Maũndũ ma Matukũ wa Keerĩ 24
Jehoashu aarĩ na mĩaka mũgwanja rĩrĩa aatuĩkire mũthamaki, na agĩathana mĩaka 40 thĩinĩ wa Yahrushalayim. Nyina eetagwo Zibia kuuma Biri-shiba
Jehoashu agĩthiĩ na mbere gwĩka maũndũ marĩa magĩrĩire maitho-inĩ ma Yahweh matukũ-inĩ mothe ma Jehoiada ũrĩa mũthĩnjĩri-Yahweh.
Jehoiada akĩmũthuurĩra aka erĩ, nake agĩtuĩka ithe wa ariũ na aarĩ.
Thutha ũcio Jehoashu akĩĩrirĩria na ngoro yake gũthondeka nyũmba ya Yahweh
Nĩ ũndũ ũcio agĩcokanĩrĩria athĩnjĩri-Yahweh na Alawii na akĩmeera atĩrĩ: “Thiĩi matũũra-inĩ ma Yahuda mũkonganie mbeca kuuma kũrĩ andũ othe a Isiraeli cia gũthondeka nyũmba ya Kĩhoti wanyu mwaka o mwaka; na mwagĩrĩirũo gwĩka ũndũ ũcio na ihenya.” No Alawii matiekire ũndũ ũcio na ihenya
Mũthamaki agĩgĩta Jehoiada ũcio warĩ mũnene akĩmwĩra atĩrĩ: “Nĩ kĩĩ kĩgirĩtie wĩre Alawii marehe kuuma Yahuda na Yahrushalayim igooti rĩrĩa rĩamũre rĩaathanirũo nĩ Musa ndungata ya Yahweh, igooti rĩamũre rĩa kĩũngano kĩa Isiraeli, nĩ ũndũ wa hema ya Ũira
Nĩ gũkorũo ariũ a Athalia, mũtumia ũcio mwaganu, nĩ maabunjĩte nyũmba ya Kĩhoti ũrĩa wa ma, na makahũthĩra indo ciothe nyamũre cia nyũmba ya Yahweh harĩ ihoti cia Baali.”
Nake mũthamaki agĩathana, na gũgĩthondekwo ithandũkũ rĩkĩigwo nja kĩhingo-inĩ kĩa nyũmba ya Yahweh
Thutha ũcio gũkĩmenyithanio kũndũ guothe thĩinĩ wa Yahuda na Yahrushalayim atĩ andũ marehere Yahweh igooti rĩamũre rĩrĩa Musa ndungata ya Kĩhoti ũrĩa wa ma aatuĩrĩire Isiraeli werũ-inĩ
Anene othe na andũ othe magĩkena, na magĩthiĩ na mbere kũrehe mĩhothi makĩmĩikagia thĩinĩ wa ithandũkũ rĩu nginya rĩkĩiyũra.”
Rĩrĩa rĩothe Alawii maarehaga ithandũkũ rĩu nĩguo rĩneanwo kũrĩ mũthamaki na makona atĩ rĩrĩ na mbeca nyingĩ, mwandĩki wa mũthamaki na mũteithĩrĩria wa mũnene wa athĩnjĩri-Yahweh mookaga makonoria ithandũkũ rĩu, thutha ũcio makarĩcokia handũ harĩo. Ũguo nĩguo meekaga mũthenya o mũthenya, na magĩcokanĩrĩria mbeca nyingĩ
Nake mũthamaki na Jehoiada maacineanaga kũrĩ arĩa maarũgamagĩrĩra wĩra wa ũtungata wa nyũmba ya Yahweh, nao makandĩka aicũhia a mahiga na mabundi a gũthondeka nyũmba ya Yahweh, o na aruti wĩra a kĩgera na gĩcango nĩguo mathondeke nyũmba ya Yahweh
Nao andũ acio maarũgamagĩrĩra wĩra makĩwambĩrĩria, na wĩra ũcio wa kũmĩthondeka ũgĩthiĩ na mbere ũrũgamĩrĩirũo nĩo, na magĩcokereria nyũmba ya Kĩhoti ũrĩa wa ma ũrĩa yagĩrĩire gũkorũo ĩtariĩ na makĩmĩĩkĩra hinya
Rĩrĩa maarĩkirie, magĩtwara mbeca iria ciatigarĩte kũrĩ mũthamaki na kũrĩ Jehoiada, nao magĩcihũthĩra gũthondeka indo cia nyũmba ya Yahweh, indo cia ũtungata na cia kũrutĩra magongona na ikombe na indo cia thahabu na cia betha. Na nĩ maarutaga magongona ma njino nyũmba-inĩ ya Yahweh mategũtĩrĩria matukũ-inĩ mothe ma Jehoiada.
