Mathayo 8

Hĩndĩ ĩrĩa aikũrũkire kuuma kĩrĩma-inĩ, ikundi nene cia andũ ikĩmuuma thuutha.

Na mũndũ warĩ na mangũ agĩthiĩ harĩ we, agĩturia maru mbere yake, akĩmwĩra atĩrĩ, “Mwathi, ũngĩenda-rĩ, no ũtherie.”

Nake Yahshua agĩtambũrũkia guoko gwake, akĩhutia mũndũ ũcio, akĩmwĩra atĩrĩ, “Nĩ ngwenda. Therio!” O hĩndĩ ĩyo akĩhonio mangũ make.

Yahshua agĩcoka akĩmwĩra atĩrĩ, “Menya ndũkeere mũndũ o na ũrĩkũ. No thiĩ ũkeyonanie kũrĩ mũthĩnjĩri-Yahweh, na ũrute kĩheo kĩrĩa Musa aathanire gĩtuĩke ũira kũrĩ o.”

Na Yahshua aarĩkia gũtonya Kaperinaumu, mũnene-wa-thigari-igana agĩũka kũrĩ we, akĩmũhoya ũteithio.

Akĩmwĩra atĩrĩ, “Mwathi, ndungata yakwa ĩkomete mũciĩ ĩrũarĩte mũrimũ wa gũkua ciĩga na ĩrĩ na ruo rũingĩ mũno.”

Nake Yahshua akĩmwĩra atĩrĩ, “Nĩ ngũthiĩ kũmĩhonia.”

No mũnene ũcio wa thigari igana akĩmũcokeria atĩrĩ, “Mwathi, niĩ ndiagĩrĩire atĩ wee ũke gwakwa. No uga o kiugo, na ndungata yakwa nĩ ĩkũhona.

Nĩgũkorwo niĩ mwene ndĩ mũndũ wathagwo, na ndĩ na thigari njathaga. Ndera ũmwe ‘Thiĩ,’ nĩathiaga, na ndera ũngĩ atĩrĩ, ‘Ũka,’ nĩ okaga. Na ningĩ ndera ndungata yakwa atĩrĩ, ‘Ĩka ũna,’ nĩ ĩkaga.”

Rĩrĩa Yahshua aiguire ũguo-rĩ, akĩgega, akĩĩra arĩa maamumĩte thutha atĩrĩ, “Ngũmwĩra atĩrĩ na ma, ndionete mũndũ o na ũrĩkũ gũkũ Isiraeli ũrĩ na wĩtĩkio mũnene ũũ.

Ngũmwĩra atĩrĩ, aingĩ nĩ magooka kuuma mwena wa irathĩro na wa ithũĩro, na nĩ magaikara iruga-inĩ hamwe na Iburahĩmu, na Isaaka, na Jakubu, ũthamaki-inĩ wa igũrũ.

No arĩa marĩ a ũthamaki ũcio nĩ magaikio nja, kũu nduma-inĩ, kũrĩa gũgaakorwo kĩrĩro na kũhagarania magego.”

Nake Yahshua agĩcoka akĩĩra mũnene ũcio wa thigari igana atĩrĩ, “Thiĩ! Nĩ ũgwĩkĩrwo o ũguo wĩtĩkĩtie.” Nayo ndungata yake ĩkĩhonio o ithaa rĩu.

Rĩrĩa Yahshua aatonyire nyũmba ya Kepha, akĩona atĩ nyina wa mũtumia wa Kepha aarĩ mũrũaru mũrimũ wa kũhiũha mwĩrĩ, agakoma gĩtanda-inĩ

Akĩmũhutia guoko, nake agĩtiga kũhiũha mwĩrĩ, akĩarahũka, akĩambĩrĩria kũmũtungatĩra.

Hwaĩ-inĩ ũcio, andũ aingĩ arĩa maarĩ na ndaimono makĩrehwo kũrĩ we, nake akĩingata maroho macio na kuuga o kiugo, na akĩhonia arĩa othe maarĩ arũaru.

Ũhoro ũyũ warĩ wa kũhingia ũrĩa kwaarĩtio na kanua ka mũnabii Isaiya, rĩrĩa oigire atĩrĩ: “We mwene nĩ oire wonje witũ, na akĩeheria mĩrimũ iitũ.”

