Maũndũ ma Alawii 10

Thutha ũcio ariũ a Haruni, nĩo Nadabu na Abihu makĩoya o mũndũ rũgĩo rwake rwa mwaki na magĩciĩkĩra mwaki na makĩigĩrĩra ũbumba igũrũ rĩacio. Magĩcoka magĩtwara mbere ya Yahweh mwaki ũtetĩkĩrĩtio, ũndũ ũrĩa ataamathĩte meke

Nĩ ũndũ ũcio mwaki ũkiuma mbere ya Yahweh na ũkĩmacina, magĩkuĩra hau mbere ya Yahweh

Nake Musa akĩra Haruni atĩrĩ: “Ũũ nĩguo Yahweh oigĩte, ‘Nĩ ngũtuwo mwamũre gatagatĩ-inĩ ka arĩa marĩ hakuhĩ na niĩ, na nĩ ngũgoocwo mbere ya andũ othe.’” No Haruni agĩkira ki.

Kwoguo Musa agĩta Mishaeli na Elizafani, ariũ a Uzieli ithe mũnini wa Haruni, akĩmeera: “Ũkai haha, mũkuue ariũ a ithe wanyu mũmarute mbere ya harĩa hamũre mũmatware handũ nja ya kambĩ.”

Magĩgĩkuhĩrĩria na magĩkuua andũ acio marĩ o na kanjũ ciao makĩmatwara handũ nja ya kambĩ, o ta ũrĩa Musa aameerire.

Musa agĩcoka akĩra Haruni na ariũ acio angĩ ake Eliazaru na Ithamaru ũũ: “Mũtikareke njuĩrĩ cia mĩtwe yanyu ciikare itarĩ thondeke o na kana mũtembũre nguo cianyu, nĩguo mũtigakue na nĩgetha Yahweh ndakarakarĩre kĩrĩndĩ gĩothe. Ariũ a ithe wanyu a nyũmba yothe ya Isiraeli nĩ mekũrĩrĩra andũ acio Yahweh oragĩte na mwaki

Mũtiagĩrĩirũo gũthiĩ nja ya mũromo wa hema ya gũtũnganwo, kwaga ũguo nĩ mũgũkua, nĩ gũkorũo maguta ma gũitanĩrĩrio ma Yahweh marĩ igũrũ rĩanyu.” Nĩ ũndũ ũcio magĩka kũringana na uuge wa Musa.

Yahweh agĩcoka akĩra Haruni ũũ:

“Ndũkananyue ndibei o na kana kĩndũ kĩngĩ kĩngĩtũma mũndũ arĩĩo, wee o hamwe na ariũ aku arĩa mũrĩ nao, rĩrĩa mũgũtonya hema-inĩ ya gũtũnganwo, nĩguo mũtigakue. Ũcio nĩ watho wa gũtũũra njiarũa-inĩ cianyu ciothe

Nĩgetha gũkagĩaga na ngũrani ya kĩndũ kĩrĩa kĩamũre na kĩrĩa gĩtarĩ kĩamũre na ngũrani ya kĩndũ kĩrĩ na thahu na gĩtarĩ na thahu,

na nĩ ũndũ wa kũruta ciana cia Isiraeli mawatho marĩa mothe Yahweh arĩtie kũgerera Musa.”

Musa agĩcoka akĩaria na Haruni na ariũ ake acio maatigarire, Eliazaru na Ithamaru, akĩmeera: “Oyai kĩrĩa gĩtigarĩte harĩ igongona rĩa mũtu kuuma magongona-inĩ ma Yahweh ma gũcinwo na mwaki na mũkĩrĩe kĩrĩ mũgate ũtarĩ mwĩkĩre ndawa ya kũimbia mũrĩ hakuhĩ na kĩgongona, nĩ gũkorũo kĩu nĩ kĩndũ kĩamũre mũno

Mwagĩrĩirũo gũkĩrĩĩra handũ hamũre, tondũ rĩu nĩ igai rĩaku na igai rĩa ariũ aku kuuma magongona-inĩ ma Yahweh ma gũcinwo na mwaki, nĩ gũkorũo ũguo nĩguo njathĩtwo

Ningĩ nĩ mwagĩrĩirũo kũrĩa gĩthũri kĩa igongona rĩa gũcũgio, na kũgũrũ kwa igai rĩamũre mũrĩ handũ hamũre, wee o hamwe na ariũ aku na aarĩ aku arĩa ũrĩ nao, tondũ nĩ ũheetwo indo icio irĩ igai rĩaku na igai rĩa ariũ aku kuuma harĩ magongona ma ũiguano ma Aisiraeli

Marĩrehaga kũgũrũ kwa igai rĩamũre na gĩthũri kĩa igongona rĩa gũcũgio hamwe na magongona ma gũcinwo na mwaki ma maguta, nĩguo macũgie igongona rĩa gũcũgio mbere na thutha mbere ya Yahweh; tondũ nĩ rĩgũtuĩka igai rĩa gũtũũra harĩ wee na harĩ ariũ aku arĩa ũrĩ nao, o ta ũrĩa Yahweh athanĩte.”

Na rĩrĩ, Musa agĩcaria na kĩyo mbũri ya igongona rĩa mehia, na akĩmenya atĩ nĩ gũcinwo yacinĩtwo. Kwoguo akĩrakarĩra Eliazaru na Ithamaru, ariũ a Haruni arĩa maatigarĩte, na akiuga:

“Mwagire kũrĩa nyamũ ya igongona rĩa mehia mũrĩ handũ hamũre nĩkĩ, na kĩu nĩ kĩndũ kĩamũre mũno na amũheete nĩgetha mũũragio mehia ma kĩrĩndĩ na mũgakĩrutagĩra igongona rĩa kũhumbĩra mehia mbere ya Yahweh

Atĩrĩrĩ, thakame yayo ndĩtwarĩtwo thĩinĩ wa harĩa hamũre. Nĩ mũkwagĩrĩirũo kũrĩa nyamũ ĩyo mũrĩ handũ hamũre, o ta ũrĩa njathĩtwo.”

Haruni agĩcokeria Musa ũũ: “Atĩrĩrĩ, ũmũthĩ marutire igongona rĩao rĩa mehia na igongona rĩao rĩa njino mbere ya Yahweh, na maũndũ maya macoka mangora. Korũo nĩ ndĩire nyamũ ya igongona rĩa mehia ũmũthĩ-rĩ, hihi ũndũ ũcio nĩ ũngĩkenirie Yahweh?”

Rĩrĩa Musa aaiguire ũguo, akĩiganĩra.