Mathayo 4

Hĩndĩ ĩyo Yahshua nĩ atongoririo nĩ Roho agĩtwarwo werũ-inĩ akagerio nĩ mũcukani.

Na aniina mĩthenya mĩrongo ĩna, ũtukũ na mũthenya, ehingĩte kũrĩa irio-rĩ, akĩigua ahũtiĩ.

Nake mũgerania akĩmũkora, akĩmwĩra atĩrĩ, “Angĩkorwo wee nĩwe Mũrũ wa Yahweh-rĩ, ĩra mahiga maya matuĩke mĩgate.”

Nake Yahshua akĩmũcokeria atĩrĩ, “Nĩ kwandĩkĩtwo atĩrĩ: ‘To mũgate wiki ũngĩtũũria mũndũ muoyo, no nĩ kiugo gĩothe kĩrĩa kiumaga kanua ka Yahweh.’ ”

Hĩndĩ ĩyo mũcukani akĩmũtwara itũũra rĩrĩa rĩamũre, akĩmũrũgamia gathũrũmũndũ ka hekarũ

akĩmwĩra atĩrĩ, “Angĩkorwo wee nĩwe Mũrũ wa Yahweh-rĩ, wĩgũithie thĩ. Nĩgũkorwo kwandĩkĩtwo atĩrĩ: “ ‘Nĩ agaatha araika ake nĩ ũndũ waku, nao nĩ magakwanĩrĩria na moko mao, nĩguo ndũkanahĩngwo kũgũrũ nĩ ihiga.’ ”

Nake Yahshua akĩmũcokeria atĩrĩ, “Ningĩ nĩ kwandĩkĩtwo atĩrĩ: ‘Ndũkanagerie Yahweh Kĩhoti waku.’ ”

Ningĩ mũcukani akĩmũtwara kĩrĩma-inĩ kĩraya mũno, akĩmuonia mothamaki mothe ma thĩ na riri wamo.

Akĩmwĩra atĩrĩ, “Maũndũ maya mothe nĩ ngũkũhe, ũngĩĩtĩkĩra kũnyinamĩrĩra ũhooe.”

Nake Yahshua akĩmwĩra atĩrĩ, “Thiĩ Shaitani ndiga! Nĩgũkorwo nĩ kwandĩkĩtwo atĩrĩ: ‘Hooyaga Yahweh Kĩhoti waku, na ũmũtungatagĩre o we wiki.’ ”

Hĩndĩ ĩyo mũcukani akĩmũtiga, nao araika magĩũka makĩmũtungatĩra.

Na rĩrĩa Yahshua aiguire atĩ Johana nĩ aikĩtio njeera-rĩ, agĩthiĩ Galili.

Akiuma Nazarethi, agĩthiĩ gũtũũra Kaperinaumu. Itũũra rĩu rĩarĩ hakuhĩ na iria, bũrũri-inĩ wa Zebuluni na Nafitali.

Ũndũ ũcio wekĩkire nĩguo ũhoro ũrĩa waarĩtio na kanua ka mũnabii Isaiya ũhinge, rĩrĩa oigire atĩrĩ:

“Bũrũri wa Zebuluni, o na bũrũri wa Nafitali, njĩra ya gũthiĩ iria-inĩ, gũikũrũkania na Rũũĩ rwa Jorodani, kũu gwĩtagwo Galili-kwa-Ndũrĩrĩ:

andũ arĩa matũũraga nduma-inĩ nĩ monete ũtheri mũnene; nao arĩa matũũraga bũrũri ũrĩ kĩĩruru gĩa gĩkuũ-rĩ, nĩ marĩirwo nĩ ũtheri.”

Kuuma hĩndĩ ĩyo Yahshua akĩambĩrĩria kũhunjia ũhoro akiugaga atĩrĩ, “Mwĩrirei, nĩgũkorwo ũthamaki wa igũrũ nĩ ũkuhĩrĩirie.”

Rĩrĩa Yahshua aaceraga hũgũrũrũ-inĩ cia Iria rĩa Galili, nĩ onire andũ eerĩ a nyina ũmwe, nao nĩ Simoni ũrĩa wetagwo Kepha, na mũrũ wa nyina Anderea. Maikagia neti iria-inĩ, nĩgũkorwo maarĩ ategi a thamaki.

Nake Yahshua akĩmera atĩrĩ, “Ũkai, mũnũmĩrĩre, na nĩ ngũmũtua ategi a andũ.”

Nao o rĩmwe magĩtiganĩria neti ciao, makĩmũrũmĩrĩra.

Na aathiathia akĩona andũ angĩ eerĩ a nyina ũmwe, Jakubu mũrũ wa Zebedi, na mũrũ wa nyina Johana. Maarĩ thĩinĩ wa gatarũ hamwe na ithe wao Zebedi makĩhaarĩria neti ciao. Nake Yahshua akĩmeta,

na o rĩmwe magĩtiganĩria gatarũ na magĩtiga ithe wao, makĩmũrũmĩrĩra.

No rĩrĩ, Yahshua nĩ athiire Galili guothe, akĩrutanaga thunagogi-inĩ ciao, akĩhunjagia Ũhoro-ũrĩa-Mwega wa ũthamaki wa Yahweh, na akĩhonagia andũ mĩrimũ yothe na ndwari ciothe iria maarĩ nacio.

Nayo ngumo yake ĩkĩhunjio bũrũri wothe wa Suriata, nao andũ makĩmũrehera andũ arĩa othe maarĩ arũaru ndwari cia mĩthemba mĩingĩ, na arĩa maarĩ na ruo rũingĩ, na arĩa maarĩ na ndaimono, na arĩa maarĩ na mũrimũ wa kũgũaga, o na arĩa maarĩ na mũrimũ wa gũkua ciĩga, nake akĩmahonia othe.

Nao andũ aingĩ mũno kuuma Galili, na Dekapoli, na Yahrushalayim, na Yahuda, na mũrĩmo ũrĩa ũngĩ wa Rũũĩ rwa Jorodani makĩmũrũmĩrĩra.