Maũndũ ma Alawii 6

Yahweh agĩcoka akĩra Musa atĩrĩ:

“Mũndũ angĩĩhia na age wĩhokeku harĩ Yahweh na njĩra ya kũheenia mũndũ ũrĩa ũngĩ ũndũ-inĩ ũkonainie na kĩndũ ehokeirũo, kana kĩndũ anengeretwo, kana akaiya kana agatunya mũndũ ũrĩa ũngĩ kĩndũ na njĩra ya wara,

kana akona kĩndũ kĩũrĩte na akaheenania ũhoro-inĩ wakĩo, na angĩĩhĩta na maheeni igũrũ rĩgiĩ rĩhia o rĩothe angĩkorũo ehĩtie harĩ mehia macio, ũũ nĩguo agĩrĩirũo nĩ gwĩka:

Angĩkorũo nĩ ehĩtie akereherera mahĩtia, no mũhaka acokie kĩrĩa aiyĩte, kĩrĩa atunyanĩte, kĩrĩa oete na njĩra ya wara, kĩrĩa eehokeirũo, kana kĩndũ kĩũrĩte agakĩona,

kana kĩndũ o gĩothe kĩrĩa eehĩtire na maheeni ũhoro-inĩ wakĩo, na no mũhaka arute mũigana wothe wakĩo akĩrĩhĩre, na ongerere gĩcunjĩ kĩmwe harĩ ithano gĩa thogora wakĩo. Agaacinengera mwene mũthenya ũrĩa agaatuĩrũo atĩ arĩ na mahĩtia

Ningĩ nĩ agĩrĩirũo kũrehera mũthĩnjĩri-Yahweh ndũrũme ĩtarĩ na kaũgũ kuuma rũũru-inĩ ĩrĩ igongona rĩake rĩa mahĩtia harĩ Yahweh kũringana na thogora ũrĩa ũgũtuwo, nĩ ũndũ wa igongona rĩa mahĩtia

Nake mũthĩnjĩri-Yahweh akaruta igongona rĩa kũhumbĩra mehia nĩ ũndũ wa mũndũ ũcio mbere ya Yahweh, na nĩ arĩohagĩrũo ũndũ o wothe angĩkorũo ekĩte ũgatũma akorũo na mahĩtia.”

Yahweh agĩthiĩ na mbere kwaria na Musa akĩmwĩra ũũ:

“Atha Haruni na ariũ ake ũmeere atĩrĩ, ‘Ũyũ nĩguo watho wa igongona rĩa njino: Igongona rĩa njino rĩrĩtigagwo igũrũ rĩa riiko rĩa kĩgongona ũtukũ wothe o nginya rũcinĩ, naguo mwaki ũrĩigagwo wakanĩte kĩgongona-inĩ

Mũthĩnjĩri-Yahweh arĩĩhumbaga nguo yake ya gatani ya ũthĩnjĩri-Yahweh, na agekĩra kĩnyatha gĩa gatani ahumbĩre mwĩrĩ wake. Agacoka akeheria mũhu wa igongona rĩa njino rĩrĩa mwaki ũcinĩte kĩgongona-inĩ na akaũiga mwena-inĩ wa kĩgongona

Arĩcokaga akaruta nguo icio ciake agekĩra nguo ingĩ na agatwara mũhu ũcio handũ hamũre nja ya kambĩ

Mwaki ũrĩigagwo wakanĩte kĩgongona-inĩ. Ndwagĩrĩire kũhora. Mũthĩnjĩri-Yahweh agĩrĩirũo gwĩkĩraga ngũ mwaki-inĩ ũcio o rũcinĩ nĩguo ciakane na akabanga igongona rĩa njino igũrũ rĩaguo, na agacinĩra maguta ma igongona rĩa ũiguano igũrũ rĩaguo marute ndogo

Mwaki ũrĩigagwo wakanĩte hingo ciothe kĩgongona-inĩ. Ndwagĩrĩire kũhora.

“‘Na rĩrĩ, ũyũ nĩguo watho wa igongona rĩa mũtu: Inyuĩ ariũ a Haruni mwagĩrĩirũo kũrutaga igongona rĩu mbere ya Yahweh o hau mbere ya kĩgongona

Ũmwe wao arĩrũmaga ngundi ya mũtu ũcio mũhinyu wa igongona rĩa mũtu na maguta mamwe maguo na ũbani wothe ũrĩa ũrĩ igũrũ rĩa igongona rĩu rĩa mũtu, na akaũcinĩra kĩgongona-inĩ ũrute ndogo ĩrĩ mũtararĩko mwega wa gacunjĩ kanini ka igongona rĩu harĩ Yahweh

