Maũndũ ma Alawii 3

“‘Angĩkorũo igongona rĩake nĩ rĩa ũiguano na angĩkorũo ekũrĩruta kuuma rũũru-inĩ rwake rwa ng’ombe, rĩrĩ rĩa njamba kana rĩa mũgoma, agĩrĩirũo kũrutĩra Yahweh nyamũ ĩtarĩ na kaũgũ

Agĩrĩirũo kũigĩrĩra guoko gwake mũtwe-inĩ wa nyamũ ĩyo ya igongona rĩake, na ĩgathĩnjĩrũo mũromo-inĩ wa hema ya gũtũnganwo; nao athĩnjĩri-Yahweh ariũ a Haruni, maminjaminje thakame ĩyo mĩena yothe ya kĩgongona kĩu

Arĩrutaga gĩcunjĩ kĩa igongona rĩu rĩa ũiguano kĩrĩ ta igongona rĩa gũcinwo na mwaki harĩ Yahweh: maguta marĩa mahumbĩrĩte mara, maguta mothe marĩa mathiũrũrũkĩirie mara,

na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio

Nao ariũ a Haruni makarĩcinĩra kĩgongona-inĩ rĩrute ndogo igũrũ rĩa igongona rĩa njino rĩrĩa rĩigĩrĩirũo ngũ-inĩ iria irĩ igũrũ rĩa mwaki; rĩu nĩ igongona rĩa gũcinwo na mwaki rĩa mũtararĩko mwega harĩ Yahweh.

“‘Angĩkorũo ekũrutĩra Yahweh igongona rĩa ũiguano kuuma rũũru-inĩ rwa mbũri kana rwa ng’ondu, agĩrĩirũo kũruta nyamũ ya njamba kana ya mũgoma ĩtarĩ na kaũgũ

Angĩkorũo ekũruta gatũrũme karĩ igongona rĩake, abatiĩ gũgatwara mbere ya Yahweh

Agĩrĩirũo kũigĩrĩra guoko gwake mũtwe-inĩ wa nyamũ ĩyo ya igongona rĩake, na ĩthĩnjĩrũo mbere ya hema ya gũtũnganwo. Nao ariũ a Haruni maminjaminje thakame yayo mĩena yothe ya kĩgongona

Arĩrutaga maguta ma igongona rĩa ũiguano marĩ ta igongona rĩa gũcinwo na mwaki harĩ Yahweh. Arĩrutaga mũting’oe wothe na maguta maguo hakuhĩ na ihĩndĩ rĩa mũgongo, maguta marĩa mahumbĩrĩte mara, maguta mothe marĩa mathiũrũrũkĩirie mara,

na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio

Nake mũthĩnjĩri-Yahweh akarĩcinĩra kĩgongona-inĩ rĩrute ndogo rĩrĩ ta irio, rĩu nĩ igongona rĩa gũcinwo na mwaki harĩ Yahweh.

“‘Angĩkorũo ekũruta mbũri ĩrĩ igongona rĩake, abatiĩ kũmĩtwara mbere ya Yahweh

Agĩrĩirũo kũigĩrĩra guoko gwake mũtwe-inĩ wayo, na ĩthĩnjĩrũo mbere ya hema ya gũtũnganwo, nao ariũ a Haruni maminjaminje thakame yayo mĩena yothe ya kĩgongona kĩu

Gĩcunjĩ kĩrĩa ekũruta kĩrĩ ta igongona rĩake rĩa gũcinwo na mwaki harĩ Yahweh nĩ maguta marĩa mahumbĩrĩte mara, maguta mothe marĩa mathiũrũrũkĩirie mara,

na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio.

Nake mũthĩnjĩri-Yahweh agacicinĩra kĩgongona-inĩ irute ndogo irĩ ta irio, igatuĩka igongona rĩa gũcinwo na mwaki rĩa mũtararĩko mwega. Maguta mothe nĩ ma Yahweh.

“‘Ũyũ nĩ watho wa gũtũũra ũrũmagĩrĩrũo njiarũa-inĩ cianyu ciothe, ciikaro-inĩ cianyu ciothe: Mũtiagĩrĩirũo kũrĩa maguta o mothe kana thakame o yothe o na hanini.’”