Rĩrĩa Yahshua oonire gĩkundi kĩa andũ arĩa maamũthiũrũrũkĩirie, agĩathana maringe mũrĩmo ũrĩa ũngĩ wa iria.

Hĩndĩ ĩyo mũrutani ũmwe wa watho agĩũka harĩ we, akĩmwĩra atĩrĩ, “Mũrutani, nĩ ndĩkũrũmagĩrĩra kũrĩa guothe ũrĩthiaga.”

Nake Yahshua akĩmũcokeria atĩrĩ, “Mbwe nĩ irĩ marima, na nyoni cia rĩera-inĩ nĩ irĩ itara, no Mũrũ wa Mũndũ ndarĩ handũ angĩigĩrĩra mũtwe wake.”

Nake mũrutwo ũngĩ akĩmwĩra atĩrĩ, “Mwathi, reke nyambe thiĩ ngathike baba.”

Nowe Yahshua akĩmwĩra atĩrĩ, “Nũmĩrĩra, na ũreke arĩa akuũ mathike akuũ ao ene.”

Hĩndĩ ĩyo agĩtonya gatarũ, nao arutwo ake makĩmũrũmĩrĩra.

Na rĩrĩ, gũkĩgĩa kĩhuhũkanio kĩnene gĩteerĩgĩrĩirwo kũu iria-inĩ, gĩgĩtũma gatarũ kende kũhumbwo nĩ makũmbĩ ma maĩ. No Yahshua aarĩ toro.

Nao arutwo magĩthiĩ, makĩmũkĩria, makĩmwĩra atĩrĩ, “Mwathi, tũhonokie! Nĩ tũkũũrĩra maĩ-inĩ!”

Nake agĩcokia atĩrĩ, “Inyuĩ mũrĩ a wĩtĩkio mũnini, nĩ kĩ gĩgũtũma mwĩtigĩre ũguo?” Thuutha ũcio agĩũkĩra, agĩkũũma rũhuho na makũmbĩ macio, nakuo gũkĩhorera biũ.

Andũ acio makĩgega, makĩũria atĩrĩ, “Kaĩ mũndũ ũyũ akĩrĩ ũ atĩ o na rũhuho na makũmbĩ ma maĩ nĩ imwathĩkagĩra?”

Rĩrĩa aakinyire rũgongo rwa bũrũri wa Agadari-rĩ, agĩtũngwo nĩ andũ erĩ maarĩ na ndaimono, moimĩte mbĩrĩra-inĩ. Maarĩ na ũru mũingĩ mũno, atĩ gũtirĩ mũndũ ũngĩagerire njĩra ĩyo.

Nao makĩanĩrĩra, makĩũria atĩrĩ, “Ũrenda atĩa na ithuĩ, wee Mũrũ wa Yahweh. Woka gũkũ gũtũnyarira ihinda rĩrĩa rĩamũre rĩtanakinya?”

Nĩ haarĩ na rũũru rũnene rwa ngũrũe rwarĩithagio handũ hataarĩ haraya na hau maarĩ.

Nacio ndaimono igĩthaitha Yahshua, ikĩmwĩra atĩrĩ, “Akorwo nĩ ũgũtũingata-rĩ, tũtũme kũrĩ rũũru rũũrĩa rwa ngũrũe.”

Nake agĩciĩra atĩrĩ, “Thiĩi!” Nĩ ũndũ ũcio ikiuma, igĩtonya ngũrũe, naruo rũũru ruothe rũgĩikũrũka kĩharũrũka-inĩ na ihenya, rũkĩgũa iria thĩinĩ, rũgĩkuĩra maĩ-inĩ.

Arĩa maarĩithagia ngũrũe icio makĩũra, magĩthiĩ itũũra-inĩ, makĩheana maũndũ macio mothe o na ũrĩa gwekĩkĩte kũrĩ andũ arĩa maarĩ na ndaimono.

Hĩndĩ ĩyo itũũra rĩothe rĩkiumagara rĩgatũnge Yahshua. Na hĩndĩ ĩrĩa maamuonire, makĩmũthaitha oime rũgongo rwao.