Maũndũ ma Matukũ wa Keerĩ 13

Na rĩrĩ, mwaka-inĩ wa 18 wa Mũthamaki Jeroboamu, Abiya nĩ aatuĩkire mũthamaki wa Yahuda

Aathanire mĩaka ĩtatũ thĩinĩ wa Yahrushalayim. Nyina eetagwo Mikaia mwarĩ wa Urieli wa Gibea. Na kwarĩ na mbaara gatagatĩ ka Abiya na Jeroboamu.

Nĩ ũndũ ũcio Abiya agĩthiĩ mbaara-inĩ arĩ na mbũtũ ya njamba cia ita 400,000 irĩ hinya na imenyeretio. Nake Jeroboamu akĩĩbanga nĩ ũndũ wa mbaara arĩ na andũ 800,000 mamenyeretio, arĩa maarĩ njamba cia ita irĩ hinya

Abiya akĩrũgama Kĩrĩma-inĩ kĩa Zemaraimu, kĩrĩa kĩrĩ gĩcigo-inĩ kĩrĩ irĩma kĩa Efiraimu akiuga atĩrĩ: “Wee Jeroboamu na Isiraeli yothe, ta thikĩrĩriai

Kaĩ mũtoĩ atĩ Yahweh Kĩhoti wa Isiraeli nĩ aaheire Daudi ũthamaki nĩguo athamakĩre Isiraeli tene na tene, akĩmũhe we mwene na ariũ ake, kũgerera kĩrĩkanĩro gĩa cumbĩ

No Jeroboamu mũrũ wa Nebati, ndungata ya Suleimani mũrũ wa Daudi, akĩarahũka na akĩremera mwathi wake

Nao arũme arĩa maarĩ igũũta na mataarĩ kĩene magĩthiĩ kũrĩ we. Na magĩkorũo na hinya gũkĩra Rehoboamu mũrũ wa Suleimani hĩndĩ ĩrĩa Rehoboamu aarĩ mũnyinyi na ataarĩ na ngoro nyũmĩrĩru, na ndangĩahotire kũmetiiria.

“Na rĩu mũreciria atĩ no mũhote gwĩtiiria ũthamaki wa Yahweh ũrĩa ũrĩ guoko-inĩ kwa ariũ a Daudi tondũ mũrĩ kĩrĩndĩ kĩnene na mũrĩ na njaũ cia thahabu iria Jeroboamu aathondekire ituĩke ihoti cianyu

Githĩ mũtiaingatire athĩnjĩri a Yahweh, o acio njiarũa cia Haruni, o na Alawii, na mũkĩamũra athĩnjĩri-ihoti anyu ene o ta andũ a mabũrũri marĩa mangĩ? Mũndũ wothe ũngĩokire na gategwa na ndũrũme mũgwanja nĩ angĩatuĩkire mũthĩnjĩri wa indo itarĩ ihoti

No ithuĩ-rĩ, Yahweh nĩwe Kĩhoti witũ, na tũtimũtiganĩirie; athĩnjĩri-Yahweh aitũ, o acio njiarũa cia Haruni, nĩ matungatagĩra Yahweh, nao Alawii makamateithĩrĩria wĩra-inĩ ũcio

Nĩ marutagĩra Yahweh ndogo ya magongona ma njino o rũcinĩ na hwaĩ-inĩ hamwe na ũbumba ũrĩa ũnungaga wega, nayo mĩgate ya kũiganĩrĩrũo ĩkoragwo metha-inĩ ya thahabu therie, na magakia mũtĩ wa kũigĩrĩrũo matawa wa thahabu hamwe na matawa maguo o hwa-inĩ, tondũ nĩ tũrũmbũyagia wĩra ũrĩa tũheetwo nĩ Yahweh Kĩhoti witũ; no inyuĩ nĩ mũmũtiganĩirie

Na rĩrĩ, Kĩhoti ũrĩa wa ma arĩ hamwe na ithuĩ, agĩtũtongoria, na athĩnjĩri-Yahweh ake na tũrumbeta twa kũhuuha kĩmenyithia kĩa mbaara kũmwerekera inyuĩ. Atĩrĩrĩ inyuĩ andũ a Isiraeli, mũtikarũe na Yahweh Kĩhoti wa maithe manyu ma tene, tondũ mũtigũtooria.”

Ĩndĩ Jeroboamu akĩiga andũ a gũikara mohetie nĩguo mamatharĩkĩre kuuma na thutha, na kwoguo magĩkorũo marĩ mbere ya Yahuda na andũ acio maamohetie maarĩ thutha wao

Rĩrĩa andũ a Yahuda maarorire na thutha, makĩona atĩ maabataraga kũrũa mbaara kuuma mwena wa mbere na wa thutha. Kwoguo makĩambĩrĩria gũkaĩra Yahweh, nao athĩnjĩri-Yahweh maahuuhaga tũrumbeta na mũgambo mũnene

Andũ a Yahuda makiugĩrĩria mbugĩrĩrio ya mbaara, na rĩrĩa andũ acio a Yahuda mooigĩrĩirie mbugĩrĩrio ya mbaara, Kĩhoti ũrĩa wa ma akĩhoota Jeroboamu hamwe na Isiraeli yothe mbere ya Abiya na Yahuda

Nao andũ a Isiraeli makĩũra mbere ya Yahuda, na Kĩhoti akĩmaneana guoko-inĩ kwao

Abiya na andũ ake makĩmoraga njũragano nene, na andũ a Isiraeli arĩa mooragirũo makĩgũa, arũme 500,000 mamenyeretio

Nĩ ũndũ ũcio andũ a Isiraeli magĩtoorio ihinda-inĩ rĩu, no andũ a Yahuda makĩgĩa na hinya tondũ nĩ meehokire Yahweh Kĩhoti wa maithe mao ma tene

Abiya akĩrũmĩrĩra Jeroboamu na agĩtaha matũũra kuuma harĩ we, Betheli na taũni iria ciamĩthiũrũrũkĩirie, Jeshana na taũni iria ciamĩthiũrũrũkĩirie, na Efiraini na taũni iria ciamĩthiũrũrũkĩirie

Na Jeroboamu ndaacokereirie hinya wake rĩngĩ mahinda-inĩ ma Abiya; nake Yahweh akĩmũhũũra agĩkua.

No Abiya agĩthiĩ na mbere kũgĩa na hinya. Thutha wa ihinda akĩhikia atumia 14, na agĩtuĩka ithe wa ariũ 22 na aarĩ 16.

Na maũndũ macio mangĩ megiĩ Abiya, ciĩko ciake na ciugo ciake, nĩ maandĩke maandĩko-inĩ ma mũnabii Ido.