Mathayo 5
Na rĩrĩa Yahshua oonire andũ aingĩ mũno-rĩ, akĩambata kĩrĩma-igũrũ, agĩikara thĩ. Arutwo ake magĩthiĩ harĩ we.
Nake akĩambĩrĩria kũmaruta ũhoro, akĩmera atĩrĩ:
“Kũrathimwo-rĩ, nĩ arĩa athĩni ngoro, nĩgũkorwo ũthamaki wa igũrũ nĩ wao.
Kũrathimwo-rĩ, nĩ arĩa marĩ na kĩeha, nĩgũkorwo nĩ makaniinĩrwo kĩeha.
Kũrathimwo-rĩ, nĩ arĩa ahooreri, nĩgũkorwo nĩ makagaya thĩ.
Kũrathimwo-rĩ, nĩ arĩa mahũũtagĩra na makanyotera ũthingu, nĩgũkorwo nĩ makahũũnio.
Kũrathimwo-rĩ, nĩ arĩa maiguanagĩra tha, nĩgũkorwo nĩ makaiguĩrwo tha.
Kũrathimwo-rĩ, nĩ arĩa atheru ngoro, nĩgũkorwo nĩ makona Yahweh.
Kũrathimwo-rĩ, nĩ arĩa macaragia thayũ, nĩgũkorwo nĩ magetwo ariũ a Yahweh.
Kũrathimwo-rĩ, nĩ arĩa manyariragwo nĩ ũndũ wa ũthingu, nĩgũkorwo ũthamaki wa igũrũ nĩ wao. 11“Kũrathimwo-rĩ, nĩ inyuĩ hĩndĩ ĩrĩa andũ mekũmũruma, na makamũnyarira, na makamũigĩrĩra maũndũ mothe mooru nĩ ũndũ wakwa.
Kũrathimwo-rĩ, nĩ inyuĩ hĩndĩ ĩrĩa andũ mekũmũruma, na makamũnyarira, na makamũigĩrĩra maũndũ mothe mooru nĩ ũndũ wakwa.
Kenai na mũcanjamũke, tondũ kĩheo kĩanyu nĩ kĩnene igũrũ, nĩgũkorwo ũguo noguo maanyaririre anabii arĩa maarĩ kuo mbere yanyu.
“Inyuĩ nĩ inyuĩ cumbĩ wa thĩ. No cumbĩ ũngĩkorwo nĩ ũthirĩte mũcamo waguo-rĩ, ũngĩcoka gũcamithio ta cumbĩ nĩ kĩĩ? Ndũngĩcoka kũgĩa kĩene rĩngĩ, tiga no ũteirwo ũrangwo nĩ andũ.
“Inyuĩ nĩ inyuĩ ũtheri wa thĩ. Itũũra inene rĩakĩtwo kĩrĩma igũrũ rĩtingĩhithĩka.
O na ningĩ andũ matiakagia tawa magacoka kũũkunĩkĩra na mbakũri; handũ ha ũguo, maũigagĩrĩra igũrũ handũ haguo, naguo ũkamũrĩkĩra andũ othe arĩa marĩ thĩinĩ wa nyũmba.
O ũguo naguo, na inyuĩ rekei ũtheri wanyu ũmũrĩkagĩre andũ, nĩguo mone ciĩko cianyu njega, nao magoocage Ithe wanyu ũrĩa ũrĩ igũrũ.
“Mũtikae gwĩciiria njũkĩte kweheria Watho kana Mohoro ma Anabii; ndiũkĩte kũmeheria, no njũkĩte kũmahingia.
Ngũmwĩra atĩrĩ na ma, nginya hĩndĩ ĩrĩa thĩ na igũrũ ikehera, gũtirĩ kairia ka i maandĩko-inĩ, o na gũtirĩ gakururo ga t gakehera o na atĩa kuuma Watho-inĩ, nginya maũndũ mothe makaahingio.
