Maũndũ ma Matukũ wa Keerĩ 11

Rĩrĩa Rehoboamu aakinyire Yahrushalayim, o rĩo agĩcokanĩrĩria nyũmba ya Yahuda na Benjamini, njamba cia ita 180,000 imenyeretio, nĩguo marũe na Isiraeli nĩgetha macokie ũthamaki kũrĩ Rehoboamu

Nakĩo kiugo kĩa Yahweh gĩgĩkinyĩra Shemaia mũndũ wa Kĩhoti ũrĩa wa ma, akĩĩrũo ũũ:

“Ĩra Rehoboamu mũrũ wa Suleimani mũthamaki wa Yahuda na andũ othe a Isiraeli arĩa marĩ Yahuda na Benjamini atĩrĩ,

‘Ũũ nĩguo Yahweh ekuuga: “Mũtikambate kũrũa na ariũ a ithe wanyu. O ũmwe wanyu nĩ acoke gwake mũciĩ, nĩ gũkorũo nĩ niĩ ndũmĩte maũndũ maya mathiĩ ũguo.”’” Nĩ ũndũ ũcio magĩathĩkĩra kiugo kĩa Yahweh na makĩhũndũka, na matiathiire kũrũa na Jeroboamu.

Rehoboamu agĩtũũra Yahrushalayim na agĩaka matũũra marĩ na ũgitĩri thĩinĩ wa Yahuda

Kwoguo agĩaka Bethilehemu, Etamu, Tekoa,

Bethi-zuru, Soko, Adulamu,

Gathu, Maresha, Zifu,

Adoraimu, Lakishi, Azeka,

Zora, Aijaloni, na Hebironi, matũũra marĩ na ũgitĩri marĩa maarĩ Yahuda na Benjamini

Ningĩ agĩĩkĩra hinya kũndũ kũrĩa kwarĩ na ũgitĩri na akĩiga anene a mbũtũ kuo na agĩtwara irio, maguta, na ndibei kuo,

na agĩtwara ngo nene na matimũ matũũra-inĩ mothe matiganĩte; akĩmekĩra hinya na gĩkĩro kĩnene mũno. Nakuo Yahuda na Benjamini gũgĩthiĩ na mbere gũkorũo kũrĩ gwake.

Nao athĩnjĩri-Yahweh na Alawii arĩa maarĩ thĩinĩ wa Isiraeli guothe makĩrũgama mwena wake, moimĩte icigo-inĩ ciao ciothe

Alawii magĩtiga ũrĩithio wao na indo ciao magĩthiĩ Yahuda na Yahrushalayim, tondũ Jeroboamu na ariũ ake nĩ maamatigithĩtie gũtungata marĩ athĩnjĩri a Yahweh

Jeroboamu agĩcoka akĩamũra athĩnjĩri-ihoti ake mwene nĩ ũndũ wa kũndũ kũrĩa gũtũũgĩru na nĩ ũndũ wa ndaimono iria ciahaanaga thenge cia njamba na nĩ ũndũ wa njaũ iria aathondekete

Na andũ kuuma mĩhĩrĩga yothe ya Isiraeli arĩa meehotorete na ngoro ciao gũcaria Yahweh Kĩhoti wa Isiraeli makĩmarũmĩrĩra magĩthiĩ nao Yahrushalayim nĩguo makarutĩre Yahweh Kĩhoti wa maithe mao ma tene igongona.

Ihinda-inĩ rĩa mĩaka ĩtatũ magĩĩkĩra hinya ũthamaki wa Yahuda na makĩnyita mbaru Rehoboamu mũrũ wa Suleimani, nĩ gũkorũo maarũmĩrĩire njĩra ya Daudi na ya Suleimani ihinda rĩa mĩaka ĩtatũ.

Rehoboamu agĩcoka akĩhikia Mahalathu mwarĩ wa Jerimothu mũrũ wa Daudi na wa Abihaili mwarĩ wa Eliabu mũrũ wa Jesii

Thutha wa ihinda akĩmũciarĩra ariũ aya: Jeushu, Shemaria, na Zahamu

Thutha wake, akĩhikia Maaka mũcũkũrũ wa Abisalomu. Thutha wa ihinda akĩmũciarĩra Abiya, Atai, Ziza, na Shelomithu

Rehoboamu eendete Maaka mũcũkũrũ wa Abisalomu gũkĩra atumia acio angĩ ake othe na thuriya, nĩ gũkorũo aarĩ na atumia 18 na thuriya 60, na agĩtuĩka ithe wa ariũ 28 na aarĩ 60.

Nĩ ũndũ ũcio, Rehoboamu akĩamũra Abiya mũrũ wa Maaka atuĩke mũnene na mũtongoria gatagatĩ-inĩ ka ariũ a ithe, tondũ nĩ eendaga kũmũtua mũthamaki

No rĩrĩ, nĩ aahũthĩrire ũtaũku na agĩtũma ariũ amwe ake icigo-inĩ ciothe cia Yahuda na Benjamini, mathiĩ matũũra-inĩ mothe marĩa maarĩ na ũgitĩri, na akĩmahe irio nyingĩ na akĩmacarĩria atumia aingĩ.