Maũndũ ma Matukũ wa Keerĩ 26

Nao andũ othe a Yahuda makĩoya Uzia, ũrĩa warĩ na mĩaka 16, makĩmũtua mũthamaki ithenya rĩa ithe Amazia

Nake agĩaka itũũra rĩa Elothu rĩngĩ na akĩrĩcokia Yahuda thutha wa mũthamaki kũhurũkio hamwe na maithe make ma tene

Uzia aarĩ na mĩaka 16 rĩrĩa aatuĩkire mũthamaki, na agĩathana mĩaka 52 thĩinĩ wa Yahrushalayim. Nyina eetagwo Jekolia wa kuuma Yahrushalayim

Nake agĩthiĩ na mbere gwĩka maũndũ marĩa magĩrĩire maitho-inĩ ma Yahweh, o ta ũrĩa ithe Amazia eekĩte

Agĩthiĩ na mbere gũcaria Kĩhoti matukũ-inĩ ma Zakaria, ũrĩa wamũrutire gwĩtigĩra Kĩhoti ũrĩa wa ma. Hĩndĩ ĩyo aacaragia Yahweh, Kĩhoti ũrĩa ma nĩ aatũmire agaacĩre.

Agĩkiumagara na akĩrũa na Afilisti na agĩtũrĩkia rũthingo rwa Gathu, rũthingo rwa Jabine, na rũthingo rwa Ashidodi. Agĩcoka agĩaka matũũra gĩcigo-inĩ kĩa Ashidodi na gatagatĩ-inĩ ka Afilisti

Kĩhoti ũrĩa wa ma agĩthiĩ na mbere kũmũteithia kũrũa na Afilisti, andũ a Arabia arĩa maaikaraga Guribaali, na kũrũa na Ameunimu

Aamoni makĩambĩrĩria kũrehera Uzia igooti. Ngumo yake ĩgĩtherema o nginya Misiri, nĩ gũkorũo nĩ aagĩire na hinya mũno

Makĩria ma ũguo, Uzia agĩaka nyũmba ndaya na igũrũ thĩinĩ wa Yahrushalayim hakuhĩ na Kĩhingo gĩa Kona, Kĩhingo kĩa Mũkuru, na hakuhĩ na Gĩtugĩ, na agĩciĩkĩra hinya

Ningĩ agĩaka nyũmba ndaya na igũrũ werũ-inĩ na akĩenja marima maingĩ ma maĩ (nĩ gũkorũo aarĩ na mahiũ maingĩ); ningĩ agĩka o ta ũguo thĩinĩ wa Shefela na kũndũ kũrĩa kwaraganu. Aarĩ na arĩmi na andũ a kũruta wĩra mĩgũnda-inĩ ya mĩthabibũ kũu irĩma-inĩ na thĩinĩ wa Karimeli, tondũ nĩ eendete ũrĩmi.

Ningĩ-rĩ, Uzia agĩkĩgĩa na mbũtũ yehaarĩirie nĩ ũndũ wa mbaara. Maathiaga kũrũa mabangĩtwo na ikundi. Nĩ maatarĩtwo na makandĩkithio nĩ Jeieli ũrĩa mwandĩki na Maaseia ũrĩa mũnene, rungu rwa wathani wa Hanania, ũmwe wa anene a mũthamaki

Mũigana wothe wa atongoria a nyũmba cia maithe mao arĩa maarũgamagĩrĩra njamba icio cia ita irĩ hinya warĩ 2,600

Thigari iria ciarĩ rungu rwa wathani wao ciarĩ arũme 307,500 mehaarĩirie nĩ ũndũ wa mbaara, mbũtũ ĩrĩ na hinya ya gũteithia mũthamaki kũrũa na thũ

Uzia nĩ aaheire mbũtũ ĩyo yothe ngo, matimũ, ngũbia, tũgooti twa cuma, moota, na mahiga ma kĩgũtha

Makĩria ma ũguo, kũu Yahrushalayim nĩ aathondekire macini cia mbaara, igĩturũo nĩ mabundi marĩ na ũũgĩ; ciaigirũo nyũmba-inĩ ndaya na igũrũ na kona-inĩ cia thingo na nĩ ingĩarathũkirie mĩguĩ na mahiga manene. Nĩ ũndũ ũcio, ngumo yake ĩgĩtherema kũndũ kũraya, nĩ gũkorũo nĩ aateithirio na njĩra nene na akĩgĩa na hinya.