Ũrĩa wothe ũkoina rĩathani o na rĩmwe rĩa marĩa manini, na arute arĩa angĩ gwĩka ũguo, nĩ agatuo mũnini makĩria thĩinĩ wa ũthamaki wa igũrũ, no ũrĩa wothe wĩkaga na akarutana maathani maya-rĩ, nĩ agatuo mũnene ũthamaki-inĩ wa igũrũ.
Nĩ ũndũ ũcio ngũmwĩra atĩrĩ, ũthingu wanyu waga gũkĩra ũrĩa wa Afarisai na wa aandĩki-marũa, mũtigatonya ũthamaki-inĩ wa igũrũ o na atĩa.
“Nĩ mũiguĩte atĩ hĩndĩ ya tene andũ nĩ merirwo atĩrĩ, ‘Ndũkanoragane, na mũndũ o na ũrĩkũ ũkoragana no nginya agaatuĩka wa gũtuĩrwo cira.’
No niĩ ngũmwĩra atĩrĩ, ũrĩa wothe ũkarakarĩra mũrũ wa ithe nĩ agatuĩka wa gũtuĩrwo cira. Na ningĩ-rĩ, mũndũ ũrĩa wothe wĩraga mũrũ wa ithe atĩrĩ, ‘Wee ndũrĩ bata,’ nĩ agaciirithio nĩ Kĩama. No ũrĩa wothe ũngiuga atĩrĩ, ‘Wee wĩ mũkĩgu!’ Nĩ agakorwo arĩ ũgwati-inĩ wa gũikio mwaki-inĩ wa Jehanamu.
“Nĩ ũndũ ũcio, angĩkorwo nĩ wĩhaarĩirie kũruta kĩheo gĩaku kĩgongona-inĩ, na hĩndĩ ĩyo ũrĩ hau ũririkane atĩ mũrũ wa thoguo arĩ na ũndũ nawe-rĩ,
tiga kĩheo gĩaku o hau mbere ya kĩgongona. Amba ũthiĩ ũkaiguane na mũrũ wa thoguo; ũcoke ũũke ũrutĩre Yahweh kĩheo gĩaku.
“Hiũha kwĩiguithania na thũ yaku ĩrĩa ĩragũtwara igooti-inĩ. Ĩka ũguo mũrĩ o njĩra-inĩ, kwaga ũguo nĩ ĩgũgũtwara kũrĩ mũtuanĩri-cira, nake mũtuanĩri-cira akũneane kũrĩ mũnene wa thigari, ũikio njera.
Ngũkwĩra atĩrĩ na ma, ndũkoima kuo ũtarĩhĩte thirĩ wothe hatarĩ gathendi ũgũtigia.
“Nĩ mũiguĩte atĩ hĩndĩ ya tene nĩ kwerirwo atĩrĩ, ‘Ndũkanatharanie.’
No niĩ ngũmwĩra atĩrĩ, ũrĩa wothe ũkaarora mũndũ-wa-nja na amwĩrirĩrie, nĩ arĩkĩtie gũtharia nake ngoro-inĩ yake.
Riitho rĩaku rĩa ũrĩo rĩngĩtũma wĩhie-rĩ, rĩkũũre, ũrĩte. Nĩ kaba kĩĩga kĩmwe kĩa mwĩrĩ waku kĩũre gũkĩra mwĩrĩ waku wothe ũikio Jehanamu.
Na guoko gwaku kwa ũrĩo kũngĩtũma wĩhie-rĩ, gũtinie ũgũte. Nĩ kaba kĩĩga kĩmwe kĩa mwĩrĩ waku kĩũre gũkĩra mwĩrĩ waku wothe ũikio Jehanamu. 31“Ningĩ nĩ kwĩrĩtwo atĩrĩ, ‘Ũrĩa wothe ũngĩtigana na mũtumia wake no nginya amũhe marũa ma kuonania nĩ matigana nake.’
Ningĩ nĩ kwĩrĩtwo atĩrĩ, ‘Ũrĩa wothe ũngĩtigana na mũtumia wake no nginya amũhe marũa ma kuonania nĩ matigana nake.’
