Mathayo 3

Matukũ-inĩ macio Johana ũrĩa Mũbatithania nĩ okire, akĩhunjagia kũu Werũ-inĩ wa Yahuda,

akiugaga atĩrĩ, “Mwĩrirei, nĩgũkorwo ũthamaki wa igũrũ nĩ ũkuhĩrĩirie.”

Ũyũ nĩwe ũrĩa ũhoro wake waarĩtio nĩ mũnabii Isaiya rĩrĩa oigire atĩrĩ: “Kũrĩ na mũgambo wa mũndũ ũkwanĩrĩra werũ-inĩ, akoiga atĩrĩ: ‘Haarĩriai njĩra ya Yahweh, rũngariai njĩra ciake.’ ”

Johana eekagĩra Nguo ya guoya wa ngamĩra, na nĩ eyohaga mũcibi wa rũũa njohero. Irio ciake ciarĩ ngigĩ na ũũkĩ wa gĩthaka.

Nao andũ nĩ mathiiaga kũrĩ we moimĩte Yahrushalayim, na mĩena yothe ya Yahuda, na bũrũri wothe ũrĩa wariganĩtie na Jorodani.

Moimbũraga mehia mao, nake akamabatithĩria Rũũĩ-inĩ rwa Jorodani.

Na rĩrĩa oonire Afarisai na Asadukai aingĩ magĩũka hau nĩgetha amabatithie, akĩmeera atĩrĩ, “Inyuĩ rũciaro rũrũ rwa nduĩra! Nũũ ũmũhete ũhoro atĩ mũũrĩre marakara marĩa makiriĩ gũũka?

Ciarai maciaro maringaine na kwĩrira.

Na mũtikeĩĩre na ngoro cianyu atĩrĩ, ‘Ithe witũ nĩ Iburahĩmu.’ Ngũmwĩra atĩrĩ, Kĩhoti no atũme mahiga maya matuĩke ciana cia Iburahĩmu.

Ithanwa nĩ rĩige itina-inĩ cia mĩtĩ, na mũtĩ o wothe ũtaciaraga maciaro mega nĩ ũgatemwo, ũikio mwaki-inĩ.

“Niĩ ndĩmũbatithagia na maĩ mwerira. No thutha wakwa nĩ gũgũũka mũndũ ũngĩ ũrĩ na hinya kũrĩ niĩ, na ndiagĩrĩire o na kũmũkuuĩra iraatũ ciake. We akaamũbatithagia na Roho Mwamũre na mwaki.

Gĩtarũrũ gĩake akĩnyiitĩte na guoko, na nĩ agatheria kĩhuhĩro gĩake, na acokanĩrĩrie ngano yake ikũmbĩ, acoke acine mahuti na mwaki ũtangĩhoreka.”

Hĩndĩ ĩyo Yahshua akiuma Galili agĩthiĩ Rũũĩ-inĩ rwa Jorodani akabatithio nĩ Johana.

Nowe Johana akĩgeria kũmũgiria, akĩmwĩra atĩrĩ, “Niĩ njagĩrĩirwo nĩ kũbatithio nĩwe, nawe wagĩũka kũrĩ niĩ atĩa?”

Nake Yahshua akĩmũcokeria atĩrĩ, “Reke gũtuĩke ũguo rĩu; tondũ nĩ twagĩrĩirwo twĩke ũndũ ũyũ nĩguo tũhingie maũndũ mothe ma ũthingu.” Hĩndĩ ĩyo Johana agĩĩtĩkĩra.

Yahshua aarĩkia kũbatithio o ũguo-rĩ, akiumĩra maĩ-inĩ. Kahinda o kau igũrũ rĩkĩhingũka, nake akĩona Roho wa Yahweh agĩikũrũka ta ndutura, akĩũmba igũrũ rĩake.

Naguo mũgambo ũkiuma igũrũ, ũkiuga atĩrĩ, “Ũyũ nĩwe Mũrũ wakwa, ũrĩa nyendete; na nĩ ngenaga mũno nĩ we.”