Maũndũ ma Alawii 5

“‘Mũndũ angĩigua gũgĩtanwo nĩguo mũndũ akarute ũira na akorũo we nĩ mũira kana nĩ onete kana akamenya ũndũ ũcio na akaga kũumbũra, nĩ ehĩtie, na nĩ akoorio nĩ ũndũ wa ihĩtia rĩu rĩake.

“‘Kana mũndũ angĩhutia kĩndũ o gĩothe kĩrĩ thahu, kĩimba kĩa nyamũ ya gĩthaka ĩrĩ thahu, kĩa nyamũ ya mũciĩ ĩrĩ thahu, kana gĩa kĩũmbe kĩrĩ thahu harĩ iria ithiaga irĩ gĩkundi, arĩkoragwo arĩ na thahu na arĩ na ihĩtia o na angĩkorũo ndoĩ

Kana mũndũ angĩhutia thahu uumanĩte na mũndũ atekũmenya—kĩndũ o gĩothe kĩrĩ thahu kĩngĩtũma akorũo na thahu⁠—acoke amenye ũndũ ũcio, arĩkoragwo na ihĩtia.

“‘Kana mũndũ angĩĩhĩta gwĩka ũndũ atecirĩtie wega—ũrĩ ũndũ mwega kana mũũru, gũtekũmakania nĩ ũndũ ũrĩkũ—na ndaramenyaga ũndũ ũcio, no acoke amenye atĩ nĩ eehĩtire atecirĩtie wega, arĩkoragwo na ihĩtia.

“‘Mũndũ angĩgĩa ihĩtia na njĩra ya gwĩka ũmwe wa maũndũ macio, no mũhaka oimbũre oige ũrĩa ehĩtie

Ningĩ arehe igongona rĩake rĩa mahĩtia harĩ Yahweh nĩ ũndũ wa mehia macio ekĩte, arehe mũgoma kuuma rũũru-inĩ rwa mbũri kana rwa ng’ondu, kamwatĩ kana kaharika, nĩ ũndũ wa igongona rĩa mehia. Nake mũthĩnjĩri-Yahweh arute igongona rĩa kũhumbĩra mehia nĩ ũndũ wa mehia ma mũndũ ũcio.

“‘No angĩkorũo ndangĩhota kũruta ng’ondu, agĩrĩirũo kũrehera Yahweh ndutura igĩrĩ kana njui igĩrĩ cia ndirahũgĩ irĩ igongona rĩa mahĩtia nĩ ũndũ wa mehia macio make, ĩmwe ĩrĩ igongona rĩa mehia na ĩyo ĩngĩ ĩrĩ igongona rĩa njino

Agĩrĩirũo gũcitwara kũrĩ mũthĩnjĩri-Yahweh, nake arute ĩyo ya igongona rĩa mehia ĩrĩ ya mbere na amĩkonore mũtwe ngingo-inĩ yayo mwena wa na mbere atekũmĩtinania

Agĩrĩirũo gũtaatia thakame ĩmwe ya igongona rĩa mehia mwena-inĩ wa kĩgongona, no thakame ĩrĩa yatigara yagĩrĩire gũitwo gĩtina-inĩ gĩa kĩgongona. Rĩu nĩ igongona rĩa mehia

Nayo ĩyo ĩngĩ arĩmĩkaga o ta ũrĩa igongona rĩa njino rĩkagwo kũringana na mũtaratara ũrĩa ũrũmagĩrĩrũo; na njĩra ĩyo mũthĩnjĩri-Yahweh akaruta igongona rĩa mehia nĩ ũndũ wa mehia marĩa mũndũ ũcio ekĩte, nake akoherũo.

“‘No rĩrĩ, angĩkorũo ndangĩhota kũruta ndutura igĩrĩ kana njui igĩrĩ cia ndirahũgĩ, agĩrĩirũo gũtwara igongona rĩa mehia make rĩa mũtu mũhinyu gĩcunjĩ kĩmwe harĩ ikũmi kĩa eba nĩ ũndũ wa igongona rĩa mehia. Ndagĩrĩirũo kũwĩkĩra maguta kana kũigĩrĩra ũbani igũrũ rĩaguo, nĩ gũkorũo rĩu nĩ igongona rĩa mehia

Arĩũtwaraga kũrĩ mũthĩnjĩri-Yahweh, nake mũthĩnjĩri-Yahweh akarũma ngundi ya mũtu ũcio ũrĩ gacunjĩ kanini ka igongona rĩu akaũcinĩra kĩgongona-inĩ ũrute ndogo igũrũ rĩa magongona ma Yahweh ma gũcinwo na mwaki. Rĩu nĩ igongona rĩa mehia

Mũthĩnjĩri-Yahweh arĩrutaga igongona rĩa kũhumbĩra mehia nĩ ũndũ wa mehia marĩa mũndũ ũcio ekĩte, rĩhia o rĩothe harĩ mehia macio, nake akoherũo. Nakĩo kĩrĩa kĩrĩtigaraga harĩ igongona rĩu kĩrĩkoragwo kĩrĩ kĩa mũthĩnjĩri-Yahweh, o ta igongona rĩa mũtu.’”

Yahweh agĩthiĩ na mbere kwarĩria Musa akĩmwĩra atĩrĩ:

“Mũndũ angĩaga wĩhokeku na njĩra ya kwĩhia atekwenda ũndũ ũkonainie na indo iria nyamũre cia Yahweh, agĩrĩirũo kũrehera Yahweh ndũrũme ĩtarĩ na kaũgũ kuuma rũũru-inĩ ĩrĩ igongona rĩa mahĩtia; thogora wayo wa cekeri cia betha wagĩrĩire gũkorũo ũringaine na cekeri ĩrĩa ĩtuĩtwo ya harĩa hamũre

No nginya akarĩhĩra mehia marĩa ekĩte makonainie na harĩa hamũre na ningĩ nĩ arĩongagĩrĩra gĩcunjĩ kĩmwe harĩ ithano gĩa thogora wa indo icio. Arĩcineanaga kũrĩ mũthĩnjĩri-Yahweh, nĩguo mũthĩnjĩri-Yahweh ahũthĩre ndũrũme ĩyo ya igongona rĩa mahĩtia kũruta igongona rĩa kũhumbĩra mehia ma mũndũ ũcio, nake akoherũo.

“Mũndũ angĩhia na njĩra ya gwĩka ũndũ o wothe wa maũndũ marĩa Yahweh athanĩte matikanekwo, o na angĩkorũo ekĩte atekũmenya, arĩkoragwo arĩ na mahĩtia na nĩ akoorio nĩ ũndũ wa mahĩtia macio make

Agĩrĩirũo gũtwarĩra mũthĩnjĩri-Yahweh ndũrũme ĩtarĩ na kaũgũ kuuma rũũru-inĩ kũringana na thogora ũrĩa ũgũtuwo, nĩ ũndũ wa igongona rĩa mahĩtia. Nake mũthĩnjĩri-Yahweh arute igongona rĩa kũhumbĩra mehia nĩ ũndũ wa mũndũ ũcio tondũ wa mahĩtia marĩa ekĩte atekũmenya, nake akoherũo

Rĩu nĩ igongona rĩa mahĩtia. Nĩ gũkorũo mũndũ ũcio arĩ na mahĩtia nĩ ũndũ wa kwĩhĩria Yahweh.”