũ ti kĩo ‘kĩmũthahagia’, no kĩrĩa kiumaga kanua gake nĩkĩo ‘kĩmũthahagia.’ ”
Na hĩndĩ ĩyo arutwo ake magĩthiĩ harĩ we, makĩmũũria atĩrĩ, “Nĩ ũĩ atĩ Afarisai nĩ mararakarire rĩrĩa maraiguire ũhoro ũcio?”
Nake akĩmacokeria atĩrĩ, “Mũmera o wothe ũtahandĩtwo nĩ Baba ũrĩa ũrĩ igũrũ nĩ ũkamunywo na mĩri.
Tiganai nao; acio nĩ atongoria atumumu. Mũtumumu angĩtongoria mũtumumu ũngĩ, erĩ no kũgũa mangĩgũa irima.”
Nake Kepha akiuga atĩrĩ, “Tũtaũrĩre ngerekano ĩyo.”
Nake Yahshua akĩmoria atĩrĩ, “O na inyuĩ mũtirĩ mũrataũkĩrwo o na rĩu?
Kaĩ mũtoĩ atĩ kĩndũ kĩrĩa gĩtonyaga na kanua gĩthiaga nda, gĩgacoka gĩkoima mwĩrĩ?
No maũndũ marĩa moimaga kanua moimaga ngoro-inĩ, na nĩmo ‘mathahagia’ mũndũ.
Nĩ ũndũ ngoro-inĩ nĩkuo kuumaga meciria moru, na ũragani, na ũtharia, na ũhũri maraya, na ũici, na kũiganĩrĩra igenyo, na njambanio.
Macio nĩmo maũndũ marĩa ‘mathahagia’ mũndũ; no kũrĩa irio na moko matarĩ mathambie gũtingĩtũma mũndũ agĩe na ‘thahu’.”
Ningĩ Yahshua akiuma kũu, agĩthiĩ ndere-inĩ cia Turo na Sidoni.
Mũndũ-wa-nja Mũkaanani woimĩte gũkuhĩ na kũu agĩũka kũrĩ we, akĩmũkayagĩra, akiugaga atĩrĩ, “Mwathi, Mũrũ wa Daudi, njiguĩra tha! Mũirĩtu wakwa nĩ arathĩĩnio mũno nĩ ndaimono.”
No Yahshua ndarĩ ũndũ o na ũmwe oigire. Nĩ ũndũ ũcio arutwo ake magĩthiĩ kũrĩ we makĩmũringĩrĩria, makĩmwĩra atĩrĩ, “Mwĩre athiĩ, tondũ nĩ aratũrũmĩrĩra agĩkayaga.”
Nake Yahshua agĩcokia atĩrĩ, “Ndaatũmirwo o kũrĩ ngʼondu cia nyũmba ya Isiraeli iria ciũrĩte tu.”
Nake mũndũ-wa-nja ũcio agĩũka, akĩmũturĩria ndu, akĩmwĩra atĩrĩ, “Mwathi, ndeithia!”
Nake Yahshua agĩcokia atĩrĩ, “Gũtiagĩrĩire kuoya mũgate wa ciana ũikĩrie ngui.”
Nake mũndũ-wa-nja ũcio akiuga atĩrĩ, “Ĩĩ nĩguo Mwathi; no o na ngui nĩ irĩaga rũitĩki rũrĩa rũgũaga kuuma metha-inĩ ya mwene cio.”
Nake Yahshua akĩmũcokeria atĩrĩ, “Mũtumia ũyũ, wĩtĩkio waku nĩ mũnene! Ihoya rĩaku nĩ rĩahingio.” Nake mwarĩ akĩhonio ithaa o rĩu.
Yahshua akiuma kũu, agĩthiĩ agereire hũgũrũrũ-inĩ cia iria rĩa Galili, agĩcoka akĩambata kĩrĩma-inĩ, agĩikara thĩ.
Nakĩo kĩrĩndĩ kĩnene gĩgĩũka kũrĩ we, gĩkĩmũrehera andũ arĩa maathuaga, na atumumu, na arĩa maarĩ onju na arĩa mataaragia, na angĩ aingĩ, makĩmaiga magũrũ-inĩ make; nake akĩmahonia.
Nao andũ makĩgega rĩrĩa moonire arĩa mataaragia makĩaria, na arĩa onju mahonetio, na arĩa maathuaga magĩĩtwara, na atumumu makĩona. Nao makĩgooca Kĩhoti wa Isiraeli.
Nake Yahshua agĩĩta arutwo ake moke harĩ we, akĩmera atĩrĩ, “Nĩ ndĩraiguĩra andũ aya tha tondũ makoretwo hamwe na niĩ mĩthenya ĩtatũ, na matirĩ na kĩndũ gĩa kũrĩa. Ndikwenda mathiĩ marĩ ahũtu, tondũ maahota kũringĩkĩra njĩra.”
Nao arutwo ake magĩcokia atĩrĩ, “Tũngĩruta kũ mĩgate ya kũhũnia kĩrĩndĩ ta gĩkĩ, gũkũ werũ-inĩ?”
Nake Yahshua akĩmoria, atĩrĩ, “Mũrĩ na mĩgate ĩigana?” Nao makĩmũcokeria atĩrĩ, “Tũrĩ na mĩgate mũgwanja, na tũthamaki tũnini tũtarĩ tũingĩ.”
Nake akĩĩra kĩrĩndĩ kĩu gĩikare thĩ.
Agĩcoka akĩoya mĩgate ĩyo mũgwanja na tũthamaki tũu, na aarĩkia gũcokia ngatho-rĩ, akĩmĩenyũranga, akĩmĩnengera arutwo nao makĩhe andũ.
Othe makĩrĩa makĩhũna. Thutha ũcio arutwo makĩũngania cienyũ iria ciatigarĩte makĩiyũria ciondo mũgwanja.
Mũigana wa andũ arĩa maarĩire waarĩ andũ ngiri inya, andũ-a-nja na ciana matatarĩtwo.
Yahshua aarĩkia kuugĩra kĩrĩndĩ ũhoro, agĩtonya gatarũ, agĩthiĩ mwena wa Magadani.