No rĩrĩ, rĩrĩa aagĩire na hinya, ngoro yake nĩ yetũũgĩririe nginya akĩĩrehera mwanangĩko, na akĩaga wĩhokeku harĩ Yahweh Kĩhoti wake na njĩra ya gũtonya thĩinĩ wa hekarũ ya Yahweh nĩguo acine ũbumba kĩgongona-inĩ gĩa gũcinĩra ũbumba

O hĩndĩ ĩyo, Azaria ũrĩa mũthĩnjĩri-Yahweh na athĩnjĩri-Yahweh angĩ 80 a Yahweh, arĩa maarĩ na ũcamba, magĩtonya makĩmũrũmĩrĩra

Makĩng’ethera Mũthamaki Uzia makĩmwĩra atĩrĩ: “Ti ũndũ mwagĩrĩru harĩ wee Uzia, gũcinĩra Yahweh ũbumba! Athĩnjĩri-Yahweh no o magĩrĩirũo gũcina ũbumba tondũ o nĩ njiarũa cia Haruni, iria ciamũrĩtwo. Ehera handũ harĩa hamũre, tondũ nĩ wagĩte kwĩhokeka na gũtirĩ riri ũkwamũkĩra kuuma kũrĩ Yahweh Kĩhoti tondũ wa ũndũ ũcio.”

No Uzia, ũrĩa wanyitĩte rũgĩo rwa gũcinĩra ũbumba guoko-inĩ gwake, akĩrakara mũno; na hĩndĩ ĩyo aarakarĩire athĩnjĩri-Yahweh, mangũ magĩtuthũka thiithi-inĩ wake arĩ mbere ya athĩnjĩri-Yahweh acio thĩinĩ wa nyũmba ya Yahweh hakuhĩ na kĩgongona gĩa gũcinĩra ũbumba

Rĩrĩa Azaria ũcio mũnene wa athĩnjĩri-Yahweh hamwe na athĩnjĩri-Yahweh acio angĩ othe maamũrorire, makĩona atĩ nĩ aahũũrĩtwo na mangũ thiithi-inĩ wake! Nĩ ũndũ ũcio makĩmũruta hau na ihenya, nake akĩhanyũka nja, tondũ Yahweh nĩ aamũhũũrĩte.

Mũthamaki Uzia aatũũrire arĩ na mangũ nginya mũthenya ũrĩa aakuire, na agĩthiĩ na mbere gũikara thĩinĩ wa nyũmba yarĩ handũ mwanya arĩ na mangũ, tondũ ndeetĩkĩrĩtio gũthiaga nyũmba-inĩ ya Yahweh. Nake Jothamu mũrũ wake nĩwe warũgamagĩrĩra nyũmba ya mũthamaki, agatuĩra andũ a bũrũri ciira.

Na maũndũ macio mangĩ megiĩ Uzia, kuuma kĩambĩrĩria nginya mũthia, nĩ maandĩkirũo nĩ mũnabii Isaia mũrũ wa Amozu

Thutha ũcio Uzia akĩhurũkio hamwe na maithe make ma tene, na makĩmũthika hamwe na maithe make ma tene, no maamũthikire mũgũnda-inĩ wa gũthikanwo ũrĩa warĩ wa athamaki, nĩ gũkorũo mooigire atĩrĩ: “Arĩ na mangũ.” Na mũrũwe Jothamu agĩtuĩka mũthamaki ithenya rĩake.