Mathayo 7

“Mũtigaciirithanagie nĩgetha na inyuĩ mũtikanaciirithio.

Nĩgũkorwo o ta ũrĩa mũtuagĩra andũ arĩa angĩ cira, noguo na inyuĩ mũgaatuĩrwo cira, na gĩthimi kĩrĩa mũthimanagĩra nakĩo, no kĩo mũrĩthimagĩrwo nakĩo.

“Nĩ kĩ gĩtũmaga wone kĩhuti kĩrĩa kĩrĩ riitho rĩa mũrũ wa thoguo, no ũkaga kuona mũgogo ũrĩa ũrĩ riitho rĩaku wee mwene?

Wahota atĩa kwĩra mũrũ wa thoguo atĩrĩ, ‘Reke ngũrute kĩhuti kĩu kĩrĩ riitho rĩaku,’ o rĩrĩa wee mwene ũrĩ na mũgogo riitho rĩaku?

Wee hinga ĩno, amba ũrute mũgogo ũcio ũrĩ riitho rĩaku, nĩguo wone wega na ũhote kũruta kĩhuti kĩrĩa kĩrĩ riitho rĩa mũrũ wa thoguo.

“Mũtikanahe magui kĩndũ kĩrĩa kĩamũre, na mũtikanaikĩrie ngũrũe ruru cianyu. Mũngĩĩka ũguo-rĩ, ingĩrangĩrĩria ruru na magũrũ ma cio, icoke imũgarũrũke, imũtiihangie.

“Hoyai na nĩ mũkũheo; mathai na nĩ mũkuona; ringaringai mũrango na nĩ mũkũhingũrĩrwo.

Nĩgũkorwo ũrĩa wothe ũhoyaga nĩ aheagwo, na ũrĩa ũmathaga nĩ onaga, na ũrĩa ũringaringaga mũrango, nĩ ahingũragĩrwo.

“Na rĩrĩ, nũũ wanyu ũngĩĩtio mũgate nĩ mwana wake amũhe ihiga?

Kana amwĩtie thamaki nake amũhe nyoka?

Angĩkorwo inyuĩ, o na mũrĩ ooru, nĩ mũũĩ kũhe ciana cianyu iheo njega-rĩ, githĩ Ithe wanyu ũrĩa ũrĩ igũrũ ndagakĩrĩrĩria kũhe iheo njega kũrĩ arĩa mamũhoyaga

Nĩ ũndũ ũcio, maũndũ-inĩ mothe, ĩkagai andũ arĩa angĩ ũrĩa mũngĩenda mamwĩkage, nĩgũkorwo ũcio nĩguo Watho wa Musa na Ũrutani wa Anabii.

“Tonyerai mũromo ũrĩa mũceke. Nĩgũkorwo mũromo nĩ mwariĩ na njĩra nĩ njariĩ ĩrĩa yerekeire rĩũrĩro, na andũ arĩa matonyagĩra ho nĩ aingĩ.

No mũromo nĩ mũkunderu na njĩra nĩ njeke ĩrĩa ĩkinyaga muoyo-inĩ, na andũ arĩa mamĩonaga nĩ anyinyi.

“Mwĩhũgagei anabii a maheeni. Mokaga kũrĩ inyuĩ mehumbĩte njũa cia ngʼondu, no thĩinĩ wao nĩ njũi ndĩani.

Nĩ mũrĩmamenyaga na maciaro mao. Kaĩ thabibũ igĩtuagwo mĩtĩ-inĩ ya mĩigua, kana ngũyũ igatuo kuuma mahiũ-inĩ ma nyeki?

Ũguo noguo, mũtĩ wothe mwega ũciaraga maciaro mega, no mũtĩ mũru ũciaraga maciaro moru.

Mũtĩ mwega ndũngĩciara maciaro moru, naguo mũtĩ mũru ndũngĩciara maciaro mega.

Mũtĩ o wothe ũtaciaraga maciaro mega nĩ gũtemwo ũtemagwo ũgaikio mwaki-inĩ.

Ũguo nĩguo mũrĩmamenyaga nĩ ũndũ wa maciaro mao.

“To mũndũ ũrĩa ũnjĩtaga, ‘Mwathi, Mwathi,’ ũgatonya ũthamaki wa igũrũ, no nĩ ũrĩa wĩkaga ũrĩa Baba ũrĩa ũrĩ igũrũ endaga.

Mũthenya ũcio aingĩ makanjĩra atĩrĩ, ‘Mwathi, Mwathi, githĩ tũtiarathaga maũndũ na rĩĩtwa rĩaku, na thĩinĩ wa rĩĩtwa rĩaku tũkaingata ndaimono na tũkaringa ciama nyingĩ?

Hĩndĩ ĩyo nĩ ngameera wega atĩrĩ, ‘Niĩ ndirĩ hĩndĩ ndamũũĩ o na rĩ. Eherai harĩ niĩ, inyuĩ mwĩkaga ũũru!

“Nĩ ũndũ ũcio-rĩ, mũndũ o wothe ũiguaga ciugo ici ciakwa na ageka ũrĩa ciugĩte, ahaana ta mũndũ mũũgĩ ũrĩa wakire nyũmba yake igũrũ rĩa rwaro rwa ihiga.

Nayo mbura ĩkiura, na njũũĩ ikĩiyũra, naruo rũhuho rũkĩhurutana nacio ikĩhũũra nyũmba ĩyo na nditi, no nyũmba ĩyo ndĩagũire, tondũ mũthingi wayo wakĩtwo igũrũ rĩa rwaro rwa ihiga.

No mũndũ o wothe ũiguaga ciugo ici ciakwa na ndekaga ũrĩa ciugĩte ahaana ta mũndũ mũkĩĩgu ũrĩa wakire nyũmba yake mũthanga igũrũ.

Nayo mbura ĩkiura, njũũĩ ikĩiyũra, naruo rũhuho rũkĩhurutana nacio ikĩhũũra nyũmba ĩyo na nditi, nayo nyũmba ĩyo ĩkĩmomoka na kũgũa kũnene.”

Rĩrĩa Yahshua aarĩkirie kuuga maũndũ macio, kĩrĩndĩ kĩu gĩkĩgega nĩ ũndũ wa ũrutani wake,

tondũ aarutanaga ta mũndũ warĩ na ũhoti, na ti ta ũrĩa arutani ao a watho maarutanaga.