Maũndũ ma Alawii 2
“‘Angĩkorũo mũndũ ekũrutĩra Yahweh igongona rĩa mũtu, igongona rĩu rĩagĩrĩire gũkorũo rĩrĩ rĩa mũtu mũhinyu, na akarĩitĩrĩria maguta na akaigĩrĩra ũbani igũrũ rĩarĩo
Agacoka akarĩtwara kũrĩ athĩnjĩri-Yahweh ariũ a Haruni, nake mũthĩnjĩri-Yahweh akarũma ngundi ya mũtu ũcio mũhinyu hamwe na maguta na ũbani waguo wothe, akaũcinĩra kĩgongona-inĩ ũrĩ gacunjĩ kanini ka igongona rĩu ũrute ndogo, igongona rĩa gũcinwo na mwaki rĩa mũtararĩko mwega harĩ Yahweh
Na kĩrĩa kĩrĩtigaraga kĩa igongona rĩu rĩa mũtu kĩrĩkoragwo kĩrĩ kĩa Haruni na ariũ ake, kĩrĩ kĩndũ kĩamũre mũno kuuma harĩ magongona ma Yahweh ma gũcinwo na mwaki.
“‘Angĩkorũo ũkũruta igongona rĩa mũtu rĩrugĩirũo riiko-inĩ rĩa keki, rĩagĩrĩire gũkorũo rĩrĩ rĩa mũtu mũhinyu, mĩgate itarĩ mĩkĩre ndawa ya kũimbia ĩtukanĩtio na maguta kana tũmĩgate tũceke tũtekĩrĩtwo ndawa ya kũimbia tũhakĩtwo maguta.
“‘Angĩkorũo ũkũruta igongona rĩa mũtu rĩrugĩirũo rũgĩo-inĩ, rĩagĩrĩire gũkorũo rĩrĩ rĩa mũtu mũhinyu, ũtarĩ mwĩkĩre ndawa ya kũimbia ũtukanĩtio na maguta
Wagĩrĩire kwenyũrangwo icunjĩ, na ũitĩrĩrie maguta igũrũ rĩa guo. Rĩu nĩ igongona rĩa mũtu.
“‘Angĩkorũo ũkũruta igongona rĩa mũtu rĩrugĩirũo nyũngũ-inĩ, rĩagĩrĩire gũthondekwo na mũtu mũhinyu na maguta
Wagĩrĩirũo gũtwara igongona rĩu rĩa mũtu rĩthondeketwo na indo icio kũrĩ Yahweh, na rĩrĩneagwo mũthĩnjĩri-Yahweh, nake akarĩtwara hakuhĩ na kĩgongona
Mũthĩnjĩri-Yahweh arĩoyaga mũtu ũigana ũna wa igongona rĩu ũrĩ gacunjĩ kanini ka igongona, akaũcinĩra kĩgongona-inĩ ũrute ndogo ũrĩ igongona rĩa gũcinwo na mwaki rĩa mũtararĩko mwega harĩ Yahweh
Kĩrĩa kĩrĩtigaraga kĩa igongona rĩu rĩa mũtu kĩrĩkoragwo kĩrĩ kĩa Haruni na ariũ ake, kĩrĩ kĩndũ kĩamũre mũno kuuma harĩ magongona ma Yahweh ma gũcinwo na mwaki.
“‘Igongona o rĩothe rĩa mũtu rĩrĩa ũkũrutĩra Yahweh rĩtiagĩrĩire gũkorũo rĩkĩrĩtwo ndawa ya kũimbia, tondũ ndwagĩrĩirũo gũcina mũtu mwĩkĩre ndawa ya kũimbia kana ũũkĩ irĩ igongona rĩa gũcinwo na mwaki harĩ Yahweh.
“‘Indo icio no ũcirutĩre Yahweh irĩ igongona rĩa maciaro ma mbere, no citiagĩrĩire gũtwarũo kĩgongona-inĩ irĩ ta mũtararĩko mwega.
“‘Igongona o rĩothe rĩa mũtu ũkũruta rĩagĩrĩire gũkorũo rĩkĩrĩtwo cumbĩ; ndũkanareke cumbĩ wa kĩrĩkanĩro gĩa Kĩhoti waku wage igongona-inĩ rĩaku rĩa mũtu. Igongona rĩothe rĩaku ũrĩrĩrutaga hamwe na cumbĩ.
“‘Angĩkorũo ũkũrutĩra Yahweh igongona rĩa mũtu rĩa maciaro ma mbere, wagĩrĩirũo kũruta ngano ya mũgethano ĩcinĩtwo na mwaki, ĩgathĩo ĩtegũkonyorũo, rĩrĩ igongona rĩa maciaro maku ma mbere
Wagĩrĩirũo kũrĩitĩrĩria maguta igũrũ na ũigĩrĩre ũbani igũrũ rĩarĩo. Rĩu nĩ igongona rĩa mũtu
Mũthĩnjĩri-Yahweh arĩcinaga gacunjĩ kanini ka igongona rĩu, ũguo nĩ kuuga arĩcinaga mũtu ũigana ũna ũtarĩ mũkonyore na maguta hamwe na ũbani warĩo wothe, rĩrĩ igongona rĩa gũcinwo na mwaki harĩ Yahweh.