Rĩrĩa Jehoiada aakũrire na agĩkorũo aiganĩtie mĩaka, agĩkua; aarĩ na mĩaka 130 rĩrĩa aakuire
Nĩ ũndũ ũcio makĩmũthika thĩinĩ wa Itũũra rĩa Daudi hamwe na athamaki, tondũ nĩ eekĩte maũndũ mega thĩinĩ wa Isiraeli ũhoro-inĩ wĩgiĩ Kĩhoti ũrĩa wa ma na nyũmba Yake.
Thutha wa Jehoiada gũkua, anene a Yahuda magĩthiĩ na makĩinamĩrĩra harĩ mũthamaki, nake mũthamaki akĩmathikĩrĩria
Magĩtiganĩria nyũmba ya Yahweh Kĩhoti wa maithe mao ma tene makĩambĩrĩria gũtungatĩra mĩtĩ ya kũhoywo na mĩhianano, namo marakara ma Kĩhoti magĩũkĩrĩra Yahuda na Yahrushalayim nĩ ũndũ wa mahĩtia mao
Agĩthiĩ na mbere gũtũma anabii kũrĩ o nĩguo mamacokie kũrĩ Yahweh, nao magĩthiĩ na mbere kũmahe mũkaana, no matiigana gũthikĩrĩria.
Na rĩrĩ, roho wa Kĩhoti ũgĩũka igũrũ rĩa Zakaria mũrũ wa Jehoiada ũrĩa mũthĩnjĩri-Yahweh, nake akĩrũgama handũ igũrũ rĩa andũ akĩmeera atĩrĩ: “Ũũ nĩguo Kĩhoti ũrĩa wa ma ekuuga, ‘Nĩ kĩĩ kĩratũma mwagarare maathani ma Yahweh? Mũtikũgaacĩra! Tondũ nĩ mũtiganĩirie Yahweh, o nake nĩ ekũmũtiganĩria.’”
No makĩbanga njama ya kũmũũkĩrĩra na mũthamaki akĩmaatha mamũhũũre na mahiga, na magĩka ũguo nja-inĩ ya nyũmba ya Yahweh
Kwoguo Mũthamaki Jehoashu ndaaririkanire maũndũ mega ma ũtugi marĩa ithe Jehoiada aamuonetie, na akĩũraga mũrũwe, ũrĩa woigire ũũ hĩndĩ ĩyo aakuaga: “Yahweh nĩ one ũndũ ũcio na akũherithie.”
Kĩambĩrĩria-inĩ kĩa mwaka mbũtũ ya Siria ĩkĩambata gũũkĩrĩra Jehoashu na ĩgĩtharĩkĩra Yahuda na Yahrushalayim. Ĩgĩcoka ĩkĩniina anene othe a andũ, na ĩgĩtaha indo ciao ciothe ĩgĩtwarĩra mũthamaki wa Dameski
Tondũ o na gũtuĩka mbũtũ ĩrĩa yatharĩkagĩra ya Siria yarĩ mbũtũ ya thigari nini, Yahweh nĩ aaneanire mbũtũ nene mũno moko-inĩ mao, tondũ nĩ maatiganĩirie Yahweh Kĩhoti wa maithe mao ma tene; nĩ ũndũ ũcio makĩhingia ituĩro harĩ Jehoashu
Na rĩrĩa maamwehereire (nĩ gũkorũo maamũtigire agurarĩtio mũno), ndungata ciake ikĩbanga njama ya kũmũũkĩrĩra tondũ nĩ aaitĩte thakame ya ariũ a Jehoiada ũrĩa mũthĩnjĩri-Yahweh. Ciamũũragĩire ũrĩrĩ-inĩ wake. Agĩgĩkua na makĩmũthika thĩinĩ wa Itũũra rĩa Daudi, no matiamũthikire kũndũ kũrĩa athamaki maathikagwo.
Aya nĩo maabangire njama ya kũmũũkĩrĩra: Zabadi mũrũ wa Shimeathu ũrĩa Mũamoni na Jehozabadu mũrũ wa Shimurithu ũrĩa Mũmoabi
Ha ũhoro wĩgiĩ ariũ ake na wĩgiĩ ndũmĩrĩri nyingĩ cia kũmũũkĩrĩra na gũthondekwo kwa nyũmba ya Kĩhoti ũrĩa wa ma, maũndũ macio mothe mandĩkĩtwo maandĩko-inĩ ma Ibuku rĩa Athamaki. Na mũrũwe Amazia agĩtuĩka mũthamaki ithenya rĩake.