Maũndũ ma Matukũ wa Mbere 10

Na rĩrĩ, Afilisti makĩrũa na Isiraeli. Nao arũme a Isiraeli makĩũrĩra Afilisti, na aingĩ ao makĩũragĩrũo Kĩrĩma-inĩ kĩa Giliboa

Afilisti magĩgĩthiĩ o makuhĩrĩirie Saulu na ariũ ake, na Afilisti acio makĩũraga Jonathani, Abinadabu, na Maliki-shua, ariũ a Saulu

Mbaara ĩyo ĩkĩneneha mũno ĩkĩhatĩrĩria Saulu, nao aikia a mĩguĩ makĩmuona, na aikia acio a mĩguĩ makĩmũguraria ũũru mũno

Saulu agĩkĩĩra mũndũ ũrĩa wamũkuuagĩra indo cia mbaara atĩrĩ: “Comora rũhiũ rwaku rwa njora ũndũrĩkanie naruo, nĩgetha arũme aya matarĩ aruu matigoke maanyamarie.” No mũndũ ũcio wamũkuuagĩra indo cia mbaara ndeendaga gwĩka ũguo, tondũ aarĩ na guoya mũno. Nĩ ũndũ ũcio Saulu akĩoya rũhiũ rwa njora na akĩrũgũĩra

Rĩrĩa mũndũ ũcio wamũkuuagĩra indo cia mbaara oonire Saulu nĩ akua, o nake akĩgũĩra rũhiũ rwake rwa njora agĩkua

Nĩ ũndũ ũcio Saulu na ariũ ake atatũ, na andũ othe a nyũmba yake magĩkua hamwe

Rĩrĩa andũ othe a Isiraeli arĩa maarĩ mũkuru-inĩ moonire atĩ andũ othe nĩ mora na atĩ Saulu na ariũ ake nĩ makua, magĩtiganĩria matũũra mao na makĩũra; nao Afilisti magĩthiĩ gũikaraga matũũra-inĩ macio.

Mũthenya ũyũ ũngĩ rĩrĩa Afilisti maathiire kũbora andũ acio mooragĩtwo, magĩkora Saulu na ariũ ake marĩ akuũ kũu Kĩrĩma-inĩ kĩa Giliboa

Magĩkĩmũbora na makĩmũrenga mũtwe na makĩoya indo ciake cia mbaara, na magĩtũma ndũmĩrĩri bũrũri-inĩ wothe wa Afilisti atĩ ũhoro ũcio ũtheremio kũrĩ mĩhianano yao na kũrĩ andũ

Magĩcoka makĩiga indo icio ciake cia mbaara nyũmba-inĩ ya hoti yao na makĩoherera ihĩndĩ rĩake rĩa mũtwe nyũmba-inĩ ya Dagoni.

Rĩrĩa andũ othe a Jabeshi thĩinĩ wa Gileadi maaiguire ũrĩa wothe Afilisti meekĩte Saulu,

njamba ciothe cia ita ikĩarahũka igĩkuua kĩimba gĩa Saulu hamwe na ciimba cia ariũ ake. Makĩmatwara Jabeshi na magĩthika mahĩndĩ mao rungu rwa mũtĩ mũnene kũu Jabeshi, na makĩĩhinga kũrĩa thikũ mũgwanja.

Saulu agĩgĩkua nĩ ũndũ wa ũrĩa aagararire watho wa Yahweh nĩ ũndũ ndaathĩkĩire uuge wa Yahweh, ningĩ nĩ ũndũ wa gũtuĩria ũhoro harĩ mũndũ warĩ na roho wa ũragũri

handũ ha gũtuĩria ũhoro harĩ Yahweh. Nĩ ũndũ ũcio Akĩmũũraga na akĩneana ũthamaki kũrĩ Daudi mũrũ wa Jesii. 1