Nao Haruni na ariũ ake makarĩa kĩrĩa gĩatigara harĩ igongona rĩu. Kĩrĩrĩagwo kĩrĩ mĩgate ĩtarĩ mĩkĩre ndawa ya kũimbia marĩ handũ hamũre. Marĩkĩrĩaga marĩ hau nja ya hema ya gũtũnganwo

Gĩtiagĩrĩire kũrugwo hamwe na kĩndũ o gĩothe kĩrĩ na ndawa ya kũimbia. Ndĩkĩheanĩte kĩrĩ igai rĩao kuuma kũrĩ magongona makwa ma gũcinwo na mwaki. Kĩu nĩ kĩndũ kĩamũre mũno, o ta igongona rĩa mehia na o ta igongona rĩa mahĩtia

Mũndũrũme wothe gatagatĩ-inĩ ka ariũ a Haruni nĩ arĩkĩrĩaga. Rĩu nĩ igai rĩao kuuma harĩ magongona ma Yahweh ma gũcinwo na mwaki, rĩa gũtũũra njiarũa-inĩ cianyu ciothe. Kĩndũ o gĩothe kĩrĩmahutagia kĩrĩtuĩkaga kĩamũre.’”

Yahweh akĩarĩria Musa o rĩngĩ akĩmwĩra:

“Rĩrĩ nĩrĩo igongona rĩrĩa Haruni na ariũ ake makaarutĩra Yahweh mũthenya ũrĩa agaaitĩrĩrio maguta: mũtu mũhinyu gĩcunjĩ kĩmwe harĩ ikũmi kĩa eba ũrĩ igongona rĩa mũtu rĩa kũrutagwo hingo ciothe, nuthu yaguo ĩkarutwo rũcinĩ na nuthu ĩyo ĩngĩ hwaĩ-inĩ

Wagĩrĩire gũkaarugwo hamwe na maguta rũgĩo-inĩ. Ũkaaũrehe ũrĩ mũtukanie wega na maguta na ũũrute ũrĩ mwenyũrange ũrĩ kĩndũ kĩruge kĩa igongona rĩa mũtu ũtuĩke mũtararĩko mwega harĩ Yahweh

Mũthĩnjĩri-Yahweh ũrĩa mũitĩrĩrie maguta ũrĩcokaga ithenya rĩake kuuma gatagatĩ-inĩ ka ariũ ake nĩ arĩrutaga igongona rĩu. Ũyũ nĩguo ũgũtuĩka watho wa gũtũũra ũrũmagĩrĩrũo: Igongona rĩu igima rĩrĩcinagwo rĩrute ndogo harĩ Yahweh

Igongona o rĩothe rĩa mũtu rĩa mũthĩnjĩri-Yahweh rĩagĩrĩire gũkorũo rĩrĩ igongona igima. Rĩtiagĩrĩire kũrĩo.”

Yahweh akĩarĩria Musa o rĩngĩ akĩmwĩra:

“Ĩra Haruni na ariũ ake atĩrĩ, ‘Ũyũ nĩguo watho wa igongona rĩa mehia: Handũ harĩa igongona rĩa njino rĩrĩthĩnjagĩrũo noho o na igongona rĩa mehia rĩrĩthĩnjagĩrũo mbere ya Yahweh. Kĩu nĩ kĩndũ kĩamũre mũno

Mũthĩnjĩri-Yahweh ũrĩa ũrĩrutaga igongona rĩu nĩ ũndũ wa mehia nĩwe ũrĩrĩrĩaga. Rĩrĩrĩagĩrũo handũ hamũre, hau nja ya hema ya gũtũnganwo.

“‘Kĩndũ o gĩothe kĩrĩhutagia nyama yayo kĩrĩtuĩkaga kĩamũre, na mũndũ o wothe angĩtaatia ĩmwe ya thakame yayo nguo-inĩ yake, wagĩrĩirũo gũthambia kĩrĩa gĩataatĩrũo nĩ thakame ĩyo ũrĩ handũ hamũre

Nyũngũ ya rĩũmba ĩrĩa igongona rĩu rĩatherũkĩrio nĩ kũũragwo ĩrĩũragagwo. No angĩkorũo rĩatherũkĩrio nyũngũ-inĩ ya gĩcango, nyũngũ ĩyo no mũhaka ĩkumuthagwo na ĩgathambio na maĩ.

“‘Mũndũrũme wothe gatagatĩ-inĩ ka athĩnjĩri-Yahweh nĩ arĩrĩaga igongona rĩu. Kĩu nĩ kĩndũ kĩamũre mũno

O na kũrĩ ũguo, igongona rĩa mehia rĩtirĩrĩagwo angĩkorũo thakame ĩmwe yarĩo ĩtwarĩtwo hema-inĩ ya gũtũnganwo thĩinĩ wa harĩa hamũre ĩrĩ ya kũruta igongona rĩa kũhumbĩra mehia. Rĩagĩrĩire gũcinwo na mwaki.