Maũndũ ma Matukũ wa Keerĩ 28
Ahazu aarĩ na mĩaka 20 rĩrĩa aatuĩkire mũthamaki, na agĩathana mĩaka 16 thĩinĩ wa Yahrushalayim. Ndeekire maũndũ marĩa maagĩrĩire maitho-inĩ ma Yahweh ta ũrĩa Daudi ithe wao wa tene eekĩte
Ithenya rĩa ũguo, aarũmĩrĩire njĩra cia athamaki a Isiraeli, o na agĩthondeka mĩhianano ya cuma ya ihoti cia Baali
Makĩria ma ũguo, nĩ aarutire ndogo ya magongona Mũkuru-inĩ wa Mũrũ wa Hinomu na agĩcina ariũ ake mwaki-inĩ, akĩrũmĩrĩra mĩtugo ĩrĩ magigi ya ndũrĩrĩ iria Yahweh aaingatĩte ciehere mbere ya ciana cia Isiraeli
Ningĩ agĩthiĩ na mbere kũrutĩra magongona na ndogo ya magongona kũndũ kũrĩa gũtũũgĩru, tũrĩma igũrũ, na rungu rwa mũtĩ o wothe mũruru.
Nĩ ũndũ ũcio Yahweh Kĩhoti wake akĩmũneana guoko-inĩ kwa mũthamaki wa Siria, nao makĩmũhoota na makĩnyita andũ aingĩ mĩgwate makĩmatwara Dameski. Ningĩ nĩ aaneanirũo guoko-inĩ kwa mũthamaki wa Isiraeli, ũrĩa wamũreheire njũragano nene
Nĩ gũkorũo Peka mũrũ wa Remalia nĩ ooragĩte andũ 120,000 thĩinĩ wa Yahuda na mũthenya ũmwe, na othe maarĩ andũ marĩ ũcamba, tondũ nĩ maatiganĩirie Yahweh Kĩhoti wa maithe mao ma tene
Nake Zikiri, Mũefiraimu warĩ njamba ya ita, akĩũraga Maaseia mũrũ wa mũthamaki na Azirikamu, ũrĩa warũgamagĩrĩra nyũmba ya mũthamaki, na Elikana, ũrĩa warĩ wa kerĩ kuuma harĩ mũthamaki
Makĩria ma ũguo, ciana cia Isiraeli ikĩnyita andũ 200,000 mĩgwate gatagatĩ-inĩ ka ariũ a ithe wacio—atumia, anake, na airĩtu; ningĩ cigĩtaha indo nyingĩ, na indo icio ciatahire igĩcitwara Samaria.
No kũu nĩ kwarĩ na mũnabii wa Yahweh wetagwo Odedi. Nake agĩthiĩ mbere ya mbũtũ ĩyo yokaga Samaria akĩmeera ũũ: “Atĩrĩrĩ, Yahweh Kĩhoti wa maithe manyu ma tene aneanĩte Yahuda guoko-inĩ kwanyu tondũ nĩ arakarĩtio nĩo, na inyuĩ mũmoragĩte mũrĩ na marakara, namo magakinya o nginya igũrũ
Na rĩu mũrenda gũtua andũ a Yahuda na Yahrushalayim ndungata cianyu cia arũme na cia andũ-a-nja. No rĩrĩ, githĩ o na inyuĩ mũtirĩ na mahĩtia mbere ya Yahweh Kĩhoti wanyu
Rĩu-rĩ, thikĩrĩriai na mũcokie andũ acio mũnyitĩte mĩgwate gatagatĩ-inĩ ka ariũ a ithe wanyu, tondũ marakara mahiũ ma Yahweh nĩ mamũũkĩrĩire.”
Hĩndĩ ĩyo anene amwe a Aefiraimu, Azaria mũrũ wa Jehohanani, Berekia mũrũ wa Meshilemothu, Jehizikia mũrũ wa Shalumu, na Amasa mũrũ wa Hadilai, makĩng’ethera andũ arĩa maaingĩraga moimĩte mbaara-inĩ,
makĩmeera atĩrĩ: “Mũtikaingĩrie mĩgwate ĩyo gũkũ, tondũ ũndũ ũcio nĩ ũgũtũma tũkorũo na mahĩtia mbere ya Yahweh. Ũndũ ũrĩa mũrenda gwĩka ũkuongerera mehia maitũ na mahĩtia maitũ, nĩ gũkorũo o na rĩu mahĩtia maitũ nĩ maingĩ na marakara mahiũ nĩ mokĩrĩire Isiraeli.”
