Maũndũ ma Matukũ wa Keerĩ 35

Na rĩrĩ, Josia nĩ aakũngũĩire Bathaka ya Yahweh thĩinĩ wa Yahrushalayim, na magĩthĩnja igongona rĩa Bathaka mũthenya wa 14 wa mweri wa mbere

Akĩamũra athĩnjĩri-Yahweh mawĩra-inĩ mao na akĩmekĩra ngoro mahingie ũtungata wao wa nyũmba ya Yahweh

Agĩcoka akĩĩra Alawii, arĩa maarĩ arutani a andũ othe a Isiraeli, o acio maamũrĩirũo Yahweh atĩrĩ: “Igai Ithandũkũ rĩrĩa rĩamũre thĩinĩ wa nyũmba ĩrĩa Suleimani mũrũ wa Daudi mũthamaki wa Isiraeli aakire; mũtiagĩrĩirũo gũcoka kũrĩkuua na ciande. Rĩu tungatĩrai Yahweh Kĩhoti wanyu na andũ ake Isiraeli

Na mwĩhaarĩrie kũringana na nyũmba cia maithe manyu na ũrĩa ikundi cianyu itariĩ, mũkĩrũmĩrĩra ũrĩa kwaandĩkirũo nĩ Mũthamaki Daudi wa Isiraeli na mũrũ wake Suleimani

Mũrũgame handũ harĩa hamũre mũrĩ ikundi kũringana na nyũmba cia maithe ma ariũ a ithe wanyu, andũ acio angĩ, na harĩ o nyũmba gũkorũo na gĩkundi kĩa Alawii kuuma harĩ nyũmba ya maithe mao

Mũthĩnje igongona rĩa Bathaka na mwĩyamũrĩre Yahweh na mũhaarĩrie maũndũ nĩ ũndũ wa ariũ a ithe wanyu nĩguo mũhingie kiugo kĩa Yahweh kĩrĩa aaheanire kũgerera Musa.”

Josia nĩ aaheire andũ ndũũru, akĩheana tũtũrũme na tũthenge twa magongona ma Bathaka nĩ ũndũ wa andũ arĩa othe maarĩ ho, ciothe irĩ 30,000, o hamwe na ng’ombe 3,000. Icio ciaheanirũo kuuma harĩ indo cia mũthamaki we mwene

Anene ake o nao nĩ maarutire indo irĩ magongona ma kwĩyendera nĩ ũndũ wa andũ, athĩnjĩri-Yahweh, na Alawii. Nao Hilikia, Zakaria, na Jehieli, arĩa maarĩ atongoria a nyũmba ya Kĩhoti ũrĩa wa ma, makĩhe athĩnjĩri-Yahweh magongona ma Bathaka 2,600 na ng’ombe 300.

Nake Konania na ariũ a ithe Shemaia na Nethaneli, o hamwe na Hashabia, Jeieli, Jozabadu, anene a Alawii, makĩhe Alawii magongona ma Bathaka 5,000 na ng’ombe 500.

Wĩra wa gũtungata ũkĩhaarĩrio, na athĩnjĩri-Yahweh makĩrũgama handũ hao o na Alawii kũringana na ikundi ciao, o ta ũrĩa mũthamaki aathanĩte

Magĩthĩnja magongona ma Bathaka, nao athĩnjĩri-Yahweh makĩminjaminjia thakame ĩrĩa maamũkĩrire kuuma harĩ o, hĩndĩ ĩyo Alawii maarutaga nyamũ icio njũũa

Thutha ũcio makĩhaarĩria magongona ma njino nĩguo mamaheane kũrĩ andũ acio angĩ, arĩa maaigĩtwo na ikundi kũringana na nyũmba cia maithe mao, nĩguo marutĩrũo Yahweh o ta ũrĩa kwandĩkĩtwo thĩinĩ wa ibuku rĩa Musa; na magĩka o ta ũguo na ng’ombe

Makĩruga igongona rĩa Bathaka igũrũ rĩa mwaki kũringana na mũtugo; na makĩrugĩra magongona marĩa mamũre nyũngũ-inĩ, thaburia, na ngĩo, magĩcoka magĩtwara o narua kũrĩ andũ acio angĩ othe

Thutha ũcio makĩhaarĩria igongona nĩ ũndũ wao ene na nĩ ũndũ wa athĩnjĩri-Yahweh, tondũ athĩnjĩri-Yahweh, o acio njiarũa cia Haruni maarutaga magongona ma njino na icunjĩ cia maguta nginya ũtukũ, kwoguo Alawii makĩhaarĩria igongona nĩ ũndũ wao ene na nĩ ũndũ wa athĩnjĩri-Yahweh, o acio njiarũa cia Haruni.

