Maũndũ ma Alawii 7
Ũyũ nĩguo watho wa igongona rĩa mahĩtia: Kĩu nĩ kĩndũ kĩamũre mũno.
Magĩrĩirũo gũthĩnjagĩra igongona rĩa mahĩtia harĩa mathĩnjagĩra magongona ma njino, nayo thakame yarĩo ĩkaminjaminjwo mĩena yothe ya kĩgongona
Arĩrutaga maguta mothe ma rĩo marĩ igongona, hamwe na mũting’oe na maguta maguo, maguta marĩa mahumbĩrĩte mara,
na higo cierĩ irĩ na maguta ma cio marĩa marĩ hakuhĩ na njohero. Na ningĩ nĩ arĩrutaga maguta marĩa mahumbĩrĩte ini hamwe na higo icio
Nake mũthĩnjĩri-Yahweh agacicinĩra kĩgongona-inĩ irute ndogo irĩ igongona rĩa gũcinwo na mwaki harĩ Yahweh. Rĩu nĩ igongona rĩa mahĩtia
Mũndũrũme wothe gatagatĩ-inĩ ka athĩnjĩri-Yahweh nĩ arĩrĩaga igongona rĩu, na rĩagĩrĩire kũrĩĩrũo handũ hamũre. Kĩu nĩ kĩndũ kĩamũre mũno
Watho wĩgiĩ igongona rĩa mehia noguo ũrĩrũmagĩrĩrũo harĩ igongona rĩa mahĩtia; nyama cia nyamũ ya igongona rĩu irĩkoragwo irĩ cia mũthĩnjĩri-Yahweh ũrĩa wamĩruta ĩrĩ igongona rĩa kũhumbĩra mehia.
“‘Rĩrĩa mũthĩnjĩri-Yahweh aruta igongona rĩa njino nĩ ũndũ wa mũndũ o wothe, rũũa rwa nyamũ ĩyo ya igongona rĩa njino o ĩyo yaneanwo kũrĩ mũthĩnjĩri-Yahweh rũrĩtuĩkaga rwake.
“‘Igongona o rĩothe rĩa mũtu rĩrĩa rĩrĩrugagĩrũo riiko-inĩ rĩa keki kana rĩkarugĩrũo nyũngũ-inĩ kana rũgĩo-inĩ rĩrĩkoragwo rĩrĩ rĩa mũthĩnjĩri-Yahweh ũrĩa warĩruta. Rĩrĩtuĩkaga rĩake
No igongona o rĩothe rĩa mũtu mũtukanie na maguta kana mũtu mũũmũ rĩrĩkoragwo rĩrĩ rĩa ariũ othe a Haruni; o mũndũ arĩheagwo igai rĩiganaine na rĩa ũrĩa ũngĩ.
“‘Naguo ũyũ nĩguo watho wa igongona rĩa ũiguano rĩrĩa mũndũ angĩrutĩra Yahweh:
Angĩkorũo ekũrĩruta rĩrĩ rĩa gũcokia ngatho, agĩrĩirũo kũruta igongona rĩa gũcokia ngatho hamwe na mĩgate ĩtarĩ mĩkĩre ndawa ya kũimbia ĩtukanĩtio na maguta, tũmĩgate tũceke tũtekĩrĩtwo ndawa ya kũimbia tũhakĩtwo maguta, na mĩgate ĩrugĩtwo na mũtu mũhinyu, ũkimĩtwo wega na ũgatukanio na maguta
Arĩrutaga igongona rĩake hamwe na mĩgate mĩkĩre ndawa ya kũimbia na igongona rĩa gũcokia ngatho rĩa magongona make ma ũiguano
Arĩrutaga o kĩndũ kuuma harĩ indo icio cia igongona kĩrĩ kĩheo kĩamũre harĩ Yahweh; kĩrĩkoragwo kĩrĩ kĩa mũthĩnjĩri-Yahweh ũrĩa waminjaminja thakame ya magongona macio ma ũiguano
Nyama cia igongona rĩa gũcokia ngatho rĩa magongona make ma ũiguano irĩrĩagwo mũthenya o ro ũcio aruta igongona rĩu. Ndagĩrĩirũo kũiga nyama o na ĩmwe ĩkinyie rũcinĩ.
“‘Angĩkorũo ekũruta igongona rĩu rĩake rĩrĩ rĩa mwĩhĩtwa kana rĩrĩ igongona rĩa kwĩyendera, rĩagĩrĩire kũrĩo o ro mũthenya ũcio aruta igongona rĩake, na kĩrĩa gĩatigara kĩa igongona rĩu no kĩrĩo o na mũthenya ũrĩa ũrũmĩrĩire
Ĩndĩ nyama o yothe ya igongona rĩu ĩrĩa ĩgũtigara ĩkinyie mũthenya wa gatatũ yagĩrĩire gũcinwo na mwaki
No nyama o na ĩrĩkũ ya igongona rĩu rĩake rĩa ũiguano ĩngĩkaarĩo mũthenya wa gatatũ, ũcio ũrĩrutĩte ndagetĩkĩrĩka. Ndakoonwo ta arĩrutĩte; kĩu nĩ kĩndũ kĩrĩ magigi, na mũndũ ũrĩa ũngĩkorũo arĩte nyama ĩmwe ya icio nĩ akoorio ihĩtia rĩu rĩake
Nyama ĩrĩa yahutia kĩndũ o gĩothe kĩrĩ thahu ndĩagĩrĩire kũrĩo. Yagĩrĩire gũcinwo na mwaki. No mũndũ wothe ũtarĩ na thahu no arĩe nyama ĩtarĩ na thahu.
