Maũndũ ma Matukũ wa Keerĩ 12

Rĩrĩa ũthamaki wa Rehoboamu wehandire wega na akĩgĩa na hinya, nĩ aatiganĩirie Watho wa Yahweh, we hamwe na Isiraeli yothe

Mwaka-inĩ wa gatano wa Mũthamaki Rehoboamu, Mũthamaki Shishaka wa Misiri akĩambata gũũkĩrĩra Yahrushalayim, tondũ nĩ maagĩte gũkorũo marĩ ehokeku harĩ Yahweh

Aarĩ na ngaari 1,200 cia mbarathi, atwarithia a mbarathi 60,000, na thigari itangĩtarĩka iria ciokire hamwe nake kuuma Misiri—Alibia, Asukii, na Aethiopia

Nake agĩtaha matũũra marĩa maarĩ na ũgitĩri ma Yahuda na thutha-inĩ agĩkinya Yahrushalayim.

Shemaia ũrĩa mũnabii agĩthiĩ kũrĩ Rehoboamu na anene a Yahuda arĩa maacemanĩtie Yahrushalayim nĩ ũndũ wa Shishaka, akĩmeera atĩrĩ: “Ũũ nĩguo Yahweh ekuuga, ‘Nĩ mũndiganĩirie, kwoguo o na niĩ nĩ ndĩmũtiganĩirie guoko-inĩ gwa Shishaka.’”

Nao anene a Isiraeli o na mũthamaki maigua ũguo makĩĩnyihia na makiuga ũũ: “Yahweh nĩ mũthingu.”

Rĩrĩa Yahweh oonire atĩ nĩ meenyihĩtie, kiugo kĩa Yahweh gĩgĩkinyĩra Shemaia akĩĩrũo atĩrĩ: “Nĩ menyihĩtie. Ndikũmaniina, na thutha wa kahinda kanini nĩ ngũmahonokia. Ndigũitĩrĩra mang’ũrĩ makwa igũrũ rĩa Yahrushalayim kũgerera Shishaka

Ĩndĩ megũtuĩka ndungata ciake, nĩgetha mamenye ngũrani gatagatĩ ga kũndungatĩra na gũtungatĩra athamaki a mabũrũri mangĩ.”

Mũthamaki Shishaka wa Misiri akĩambata gũũkĩrĩra Yahrushalayim. Akĩoya mĩthithũ ya nyũmba ya Yahweh na mĩthithũ ya nyũmba ya mũthamaki. Akĩoya indo ciothe, nginya ngo cia thahabu iria Suleimani aathondekete

Nĩ ũndũ ũcio Mũthamaki Rehoboamu agĩthondeka ngo cia gĩcango nĩgetha icoke ithenya rĩa icio, na agĩciĩhokera anene a arangĩri, arĩa maarangagĩra mũromo wa nyũmba ya mũthamaki

Rĩrĩa rĩothe mũthamaki aathiaga nyũmba-inĩ ya Yahweh, arangĩri acio maaingĩraga magacikuua, thutha ũcio magacicokia kanyũmba-inĩ ka arangĩri

Tondũ mũthamaki nĩ eenyihirie, marakara ma Yahweh nĩ maamwehereire, na ndaaniinire andũ acio biũ. Makĩria ma ũguo, nĩ harĩ maũndũ mamwe mega moonekire Yahuda.

Mũthamaki Rehoboamu agĩĩkĩra hinya ũnene wake kũu Yahrushalayim na agĩthiĩ na mbere gwathana; Rehoboamu aarĩ na mĩaka 41 rĩrĩa aatuĩkire mũthamaki, na agĩthamaka mĩaka 17 thĩinĩ wa Yahrushalayim, itũũra rĩrĩa Yahweh aathuurĩte kuuma mĩhĩrĩga-inĩ yothe ya Isiraeli rĩtuĩke handũ ha kũiga rĩĩtwa rĩake. Nyina wa mũthamaki eetagwo Naama ũrĩa Mũamoni

No nĩ eekire maũndũ moru, tondũ ndaatuĩte ngoro-inĩ yake gũcaria Yahweh.

Ha ũhoro wa maũndũ megiĩ Rehoboamu, kuuma kĩambĩrĩria nginya mũthia, na githĩ ti maandĩke hamwe na ciugo cia mũnabii Shemaia na cia Ido ũrĩa muoni cioneki thĩinĩ wa rekondi ya ndĩra? Na gwatũire mbaara gatagatĩ-inĩ ka Rehoboamu na Jeroboamu

Thutha ũcio Rehoboamu akĩhurũkio hamwe na maithe make ma tene na agĩthikwo Itũũra-inĩ rĩa Daudi; na mũrũwe Abiya agĩtuĩka mũthamaki ithenya rĩake.