Nao aini, arĩa maarĩ ariũ a Asafu, maarũgamĩte handũ hao kũringana na rĩathani rĩa Daudi, Asafu, Hemani, na Jeduthuni ũrĩa woonagĩra mũthamaki cioneki; nao arangĩri a ihingo maarĩ ihingo-inĩ itiganĩte. Matiabataraga gũtigana na ũtungata wao, tondũ ariũ a ithe wao Alawii nĩ maahaaragĩria nĩ ũndũ wao

Kwoguo mawĩra mothe ma ũtungata wa Yahweh makĩhaarĩrio mũthenya ũcio nĩguo makũngũĩre Bathaka na marute magongona ma njino igũrũ rĩa kĩgongona kĩa Yahweh, kũringana na ũrĩa Mũthamaki Josia aathanĩte.

Ciana cia Isiraeli irĩa ciarĩ ho igĩkũngũĩra Bathaka hĩndĩ ĩyo na Gĩathĩ kĩa Mĩgate Ĩtarĩ Mĩimbie ihinda rĩa thikũ mũgwanja

Gũtiakũngũĩirũo Bathaka ĩngĩ ta ĩyo thĩinĩ wa Isiraeli kuuma matukũ-inĩ ma Samueli ũrĩa mũnabii; o na gũtirĩ mũthamaki ũngĩ wa Isiraeli wakũngũĩire Bathaka ta ĩyo yakũngũĩirũo nĩ Josia, athĩnjĩri-Yahweh, Alawii, andũ othe a Yahuda na Isiraeli arĩa maarĩ ho, na aikari a Yahrushalayim

Bathaka ĩyo yakũngũĩirũo mwaka-inĩ wa 18 wa wathani wa Josia.

Thutha wa maũndũ macio mothe, rĩrĩa Josia aakorirũo ahaarĩirie hekarũ, Mũthamaki Neko wa Misiri nĩ aambatire nĩguo akarũĩre mbaara Karikemishi hakuhĩ na Rũũĩ rwa Farati. Nake Josia akiumagara akarũe nake

Nĩ ũndũ ũcio, Mũthamaki Neko akĩmũtũmĩra atũmwo, akiuga atĩrĩ: “Ũndũ ũyũ ũgũkoniĩ atĩa, wee mũthamaki wa Yahuda? Ũmũthĩ tiwe ndĩroka kũrũa nawe, no mbaara yakwa yerekeirio harĩ nyũmba ĩngĩ, na Kĩhoti oigĩte atĩ njagĩrĩirũo gwĩka narua. Nĩgetha ndũkone ũũru-rĩ, tiga kũregana na Kĩhoti, o ũcio ũrĩ hamwe na niĩ, tondũ waga gwĩka ũguo nĩ egũkũrehera mwanangĩko.”

No rĩrĩ, Josia ndaatiganire nake, no eegarũrire ndakamenyeke nĩguo arũe nake na ndaathikĩrĩirie ciugo cia Neko, iria cioimĩte kanua-inĩ ga Kĩhoti. Nĩ ũndũ ũcio, agĩthiĩ kũrũa Werũ-inĩ wa Megido.

Nao aikia a mĩguĩ makĩratha Mũthamaki Josia, nake mũthamaki akĩĩra ndungata ciake atĩrĩ: “Njeheriai gũkũ, nĩ gũkorũo ndĩ mũgurarie mũno.”

Nĩ ũndũ ũcio, ndungata ciake ikĩmũruta ngaari-inĩ ĩyo ya mbaara na ikĩmũkuua na ngaari yake ya kerĩ ya mbaara ikĩmũtwara Yahrushalayim. Agĩgĩkua na agĩthikwo mbĩrĩra-inĩ ya maithe make ma tene, na andũ othe a Yahuda na Yahrushalayim magĩcakaĩra Josia

Na Jeremia akĩina rwĩmbo rwa gũcakaĩra Josia, na aini othe arũme na andũ-a-nja nginya ũmũthĩ ũyũ nĩ mainaga igũrũ rĩgiĩ Josia nyĩmbo-inĩ ciao cia macakaya; na gũgĩtuwo itua atĩ nyĩmbo icio ciinagwo thĩinĩ wa Isiraeli, na nĩ nyandĩke hamwe na nyĩmbo cia macakaya.

Ha ũhoro wa maũndũ macio mangĩ megiĩ Josia, na ciĩko ciake njega harĩ kũrũmĩrĩra ũrĩa kwandĩkĩtwo thĩinĩ wa Watho wa Yahweh,

na ũrĩa eekire, kuuma kĩambĩrĩria nginya mũthia, nĩ maandĩke thĩinĩ wa Ibuku rĩa Athamaki a Isiraeli na a Yahuda.