Maũndũ ma Matukũ wa Keerĩ 23

Mwaka-inĩ wa mũgwanja, Jehoiada nĩ oonanirie ũmĩrĩru na akĩgĩa kĩrĩkanĩro hamwe na anene a andũ igana, nĩo Azaria mũrũ wa Jerohamu, Ishumaeli mũrũ wa Jehohanani, Azaria mũrũ wa Obedi, Maaseia mũrũ wa Adaia, na Elishafati mũrũ wa Zikiri

Magĩcoka magĩthiĩ kũndũ guothe thĩinĩ wa Yahuda na magĩcokanĩrĩria Alawii kuuma matũũra-inĩ mothe ma Yahuda na atongoria a nyũmba cia maithe ma andũ a Isiraeli. Rĩrĩa maathiire Yahrushalayim,

kĩũngano gĩothe gĩkĩrĩkanĩra kĩrĩkanĩro hamwe na mũthamaki thĩinĩ wa nyũmba ya Kĩhoti ũrĩa wa ma, thutha ũcio akĩmeera ũũ:

Ũndũ ũyũ nĩguo mwagĩrĩirũo gwĩka: Gĩcunjĩ kĩmwe harĩ ithatũ kĩa athĩnjĩri-Yahweh na Alawii arĩa magaakorũo wĩra mũthenya wa Thabatũ magaakorũo marĩ aikaria a mĩrango;

gĩcunjĩ kĩngĩ kĩmwe harĩ ithatũ gĩgaakorũo nyũmba-inĩ ya mũthamaki, na gĩcunjĩ kĩu kĩngĩ kĩmwe harĩ ithatũ gĩkorũo Kĩhingo-inĩ kĩa Mũthingi, na andũ othe magaakorũo nja-inĩ cia nyũmba ya Yahweh

Mũtikanareke mũndũ o na ũmwe atonye thĩinĩ wa nyũmba ya Yahweh tiga o athĩnjĩri-Yahweh na Alawii arĩa magaakorũo magĩtungata. Acio no matonye tondũ nĩ gĩkundi kĩamũre, na andũ othe nĩ makaahingia wĩra wao harĩ Yahweh

Alawii magĩrĩirũo gũthiũrũrũkĩria mũthamaki na mĩena yothe, o mũndũ anyitĩte matharaita make na guoko. Mũndũ wothe ũkaaingĩra nyũmba-inĩ ĩyo nĩ akooragwo. Mwagĩrĩirũo gũikara na mũthamaki harĩa hothe athiĩ.”

Alawii na andũ othe a Yahuda magĩka o ta ũrĩa Jehoiada ũrĩa mũthĩnjĩri-Yahweh aamaathĩte. O ũmwe wao akĩoya andũ ake arĩa maagĩrĩirũo kũruta wĩra mũthenya wa Thabatũ, o hamwe na arĩa mataagĩrĩirũo kũruta wĩra mũthenya wa Thabatũ, nĩ gũkorũo Jehoiada ũcio mũthĩnjĩri-Yahweh ndaarekereirie ikundi icio ciume wĩra-inĩ wacio

Nake Jehoiada ũcio mũthĩnjĩri-Yahweh akĩhe anene acio a andũ igana matimũ na ngo nini na ngo cia gĩthiũrũrĩ iria ciarĩ cia Mũthamaki Daudi, o icio ciarĩ nyũmba-inĩ ya Kĩhoti ũrĩa wa ma

Agĩcoka akĩrũgamia andũ othe, o ũmwe wao anyitĩte itharaita rĩake na guoko, kuuma mwena wa ũrĩo wa nyũmba ĩyo nginya mwena wayo wa ũmotho, hakuhĩ na kĩgongona na hakuhĩ na nyũmba ĩyo, magĩthiũrũrũkĩria mũthamaki

Magĩcoka makĩruta mũrũ wa mũthamaki nja na makĩmũigĩrĩra thũmbĩ na Ũira na makĩmũtua mũthamaki, nake Jehoiada hamwe na ariũ ake makĩmũitĩrĩria maguta. Magĩcoka makiuga atĩrĩ: “Mũthamaki arotũũra ihinda iraya!”

