Mathayo 2

Na rĩrĩ, thuutha wa Yahshua gũciarwo kũu itũũra-inĩ rĩa Bethilehemu bũrũri wa Yahuda, hĩndĩ ya mũthamaki wetagwo Herode, andũ Oogĩ-a-Njata moimĩte irathĩro magĩũka Yahrushalayim,

makĩũria atĩrĩ, “Ũrĩa ũciarĩtwo arĩ mũthamaki wa Ayahudi-rĩ, arĩ ha? Nĩ tuonire njata yake mwena wa irathĩro, na nĩ tũũkĩte kũmũhooya.”

Rĩrĩa Mũthamaki Herode aiguire ũguo, agĩtangĩka ngoro, o hamwe na Yahrushalayim guothe.

Na aarĩkia gwĩta athĩnjĩri-Yahweh arĩa anene othe, na arutani a watho hamwe, akĩmooria kũrĩa Messiya aarĩ aciarĩrwo.

Makĩmũcookeria atĩrĩ, “Nĩ Bethilehemu, bũrũri wa Yahuda, nĩgũkorwo nĩ kwandĩkĩtwo nĩ mũnabii, akoiga atĩrĩ:

“ ‘Nawe Bethilehemu, kũu bũrũri wa Yahuda, tiwe ũrĩa mũnini mũno wa aathani a Yahuda; tondũ thĩinĩ waku nĩ gũkoima ũrĩa ũgaathanaga, ũrĩa ũgaatuĩka mũrĩithi wa andũ akwa a Isiraeli.’ ”

Nake Herode agĩĩta andũ acio Oogĩ-a-Njata na hitho, na agĩtuĩria kuuma kũrĩ o ihinda rĩrĩa njata ĩyo yoonekete.

Akĩmatũma Bethilehemu akĩmeera atĩrĩ, “Thiĩi mũgatuĩrie wega ũhoro wa kaana kau. Mwarĩkia gũkoona mũũke mũũmenyithie, nĩgetha o na niĩ thiĩ ngagaturĩrie ndu ndĩkahooe.”

Nao maarĩkia kũigua ciugo cia mũthamaki magĩthiĩ, nayo njata ĩrĩa moonete irathĩro ĩkĩmatongoria nginya ĩkĩrũgama igũrũ rĩa harĩa kaana kau kaarĩ.

Rĩrĩa moonire njata ĩyo, magĩkena gĩkeno kĩnene mũno.

Nao magĩtonya nyũmba, na makĩona kaana karĩ na nyina Mariamu, magĩkainamĩrĩra, magĩkahooya. Magĩcooka makĩohora indo ciao cia goro, magĩkahe iheo cia thahabu, na ũbumba, na manemane.

Na nĩ ũndũ wa gũkaanio na kĩroto matigacokere kwa Herode, magĩcoka bũrũri wao magereire njĩra ĩngĩ.

Maarĩkia gũthiĩ-rĩ, mũraika wa Yahweh akiumĩrĩra Jusufu kĩroto-inĩ, akĩmwĩra atĩrĩ, “Ũkĩra woe kaana gaka na nyina mũũrĩre Misiri. Ikarai kũu nginya rĩrĩa ngaakwĩra, nĩgũkorwo Herode nĩ egũcaria kaana kau akorage.”

Nĩ ũndũ ũcio-rĩ, agĩũkĩra, akĩoya kaana na nyina ũtukũ, magĩthiĩ Misiri,

kũrĩa maikarire nginya rĩrĩa Herode aakuire. Na nĩ ũndũ ũcio, ũhoro ũrĩa Yahweh oigĩte na kanua ka mũnabii ũkĩhinga, rĩrĩa oigire atĩrĩ, “Ndeetire mũrũ wakwa oime bũrũri wa Misiri.”

Hĩndĩ ĩrĩa Herode aamenyire atĩ nĩ ahenirio nĩ Oogĩ-a-Njata, akĩrakara mũno, akĩruta watho wa kũũraga tũhĩĩ tuothe kũu Bethilehemu na kũrĩa gũkuhĩ nakuo, tũrĩa twarĩ na ũkũrũ wa mĩaka ĩĩrĩ gũcooka na thĩ, kũringana na ihinda rĩrĩa eerĩtwo nĩ Oogĩ-a-Njata.

Hĩndĩ ĩyo ũhoro ũrĩa waarĩtio na kanua ka mũnabii Jeremiya ũkĩhinga, rĩrĩa oigire atĩrĩ:

“Mũgambo nĩ waiguirwo kũu Rama, kĩrĩro na gũcakaya kũnene, Rakeli akĩrĩrĩra ciana ciake, na akarega kũhorerio, tondũ itirĩ ho.”

Na rĩrĩ, Herode akua-rĩ, mũraika wa Yahweh akiumĩrĩra Jusufu kĩroto-inĩ kũu Misiri,

akĩmwĩra atĩrĩ, “Ũkĩra, woe kaana gaka na nyina, mũthiĩ bũrũri wa Isiraeli, nĩgũkorwo arĩa maageragia gũkoraga nĩ makuĩte.”

Nĩ ũndũ ũcio, agĩũkĩra, akĩoya kaana na nyina, magĩthiĩ bũrũri wa Isiraeli.

Rĩrĩa aiguire atĩ Arikelau nĩwe wathamakaga Yahuda handũ ha ithe Herode, agĩĩtigĩra gũthiĩ kuo. Na aarĩkia gũkaanio kĩroto-inĩ-rĩ, agĩthiĩ bũrũri wa Galili,

agĩthiĩ gũtũũra itũũra rĩĩtagwo Nazarethi. Nĩ ũndũ ũcio ũhoro ũrĩa waarĩtio na tũnua twa anabii ũkĩhinga, rĩrĩa moigire atĩrĩ, “Nĩ agetagwo Mũnazari.”