Mathayo 9
Nake agĩtonya gatarũ, akĩringa iria, agĩkinya itũũra rĩa kwao.
Andũ amwe makĩmũrehera mũndũ warĩ na mũrimũ wa gũkua ciĩga, akuuĩtwo na kĩbarĩ. Rĩrĩa Yahshua oonire wĩtĩkio wao, akĩĩra mũndũ ũcio wakuĩte ciĩga atĩrĩ, “Mũriũ, wĩyũmĩrĩrie, nĩ warekerwo mehia maku.”
Nĩ ũndũ wa ũguo, aandĩki-marũa amwe makĩĩra na ngoro atĩrĩ, “Mũndũ ũyũ nĩ aruma Yahweh!”
Yahshua aamenya ũrĩa meciragia, akĩmoria atĩrĩ, “Mũreciria ũũru ngoro-inĩ cianyu nĩkĩ?
Nĩ ũndũ ũrĩkũ mũhũthũ: nĩ kwĩra mũndũ, ‘Nĩ warekerwo mehia maku,’ kana kũmwĩra, ‘Ũkĩra wĩtware?’
No nĩgetha mũmenye atĩ Mũrũ wa Mũndũ arĩ na ũhoti gũkũ thĩ wa kũrekanĩra mehia-rĩ...” Na o hĩndĩ ĩyo akĩĩra mũndũ ũcio wakuĩte ciĩga atĩrĩ, “Ũkĩra, oya kĩbarĩ gĩaku ũinũke mũciĩ.”
Nake mũndũ ũcio agĩũkĩra, akĩinũka mũciĩ.
Rĩrĩa kĩrĩndĩ kĩu kĩonire ũguo, gĩkĩmaka na gĩkĩgooca Yahweh, ũrĩa wahete andũ ũhoti ta ũcio.
Na rĩrĩa Yahshua oimaga kũu, akĩona mũndũ wetagwo Mathayo aikarĩte harĩa heetagĩrio mbeca cia igooti. Akĩmwĩra atĩrĩ, “Nũmĩrĩra,” nake Mathayo agĩũkĩra, akĩmũrũmĩrĩra.
Na rĩrĩa Yahshua aarĩ kwa Mathayo mũciĩ makĩrĩa irio cia hwaĩ-inĩ, etia mbeca cia igooti aingĩ na andũ ehia magĩũka kũrĩanĩra hamwe nake na arutwo ake.
Rĩrĩa Afarisai moonire ũguo, makĩũria arutwo ake atĩrĩ, “Mũrutani wanyu arĩanagĩra na etia mbeca cia igooti na andũ ehia nĩkĩ?”
Yahshua aigua ũguo, akĩmeera atĩrĩ, “Andũ arĩa agima mĩĩrĩ ti o mabataragio nĩ ndagĩtarĩ, no nĩ arĩa arũaru.
No rĩrĩ, thiĩi mũkerute ũrĩa ciugo ici ciugĩte: ‘Kũiguanĩra tha nĩkuo nyendaga, no ti magongona.’ Nĩgũkorwo niĩ ndiokire gũcaria arĩa athingu, no ndokire nĩ ũndũ wa arĩa ehia.”
Hĩndĩ ĩyo arutwo a Johana magĩũka kũrĩ we makĩmũũria atĩrĩ, “Ithuĩ na Afarisai nĩ twĩhingaga kũrĩa, no nĩ kĩ gĩtũmaga arutwo aku mage kwĩhinga kũrĩa irio?”
Nake Yahshua akĩmacokeria atĩrĩ, “Ageni a mũhikania mangĩhota atĩa kũigua kĩeha rĩrĩa mũhikania arĩ hamwe nao? Ihinda nĩ rĩgakinya rĩrĩa mũhikania akeherio kũrĩ o; hĩndĩ ĩyo nĩguo makehinga kũrĩa irio.
“Gũtirĩ mũndũ ũtumagĩrĩra nguo ngũrũ kĩraka kĩa nguo njerũ, nĩgũkorwo kĩraka kĩu no kĩgucie nguo ĩyo gĩtũme ĩtarũke makĩria.
Ningĩ andũ matiĩkagĩra ndibei ya mũhihano mondo-inĩ ngũrũ. Mangĩĩka ũguo, mondo icio no itarũke, nayo ndibei ĩitĩke, na mondo icio cia ndibei cianangĩke o biũ. No andũ mekagĩra ndibei ya mũhihano mondo-inĩ njerũ, nacio cierĩ igaikara irĩ njega.”