“‘No mũndũ o wothe ũrĩ na thahu angĩkaarĩa nyama ya igongona rĩa ũiguano, o rĩu rĩa Yahweh, mũndũ ũcio agĩrĩire kweherio gatagatĩ-inĩ ka andũ ao
Mũndũ angĩkaahutia kĩndũ o gĩothe kĩrĩ thahu, thahu wa mũndũ kana nyamũ ĩrĩ thahu, kana kĩndũ o gĩothe kĩrĩ na thahu na kĩrĩ magigi, na acoke arĩe nyama ya igongona rĩa ũiguano, o rĩu rĩa Yahweh, mũndũ ũcio agĩrĩire kweherio gatagatĩ-inĩ ka andũ ao.’”
Yahweh agĩgĩthiĩ na mbere kwaria na Musa akĩmwĩra atĩrĩ:
“Ĩra ciana cia Isiraeli ũũ, ‘Mũtikanarĩe maguta o mothe ma ndegwa kana ma gatũrũme kana ma mbũri
Maguta ma nyamũ yonetwo handũ ĩrĩ nguũ kana maguta ma nyamũ yũragĩtwo nĩ nyamũ ĩngĩ no mahũthĩrũo ũndũ-inĩ ũngĩ o wothe, no mũtikanamarĩe
Nĩ gũkorũo mũndũ o wothe angĩrĩa maguta ma nyamũ ĩrĩa araruta ĩrĩ igongona rĩa gũcinwo na mwaki harĩ Yahweh agĩrĩire kweherio gatagatĩ-inĩ ka andũ ao.
“‘Mũtikanarĩe thakame o na ĩrĩkũ kũndũ guothe kũrĩa mũikaraga, ĩkorũo ĩrĩ ya nyoni kana ya nyamũ
Mũndũ o wothe angĩrĩa thakame o na ĩrĩkũ agĩrĩire kweherio gatagatĩ-inĩ ka andũ ao.’”
Yahweh agĩcoka akĩarĩria Musa akĩmwĩra atĩrĩ:
“Ĩra ciana cia Isiraeli ũũ, ‘Mũndũ wothe ũkũruta igongona rĩake rĩa ũiguano harĩ Yahweh, gĩcunjĩ kĩmwe kĩa igongona rĩake rĩa ũiguano arĩkĩrehagĩra Yahweh
Arĩrehaga maguta o hamwe na gĩthũri acinyitĩte na moko make mwene irĩ igongona rĩa gũcinwo na mwaki harĩ Yahweh, na agacicũgia mbere na thutha irĩ igongona rĩa gũcũgio mbere ya Yahweh
Nake mũthĩnjĩri-Yahweh agacinĩra maguta macio kĩgongona-inĩ marute ndogo, no gĩthũri kĩrĩkoragwo kĩrĩ kĩa Haruni na ariũ ake.
“‘Mwagĩrĩirũo kũheaga mũthĩnjĩri-Yahweh kũgũrũ kwa ũrĩo kũrĩ igai rĩamũre kuuma harĩ magongona manyu ma ũiguano
Mũriũ wa Haruni ũrĩa waruta igongona na thakame ĩyo ya magongona ma ũiguano o hamwe na maguta nĩwe ũrĩheagwo kũgũrũ kwa ũrĩo kũrĩ igai rĩake
Nĩ gũkorũo nĩ njoete gĩthũri kĩa igongona rĩa gũcũgio na kũgũrũ kwa igai rĩamũre kuuma magongona-inĩ ma ũiguano ma Aisiraeli, na ngaciheana kũrĩ Haruni mũthĩnjĩri-Yahweh na ariũ ake ũrĩ watho wa gũtũũra ũrũmagĩrĩrũo nĩ Aisiraeli.
“‘Rĩu nĩrĩo rĩarĩ igai rĩa athĩnjĩri-Yahweh kuuma harĩ magongona ma Yahweh ma gũcinwo na mwaki, rĩa Haruni na ariũ ake, mũthenya ũrĩa aamamũrire matungatage marĩ athĩnjĩri-Yahweh harĩ Yahweh
Yahweh nĩ aathanire maheagwo igai rĩu kuuma kũrĩ ciana cia Isiraeli mũthenya ũrĩa aamaitĩrĩirie maguta. Ũcio nĩ watho wa gũtũũra njiarũa-inĩ ciao ciothe.’”
Ũcio nĩguo watho wĩgiĩ igongona rĩa njino, igongona rĩa mũtu, igongona rĩa mehia, igongona rĩa mahĩtia, igongona rĩa kwamũra, na igongona rĩa ũiguano,
o ta ũrĩa Yahweh aathire Musa arĩ Kĩrĩma-inĩ gĩa Sinai mũthenya ũrĩa aathire ciana cia Isiraeli marutage magongona mao harĩ Yahweh marĩ werũ-inĩ wa Sinai.