Maũndũ ma Alawii 19
Yahweh agĩthiĩ na mbere kwaria na Musa, akĩmwĩra ũũ:
“Aria na kĩrĩndĩ gĩothe kĩa Isiraeli na ũkĩre atĩrĩ, ‘Mwagĩrĩirũo gũkorũo mũrĩ amũre, tondũ niĩ, Yahweh Kĩhoti wanyu, ndĩ mwamũre.
“‘O mũndũ gatagatĩ-inĩ kanyu nĩ agĩrĩirũo gũtĩa nyina na ithe, na nĩ mwagĩrĩirũo kũrũmagia thabatũ ciakwa. Niĩ nĩ niĩ Yahweh Kĩhoti wanyu
Mũtikagarũrũkĩre ihoti itarĩ kĩene kana mwĩthondekere ihoti kuumana na cuma ndwekie. Niĩ nĩ niĩ Yahweh Kĩhoti wanyu.
“‘Na rĩrĩ, mũngĩkorũo mũkĩruta igongona rĩa ũiguano kũrĩ Yahweh, mwagĩrĩirũo kũrĩruta na njĩra ĩgũtũma mwĩtĩkĩrĩke
Rĩagĩrĩire kũrĩo mũthenya ũcio mwaruta igongona rĩu na mũthenya ũrĩa ũkũrũmĩrĩra, no kĩrĩa gĩatigara gũkinyĩria mũthenya wa gatatũ kĩagĩrĩire gũcinwo na mwaki
No rĩrĩ, kĩndũ o na kĩrĩkũ kĩa rĩo kĩngĩrĩo mũthenya wa gatatũ, ũcio nĩ ũndũ mũũru ũtangĩtĩkĩrĩka
Ũrĩa ũngĩrĩa kĩndũ kĩu nĩ akoorio nĩ ũndũ wa ihĩtia rĩu rĩake tondũ nĩ athahĩtie kĩndũ kĩamũre kĩa Yahweh, na mũndũ ũcio no mũhaka eherio gatagatĩ-inĩ ka andũ ao.
“‘Mũkĩgetha maciaro ma bũrũri wanyu, ndũkanagethe rũteere-inĩ rwa mũgũnda waku ũhinyĩtie na ndũkanonganie matigari ma magetha maku
Ningĩ, ndũkanahaare matigari ma mũgũnda waku wa mĩthabibũ kana ũnganie thabibũ iria citĩkangĩte mũgũnda-inĩ waku wa mĩthabibũ. Wagĩrĩirũo gũtigĩra mũndũ ũrĩa mũthĩni na mũndũ wa kũngĩ ũrĩa ũikaranagia na inyuĩ. Niĩ nĩ niĩ Yahweh Kĩhoti wanyu.
“‘Mũtikanaiye, mũtikanaheenanie, na mũtikanahiũranie mũndũ na ũrĩa ũngĩ na njĩra ya wara
Ndũkanehĩte na ũndũ wa maheeni na rĩĩtwa rĩakwa nĩ ũndũ ũcio ũthahie rĩĩtwa rĩa Kĩhoti waku. Niĩ nĩ niĩ Yahweh
Ndũkanakungie wara woe kĩndũ kĩa mũndũ ũrĩa ũngĩ, na ndũkanatunyane. Ndwagĩrĩirũo gũikaria mũcara wa mũruti wĩra ũtukũ wothe nginya rũcinĩ.
“‘Ndũkanarume mũndũ ũtaiguaga kana ũigĩre mũtumumu kĩndũ gĩa kũmũhĩnga, na no mũhaka wĩtigĩre Kĩhoti waku. Niĩ nĩ niĩ Yahweh.
“‘No mũhaka mũtuage ciira wanyu na kĩhooto. Ndũkanathutũkanie mũndũ ũrĩa mũthĩni kana ũkorũo na kĩmenyano harĩ mũndũ ũrĩa mũtongu. Wagĩrĩirũo gũtuĩra mũndũ ũrĩa ũngĩ na kĩhooto.
“‘Ndũkanathiĩ ũgĩtheremagia njambanio kũrĩ andũ anyu. Ndũkanaingĩrie muoyo wa mũndũ ũrĩa ũngĩ ũgwati-inĩ. Niĩ nĩ niĩ Yahweh.
“‘Ndũkanamene mũrũ wa thoguo ngoro-inĩ yaku. Nĩ wagĩrĩirũo ũtigagĩrĩre atĩ nĩ warũnga mũndũ ũrĩa ũngĩ, nĩgetha ndũkanyitanĩre nake mehia-inĩ.
“‘Ndũkanerĩhĩrie kana ũigĩre ariũ a andũ anyu muku, na no mũhaka wende mũndũ ũrĩa ũngĩ o ta ũrĩa wĩyendete wee mwene. Niĩ nĩ niĩ Yahweh.
“‘Mwagĩrĩirũo kũrũmagia maathani makwa: Ndũkanaciarithanie nyamũ ciaku cia mũciĩ cia mĩthemba ĩĩrĩ. Ndũkanahande mũgũnda-inĩ waku mbegũ cia mĩthemba ĩĩrĩ, na ndũkanekĩre nguo ĩtumĩtwo na mĩthemba ĩĩrĩ ya ndigi itukanĩtio hamwe.