Na rĩrĩa aaragia maũndũ macio, hagĩũka mũndũ warĩ mũnene, akĩmũturĩria ndu, akĩmwĩra atĩrĩ, “Mũirĩtu wakwa no hĩndĩ aakua; no ũka ũkamũigĩrĩre guoko, na nĩ ekũriũka.”
Nake Yahshua agĩũkĩra, agĩthiĩ nake, arĩ na arutwo ake.
O hĩndĩ ĩyo mũndũ-wa-nja watũire oiraga thakame mĩaka ikũmi na ĩĩrĩ agĩũka na thutha wa Yahshua, akĩhutia gĩcũrĩ kĩa nguo yake.
Tondũ eĩraga atĩrĩ, “Ingĩhutia o nguo yake, no hone.”
Nake Yahshua akĩĩhũgũra, akĩmuona, akĩmwĩra atĩrĩ, “Mwarĩ ũyũ, wĩyũmĩrĩrie gwĩtĩkia gwaku nĩkuo gwatũma ũhone.” Nake mũndũ-wa-nja ũcio akĩhonio o hĩndĩ ĩyo.
Na rĩrĩa Yahshua aatonyire nyũmba ya mũnene ũcio, akĩona ahuhi mĩtũrirũ na gĩkundi kĩa andũ kĩrĩa kĩanegenaga,
akĩmeera atĩrĩ, “Eherai. Mũirĩtũ ũyũ ti mũkuũ, nĩ gũkoma akomete.” Nao andũ acio makĩmũthekerera.
Thutha wa andũ acio kuumio nja, agĩtonya thĩinĩ, akĩnyita mũirĩtu ũcio guoko, nake agĩũkĩra.
Ũhoro ũcio ũkĩhunja bũrũri ũcio wothe.
Na rĩrĩa Yahshua oimire kũu, aathianga-rĩ, andũ erĩ atumumu makĩmũrũmĩrĩra, makĩanagĩrĩra, makiugaga atĩrĩ, “Tũiguĩre tha, wee Mũrũ wa Daudi!”
Na hĩndĩ ĩrĩa aatonyire nyũmba, atumumu acio magĩũka kũrĩ we, nake akĩmoria atĩrĩ, “Nĩ mwĩtĩkĩtie atĩ no hote gwĩka ũguo?” Nao makĩmũcokeria atĩrĩ, “Ĩĩ-ni, Mwathi.”
Hĩndĩ ĩyo akĩmahutia maitho, akiuga atĩrĩ, “Mũroĩkwo o ũguo mwĩtĩkĩtie;”
namo maitho mao makĩhingũka magĩcoka kuona. Nake Yahshua akĩmakania na hinya, akĩmeera atĩrĩ, “Mũtikareke mũndũ o na ũrĩkũ amenye ũhoro ũyũ.”
No o makiumagara na makĩhunjia ũhoro wake bũrũri ũcio wothe.
Na hĩndĩ ĩrĩa moimaga hau, Yahshua akĩreherwo mũndũ warĩ na ndaimono, na ndaaragia.
Nayo ndaimono yaingatwo, mũndũ ũcio ũtaaragia, akĩaria. Kĩrĩndĩ gĩkĩgega, gĩkiuga atĩrĩ, “Ũndũ ta ũyũ ndũrĩ woneka Isiraeli.”
No Afarisai makiuga atĩrĩ, “Aingataga ndaimono na hinya wa mũnene wa ndaimono.”
Nake Yahshua agĩtuĩkania matũũra-inĩ mothe na mĩciĩ-inĩ yothe, akĩrutanaga thĩinĩ wa thunagogi ciao, akĩhunjagia Ũhoro-ũrĩa-Mwega wa ũthamaki, na akĩhonagia mĩrimũ na ndwari cia mĩthemba yothe.
Na rĩrĩa oonire ũrĩa kĩrĩndĩ kĩu kĩaiganaga, agĩkĩiguĩra tha tondũ kĩarĩ gĩthĩĩnĩku na gĩkaaga ũteithio, ta ngʼondu itarĩ na mũrĩithi.
Hĩndĩ ĩyo akĩĩra arutwo ake atĩrĩ, “Magetha nĩ maingĩ, no aruti a wĩra nĩ anini.
Nĩ ũndũ ũcio, hooyai Mwathi wa magetha atũme aruti wĩra mathiĩ magetha-inĩ make.”