Rĩrĩa Athalia aaaiguire mũgambo wa andũ magĩteng’era makĩgoocaga mũthamaki, o rĩmwe agĩthiĩ kũrĩ andũ nyũmba-inĩ ya Yahweh.

Agĩcoka akĩona mũthamaki arũgamĩte hau hakuhĩ na gĩtugĩ gĩake kĩrĩa kĩarĩ mũromo-inĩ. Anene na ahuuhi tũrumbeta maarĩ hamwe na mũthamaki, na andũ othe a bũrũri nĩ gũkena maakenaga makĩhuuhaga tũrumbeta, nao aini marĩ na indo cia ũini nĩo maatongoragia nyĩmbo cia kũgooca. Athalia ona ũguo agĩtembũra nguo ciake na akĩanĩrĩra akiuga: “Ĩno nĩ njama! Ĩno nĩ njama!”

No Jehoiada ũcio mũthĩnjĩri-Yahweh akĩruta anene a andũ igana nja, arĩa maathuurĩtwo matongorie mbũtũ, akĩmeera ũũ: “Mweheriei gatagatĩ-inĩ ga thigari, na mũndũ o wothe ũkũmũrũmĩrĩra, mũmũũrage na rũhiũ rwa njora!” Tondũ mũthĩnjĩri-Yahweh nĩ ooigĩte atĩrĩ: “Mũtikamũũragĩre nyũmba-inĩ ya Yahweh.”

Magĩkĩmũnyita, na rĩrĩa aakinyire itonyero-inĩ rĩa Kĩhingo kĩa Mbarathi kĩa nyũmba ya mũthamaki, o rĩo makĩmũũragĩra ho.

Nake Jehoiada agĩtũma kũgĩe kĩrĩkanĩro gatagatĩ gake na andũ othe o hamwe na mũthamaki, atĩ nĩ mangĩathiire na mbere gũikara marĩ andũ a Yahweh

Thutha ũcio andũ othe magĩthiĩ nyũmba-inĩ ya Baali na makĩmĩmomora, na makĩhehenja igongona ciake na mĩhianano yake, na makĩũragĩra Matani mũthĩnjĩri wa Baali mbere ya igongona icio

Jehoiada agĩcoka akĩiga ũrũgamĩrĩri wa nyũmba ya Yahweh moko-inĩ ma athĩnjĩri-Yahweh na Alawii, arĩa Daudi aheete wĩra na ikundi nĩ ũndũ wa nyũmba ya Yahweh nĩgetha marutage magongona ma njino ma Yahweh kũringana na ũrĩa kwandĩkĩtwo thĩinĩ wa Watho wa Musa, marĩ na gĩkeno na makĩinaga, kũringana na ũtongoria wa Daudi

Ningĩ akĩiga arangĩri ihingo-inĩ cia nyũmba ya Yahweh, nĩgetha mũndũ ũrĩ na thahu wa mũthemba o wothe ndakaingĩre

Agĩcoka akĩoya anene a andũ igana, andũ arĩa atĩĩku, atongoria a andũ, o hamwe na andũ othe a bũrũri na makiumagaria mũthamaki maikũrũkĩte kuuma nyũmba-inĩ ya Yahweh. Magĩcoka makĩgerera kĩhingo-inĩ kĩa rũgongo magĩthiĩ nyũmba-inĩ ya mũthamaki na magĩikarĩria mũthamaki gĩtĩ-inĩ kĩa ũnene kĩa ũthamaki

Nao andũ othe a bũrũri magĩkena na itũũra rĩu rĩkĩhoorera, nĩ gũkorũo nĩ mooragĩte Athalia na rũhiũ rwa njora.