“‘Na rĩrĩ, mũndũrũme angĩkoma na mũtumia, na mũtumia ũcio akorũo arĩ ndungata ĩĩrĩirũo mũndũrũme ũngĩ, na mũtumia ũcio ndakũũrĩtwo kana akaheo wĩyathi, nĩ hagĩrĩire gũkorũo na ihera. O na kũrĩ ũguo matiagĩrĩirũo kũũragwo, nĩ gũkorũo mũtumia ũcio ndarekereirio
Mũndũrũme ũcio agĩrĩirũo kũrehe igongona rĩake rĩa mahĩtia kũrĩ Yahweh mũromo-inĩ wa hema ya gũtũnganwo, ndũrũme ya igongona rĩa mahĩtia
Nake mũthĩnjĩri-Yahweh akaruta igongona rĩa kũhumbĩra mehia ma mũndũ ũcio akĩhũthĩra ndũrũme ya igongona rĩa mahĩtia mbere ya Yahweh nĩ ũndũ wa mehia marĩa ekĩte, nake akoherũo nĩ ũndũ wa mehia macio ekĩte.
“‘Rĩrĩa mũkaaingĩra bũrũri ũcio na mũhande mũtĩ o wothe wa irio, mwagĩrĩirũo kuona maciaro maguo marĩ na thahu na matetĩkĩrĩtio. Mĩaka ĩtatũ marĩkoragwo matetĩkĩrĩtio harĩ inyuĩ. Matiagĩrĩire kũrĩo
No mwaka-inĩ wa kana, maciaro maguo mothe marĩkoragwo marĩ matheru ma gũkenerũo mbere ya Yahweh
Naguo mwaka-inĩ wa gatano, no mũrĩe matunda maguo nĩguo muongerere maciaro maguo magetha-inĩ manyu. Niĩ nĩ niĩ Yahweh Kĩhoti wanyu.
“‘Mũtikanarĩe kĩndũ o na kĩ kĩrĩ na thakame. “‘Mũtikanacarie imenyithia cia ũragũri kana mwĩke maũndũ ma ũgo.
“‘Mũtikanenje njuĩrĩ cia mwena-inĩ wa mĩtwe yanyu kana gũthũkia mĩthia ya nderu cianyu.
“‘Mũtikanetemange mĩĩrĩ-inĩ yanyu nĩ ũndũ wa muoyo, na mũtikaneĩkĩre marũũri mĩĩrĩ-inĩ yanyu. Niĩ nĩ niĩ Yahweh.
“‘Ndũkananyararithie mwarĩguo na njĩra ya kũmũtua mũmaraya, nĩguo bũrũri ndũkahũũre ũmaraya na ũiyũre mĩtugo mĩũru.
“‘No mũhaka mũrũmagie thabatũ ciakwa, na no mũhaka mwĩtigagĩre handũ hakwa harĩa hamũre. Niĩ nĩ niĩ Yahweh.
“‘Mũtikanathiĩ kũrĩ andũ arĩa maragia na maroho, na mũtikanacarie ũhoro kũrĩ arĩa marathaga mohoro nĩguo mũtikanethahie nao. Niĩ nĩ niĩ Yahweh Kĩhoti wanyu.
“‘Nĩ wagĩrĩirũo kũrũgamaga mbere ya njuĩrĩ ĩrĩ na mbuĩ, na no mũhaka wonagie mũndũ mũkũrũ gĩtĩo, na no mũhaka wĩtigagĩre Kĩhoti waku. Niĩ nĩ niĩ Yahweh.
“‘Mũngĩgatũũrania na mũndũ wa kũngĩ bũrũri-inĩ wanyu, mũtikanamũhinyĩrĩrie
Mũgeni ũrĩa ũikaranagia na inyuĩ agĩrĩirũo gũtuĩka o ta mũndũ ũciarĩirũo bũrũri-inĩ wanyu, na no mũhaka mũmwendage o ta ũrĩa mwĩyendete, nĩ gũkorũo o na inyuĩ mwatũire mũrĩ ageni bũrũri-inĩ wa Misiri. Niĩ nĩ niĩ Yahweh Kĩhoti wanyu.
“‘Mũtikanahũthĩre ithimi itarĩ cia kĩhooto mũgĩthima ũraihu, ũritũ, kana ũingĩ
Mwagĩrĩirũo kũhũthagĩra ratiri iria ciagĩrĩire cia gũthima, ithimi iria ciagĩrĩire cia ũritũ, ithimi iria ciagĩrĩire cia indo nyũmũ, na ithimi iria ciagĩrĩire cia indo iria itariĩ ta maĩ. Niĩ nĩ niĩ Yahweh Kĩhoti wanyu ũrĩa wamũrutire bũrũri wa Misiri
Kwoguo no mũhaka mũrũmagie mawatho makwa mothe na matuĩro makwa mothe ma ciira, na no mũhaka mũmarũmagĩrĩre. Niĩ nĩ niĩ Yahweh.’”