Maũndũ ma Matukũ wa Keerĩ 8

Mũthia-inĩ wa mĩaka 20, ihinda-inĩ rĩrĩa Suleimani aakire nyũmba ya Yahweh na nyũmba yake mwene,

Suleimani nĩ aakire rĩngĩ matũũra marĩa Hiramu aaheete Suleimani na akĩiga andũ a Isiraeli maikarage kuo

Ningĩ Suleimani agĩthiĩ Hamathu-zoba na agĩtaha itũũra rĩu

Agĩcoka agĩaka Tadimori werũ-inĩ na matũũra mothe ma kũiga indo marĩa aakĩte Hamathu

Ningĩ agĩaka Bethi-horoni ya Rũgongo na Bethi-horoni ya Kĩanda, matũũra marĩ na ũgitĩri marĩa maarĩ na thingo, ihingo, na mĩgamba,

na itũũra rĩa Baalathu o hamwe na matũũra mothe marĩa Suleimani aaigaga indo, matũũra mothe ma ngaari cia mbarathi, matũũra ma atwarithia a mbarathi, na kĩrĩa gĩothe Suleimani eerirĩirie gwaka Yahrushalayim, Lebanoni, na bũrũri-inĩ wothe kũrĩa aathanaga.

Nao andũ othe arĩa maatigarire kuuma harĩ Ahiti, Aamori, Aperizi, Ahivi, na Ajebusi, arĩa mataarĩ a Isiraeli,

njiarũa ciao iria ciatigarire bũrũri-inĩ—iria andũ a Isiraeli mataaniinĩte—ciaathirũo nĩ Suleimani irutage wĩra mũritũ nginyagia ũmũthĩ

Ĩndĩ Suleimani ndaigana gũtua Mũisiraeli o na ũmwe ngombo ya wĩra wake, nĩ gũkorũo nĩo maarĩ njamba ciake cia ita, anene a atongoria ake a mbũtũ, na anene a atwarithia ake a ngaari cia mbarathi na atwarithia a mbarathi

Kwarĩ na anene 250 a atongoria a Mũthamaki Suleimani, anyabara a kũrũgamĩrĩra andũ.

Ningĩ Suleimani akĩambatia mwarĩ wa Firauni kuuma Itũũra-inĩ rĩa Daudi akĩmũtwara nyũmba-inĩ ĩrĩa aamwakĩire, nĩ gũkorũo ooigire atĩrĩ: “O na gũtuĩka nĩ mũtumia wakwa, ndagĩrĩirũo gũikara nyũmba-inĩ ya Mũthamaki Daudi wa Isiraeli, tondũ kũndũ kũrĩa Ithandũkũ rĩa Yahweh rĩũkĩte nĩ kwamũre.”

Suleimani agĩcoka akĩrutĩra Yahweh magongona ma njino igũrũ rĩa kĩgongona kĩa Yahweh kĩrĩa aakĩte mbere ya gĩthaku

Akĩrũmĩrĩra ũrĩa gwekagwo o mũthenya na akĩruta magongona kũringana na rĩathani rĩa Musa rĩgiĩ Thabatũ, tũrũgamo twa mweri, na ciathĩ nyamũre iria ciekagwo maita matatũ harĩ mwaka—Gĩathĩ kĩa Mĩgate Ĩtarĩ Mĩimbie, Gĩathĩ gĩa Ciumia, na Gĩathĩ gĩa Ithũnũ

Ningĩ akĩamũra ikundi cia athĩnjĩri-Yahweh nĩ ũndũ wa ũtungata wao kũringana na watho wa ithe Daudi, na Alawii nĩ ũndũ wa harĩa maarutagĩra wĩra, nĩguo magoocage na magatungata marĩ mbere ya athĩnjĩri-Yahweh kũringana na ũrĩa gwekagwo o mũthenya, na arangĩri a ihingo ikundi-inĩ ciao nĩ ũndũ wa ihingo itiganĩte, nĩ gũkorũo rĩu nĩrĩo rĩarĩ rĩathani rĩa Daudi, mũndũ wa Kĩhoti ũrĩa wa ma

Na matiatiganĩirie rĩathani rĩa mũthamaki kũrĩ athĩnjĩri-Yahweh na Alawii ũhoro-inĩ wĩgiĩ ũndũ o wothe kana ũhoro-inĩ wĩgiĩ thitoo

Kwoguo wĩra wothe wa Suleimani nĩ wabangĩtwo wega, kuuma mũthenya ũrĩa mũthingi wa nyũmba ya Yahweh waakirũo nginya rĩrĩa yarĩkire. Nĩ ũndũ ũcio nyũmba ya Yahweh ĩkĩrĩka.

Hĩndĩ ĩyo nĩrĩo Suleimani aathiire Ezioni-geberi na Elothu, rũteere-inĩ rwa iria bũrũri-inĩ wa Edomu

Hiramu akĩmũtũmĩra meri o hamwe na aruti wĩra a meri arĩa maarĩ na ũmenyeru akĩhũthĩra ndungata ciake mwene. Magĩthiĩ Ofiri hamwe na ndungata cia Suleimani na makĩruta taranda 450 cia thahabu kuo magĩtwarĩra Mũthamaki Suleimani.