Maũndũ ma Alawii 1

Na Yahweh agĩta Musa na akĩmwarĩria kuuma hema-inĩ ya gũtũnganwo, akĩmwĩra:

“Aria na ciana cia Isiraeli ũmeere ũũ, ‘Mũndũ o wothe angĩkorũo nĩ ekũrutĩra Yahweh igongona kuuma harĩ nyamũ cia mũciĩ, agĩrĩirũo kũruta igongona rĩake kuuma rũũru-inĩ rwa ng’ombe kana rũũru-inĩ rwa mbũri kana ng’ondu.

“‘Angĩkorũo ekũruta igongona rĩa njino kuuma rũũru-inĩ rwa ng’ombe, agĩrĩirũo kũruta nyamũ ya njamba ĩtarĩ na kaũgũ. Agĩrĩirũo kũmĩruta eyendeire mbere ya Yahweh mũromo-inĩ wa hema ya gũtũnganwo

Abatiĩ kũigĩrĩra guoko gwake mũtwe-inĩ wa nyamũ ĩyo ya igongona rĩa njino, na nĩ rĩgwĩtĩkĩrũo nĩ ũndũ wake rĩrĩ rĩa kũhumbĩra mehia make.

“‘Thutha ũcio no mũhaka gategwa kau gathĩnjĩrũo mbere ya Yahweh, nao athĩnjĩri-Yahweh ariũ a Haruni, matware thakame na mamĩminjaminjie mĩena yothe ya kĩgongona, kĩrĩa kĩrĩ mũromo-inĩ wa hema ya gũtũnganwo

Igongona rĩu rĩa njino rĩagĩrĩire kũrutwo rũũa na rĩtinangio icunjĩ

Nao athĩnjĩri-Yahweh ariũ a Haruni, maakie mwaki kĩgongona-inĩ na mabange ngũ mwaki-inĩ ũcio

athĩnjĩri-Yahweh ariũ a Haruni, mabange icunjĩ icio cia igongona, maigĩrĩre mũtwe na maguta igũrũ rĩa ngũ iria irĩ mwaki-inĩ ũrĩa ũrĩ kĩgongona-inĩ

Namo mara mayo na matharigo mayo mathambio na maĩ, nake mũthĩnjĩri-Yahweh acicinĩre ciothe kĩgongona-inĩ irute ndogo irĩ igongona rĩa njino, rĩu nĩ igongona rĩa gũcinwo na mwaki rĩa mũtararĩko mwega harĩ Yahweh.

“‘Angĩkorũo ekũruta igongona rĩa njino kuuma rũũru-inĩ rwa mbũri na ng’ondu, kuuma harĩ tũtũrũme kana harĩ mbũri, agĩrĩirũo kũruta nyamũ ya njamba ĩtarĩ na kaũgũ

Yagĩrĩirũo gũthĩnjĩrũo mwena wa rũgongo wa kĩgongona mbere ya Yahweh, nao athĩnjĩri-Yahweh ariũ a Haruni, maminjaminjie thakame yayo mĩena yothe ya kĩgongona

Agĩrĩirũo gũtinangia nyamũ ĩyo ya igongona icunjĩ, nake mũthĩnjĩri-Yahweh abange mũtwe na maguta mayo igũrũ rĩa ngũ iria irĩ mwaki-inĩ ũrĩa ũrĩ kĩgongona-inĩ

Agĩrĩirũo gũthambia mara mayo na matharigo mayo na maĩ, nake mũthĩnjĩri-Yahweh agaciruta ciothe irĩ igongona na njĩra ya gũcicinĩra kĩgongona-inĩ irute ndogo. Rĩu nĩ igongona rĩa gũcinwo na mwaki rĩa mũtararĩko mwega harĩ Yahweh.

“‘No rĩrĩ, angĩkorũo ekũruta nyoni irĩ ta igongona rĩa njino harĩ Yahweh, abatiĩ kũruta ndutura kana njui cia ndirahũgĩ

Mũthĩnjĩri-Yahweh agĩrĩirũo kũmĩtwara kĩgongona-inĩ na akonore mũtwe wayo na amĩcinĩre kĩgongona-inĩ ĩrute ndogo, no thakame yayo yagĩrĩire gũitwo mwena-inĩ wa kĩgongona

Agĩrĩirũo nĩ kũruta kabutu kayo na maguoya mayo na acite hakuhĩ na kĩgongona, mwena wa irathĩro, harĩa mũhu ũkoragwo

Agĩrĩirũo kũmĩatũra mathagu-inĩ mayo atekũmĩgayania icunjĩ igĩrĩ. Nake mũthĩnjĩri-Yahweh amĩcinĩre kĩgongona-inĩ ĩrute ndogo igũrũ rĩa ngũ iria irĩ mwaki-inĩ. Rĩu nĩ igongona rĩa gũcinwo na mwaki rĩa mũtararĩko mwega harĩ Yahweh.