No ngũmwĩra atĩ mũndũ ũrĩa wothe ũtiganaga na mũtumia wake, o tiga nĩ ũndũ wa ũtharia-rĩ, nĩ atũmaga atuĩke mũtharia, na ũrĩa wothe ũhikagia mũtumia ũrĩa ũtiganĩte na mũthuri-we, nĩ gũtharia atharagia.
“Ningĩ, nĩ mũiguĩte atĩ hĩndĩ ya tene andũ nĩ merirwo atĩrĩ, ‘Ndũkanehĩte tũhũ, no hingagĩria Yahweh mĩĩhĩtwa ĩrĩa wĩhĩtĩte.’
No ngũmwĩra atĩrĩ: Mũtikanehĩte o na atĩa; mũtikanehĩte na igũrũ tondũ nĩkuo gĩtĩ kĩa ũnene kĩa Yahweh;
kana mwĩhĩte na thĩ, nĩgũkorwo nĩkuo gĩturwa gĩa kũigĩrĩra magũrũ make; o na kana mwĩhĩte na Yahrushalayim, nĩgũkorwo nĩrĩo itũũra inene rĩa Mũthamaki mũnene.
Na ndũkanehĩte na mũtwe waku, nĩgũkorwo ndũngĩhota gũtũma rũcuĩrĩ o na rũmwe rwerũhe kana rũire.
Reke ‘Ĩĩ’ yaku ĩtuĩke ‘Ĩĩ’, na ‘Aca’ yaku ĩtuĩke ‘Aca’; ũndũ o wothe makĩria ma ũguo-rĩ, uumaga kũrĩ ũrĩa mũũru.
“Nĩ mũiguĩte atĩ hĩndĩ ya tene nĩ kwerirwo atĩrĩ: ‘Riitho rĩrĩhagwo na riitho, narĩo igego rĩrĩhagwo na igego.’
No niĩ ngũmwĩra atĩrĩ: Mũtikanagiane na mũndũ ũrĩa mũũru. No rĩrĩ, mũndũ angĩkũgũtha rũthĩa rwa ũrĩo-rĩ, mũhũgũkĩrie rũu rũngĩ o naruo.
Na mũndũ angĩenda gũgũthitanga oe kanjũ yaku-rĩ, mũnengere o na igooti rĩaku.
Mũndũ angĩkũhatĩrĩria ũthiĩ itĩĩna rĩmwe-rĩ, thiĩ nake matĩĩna meerĩ.
Mũndũ ũrĩa ũngĩkũhoya kĩndũ, mũhe, na mũndũ ũrĩa ũngĩenda ũmũkombere kĩndũ, ndũkarege kũmũkombera.
“Nĩ mũiguĩte atĩ hĩndĩ ya tene nĩ kwerirwo atĩrĩ, ‘Endaga mũndũ wa itũũra rĩaku, na ũthũũrage thũ yaku.’
No niĩ ngũmwĩra atĩrĩ: Endagai thũ cianyu, na mũhoyagĩre arĩa mamũnyariraga,
nĩgetha mũtuĩke ariũ a Ithe wanyu ũrĩa ũrĩ igũrũ. Atũmaga riũa rĩake rĩrathĩre arĩa oru na arĩa ega, na akoiria mbura kũrĩ arĩa athingu na kũrĩ arĩa matarĩ athingu.
Angĩkorwo mwendete o arĩa mamwendete-rĩ, mũgaakĩrĩhwo kĩ? Githĩ o na etia mbeca cia igooti matiĩkaga o ũguo?
Na ningĩ angĩkorwo mũgeithagia o ariũ na aarĩ a ithe wanyu-rĩ, mũgĩkĩrĩte arĩa angĩ na kĩ? Githĩ o na arĩa matetĩkĩtie Yahweh matiĩkaga o ũguo?
Nĩ ũndũ ũcio-rĩ, tuĩkai aagĩrĩru kũna, o ta ũrĩa Ithe wanyu ũrĩa ũrĩ igũrũ arĩ mwagĩrĩru kũna.