Nĩ ũndũ ũcio thigari icio ciarĩ na matharaita ikĩneana mĩgwate ĩyo na indo iria ciatahĩtwo kũrĩ anene na kũrĩ kĩũngano gĩothe
Nao arũme arĩa maathuurĩtwo makagwetwo na rĩĩtwa makĩarahũka na makĩoya mĩgwate ĩyo, nao arĩa othe maarĩ njaga gatagatĩ-inĩ kao makĩmahe nguo kuuma harĩ indo iria ciatahĩtwo. Magĩkĩmahumba na makĩmahe iratũ, irio na kĩndũ gĩa kũnyua, na maguta ma kwĩhaka. Ningĩ arĩa mataarĩ na hinya makĩmakuua na ndigiri makĩmatwara kũrĩ ariũ a ithe wao kũu Jeriko, itũũra rĩa mĩtĩ ya mĩkĩndũ. Thutha ũcio magĩcoka Samaria.
Ihinda-inĩ rĩu, Mũthamaki Ahazu akĩhoya athamaki a Ashuri ũteithio
Na o rĩngĩ Aedomu magĩũkĩrĩra na magĩtharĩkĩra Yahuda o na makĩnyita andũ mĩgwate
O nao Afilisti magĩtharĩkĩra matũũra ma Shefela na Negebu kũu Yahuda na magĩtaha Bethi-shemeshi, Aijaloni, Gederothu, Soko na taũni iria ciamĩthiũrũrũkĩirie, Timina na taũni iria ciamĩthiũrũrũkĩirie, na Gimizo na taũni iria ciamĩthiũrũrũkĩirie; na magĩikara kuo
Yahweh agĩconorithia andũ a Yahuda nĩ ũndũ wa Mũthamaki Ahazu wa Isiraeli, tondũ nĩ aarekereirie andũ a Yahuda makarema, ũndũ ũcio ũgĩtũma mage kwĩhokeka harĩ Yahweh na njĩra nene.
Mũthia-inĩ Mũthamaki Tiligathu-pilineseru wa Ashuri agĩthiĩ kũmũũkĩrĩra na agĩtũma agĩe na mĩtangĩko ithenya rĩa kũmwĩkĩra hinya
Nĩ gũkorũo Ahazu nĩ ooete indo ciothe cia nyũmba ya Yahweh na nyũmba ya mũthamaki na nyũmba cia anene agacineana irĩ kĩheo kũrĩ mũthamaki wa Ashuri; no ũndũ ũcio ndwamũteithirie
Na ihinda-inĩ rĩu aarĩ na mĩtangĩko, Mũthamaki Ahazu eekire maũndũ matarĩ ma wĩhokeku harĩ Yahweh o na makĩria
Akĩambĩrĩria kũrutĩra ihoti cia Dameski magongona, o icio ciamũhootete, na agĩthiĩ na mbere kuuga ũũ: “Tondũ ihoti cia athamaki a Siria nĩ iramateithia, nĩ ngũcirutĩra magongona nĩguo cindeithie.” No igĩtũma we hamwe na andũ othe a Isiraeli mahĩngĩke
Makĩria ma ũguo, Ahazu agĩcokanĩrĩria indo cia nyũmba ya Kĩhoti ũrĩa wa ma; agĩcoka agĩtinangia indo cia nyũmba ya Kĩhoti ũrĩa wa ma tũcunjĩ, akĩhinga mĩrango ya nyũmba ya Yahweh, na agĩĩthondekera igongona kona-inĩ ciothe cia Yahrushalayim
Na matũũra-inĩ mothe ma Yahuda, agĩthondeka kũndũ gũtũũgĩru gwa kũrutĩra ihoti ingĩ ndogo ya magongona, na akĩrakaria Yahweh Kĩhoti wa maithe make ma tene.
Ha ũhoro wa maũndũ macio mangĩ mamwĩgiĩ, maũndũ mothe marĩa eekire kuuma kĩambĩrĩria nginya mũthia, nĩ maandĩke thĩinĩ wa Ibuku rĩa Athamaki a Yahuda na a Isiraeli
Thutha ũcio Ahazu akĩhurũkio hamwe na maithe make ma tene, na makĩmũthika thĩinĩ wa itũũra rĩa Yahrushalayim, nĩ gũkorũo matiamũtwarire kũndũ kũrĩa athamaki a Isiraeli maathikagwo. Na mũrũwe Hezekia agĩtuĩka mũthamaki ithenya rĩake.