Maũndũ ma Matukũ wa Mbere 15

Daudi agĩgĩthiĩ na mbere gwaka nyũmba ciake Itũũra-inĩ rĩa Daudi, na akĩhaarĩria handũ nĩ ũndũ wa Ithandũkũ rĩa Kĩhoti ũrĩa wa ma na akĩamba hema nĩ ũndũ warĩo

Hĩndĩ ĩyo nĩrĩo Daudi ooigire atĩrĩ: “Gũtirĩ mũndũ wagĩrĩirũo gũkuua Ithandũkũ rĩa Kĩhoti ũrĩa wa ma o tiga Alawii, nĩ gũkorũo nĩo Yahweh athuurĩte makuuage Ithandũkũ rĩa Yahweh na mamũtungatagĩre hingo ciothe.”

Daudi agĩcoka agĩcokanĩrĩria andũ othe a Isiraeli kũu Yahrushalayim nĩguo mambatie Ithandũkũ rĩa Yahweh marĩtware harĩa aahaarĩirie nĩ ũndũ warĩo.

Daudi agĩcokanĩrĩria njiarũa cia Haruni na Alawii:

kuuma harĩ Akohathu, Urieli ũrĩa warĩ mũnene na ariũ a ithe wao 120;

kuuma harĩ Amerari, Asaia ũrĩa warĩ mũnene na ariũ a ithe wao 220;

kuuma harĩ Agerishomu, Joeli ũrĩa warĩ mũnene na ariũ a ithe wao 130;

kuuma harĩ njiarũa cia Elizafani, Shemaia ũrĩa warĩ mũnene na ariũ a ithe wao 200;

kuuma harĩ njiarũa cia Hebironi, Elieli ũrĩa warĩ mũnene na ariũ a ithe wao 80;

kuuma harĩ njiarũa cia Uzieli, Aminadabu ũrĩa warĩ mũnene na ariũ a ithe wao 112.

Ningĩ Daudi agĩta athĩnjĩri-Yahweh Zadoku na Abiatharu na Alawii Urieli, Asaia, Joeli, Shemaia, Elieli, na Aminadabu,

akĩmeera atĩrĩ: “Inyuĩ nĩ inyuĩ atongoria a nyũmba cia maithe manyu cia Alawii. Mwĩyamũrei, inyuĩ o hamwe na ariũ a ithe wanyu, mũcoke mwambatie Ithandũkũ rĩa Yahweh Kĩhoti wa Isiraeli mũrĩrehe harĩa haarĩirie nĩ ũndũ warĩo

Tondũ mũtiarĩkuuire riita rĩrĩa rĩa mbere-rĩ, marakara ma Yahweh Kĩhoti witũ nĩ maatũrĩrĩmbũkĩire, nĩ gũkorũo tũtiatuĩririe mũtaratara ũrĩa wagĩrĩire.”

Nĩ ũndũ ũcio athĩnjĩri-Yahweh na Alawii makĩyamũrĩra Yahweh nĩguo makambatie Ithandũkũ rĩa Yahweh Kĩhoti wa Isiraeli.

Alawii magĩgĩkuua Ithandũkũ rĩu rĩa Kĩhoti ũrĩa wa ma na mĩtĩ yarĩo marĩigĩrĩire ciande-inĩ ciao, o ta ũrĩa Musa aathanĩte kũgerera kiugo kĩa Yahweh

Daudi agĩcoka akĩra anene a Alawii mathuure ariũ a ithe wao arĩa aini nĩguo maine makenete, na maine na indo cia ũini: inanda cia ndigi, inanda cia mũgeeto, na thani iria ihũũrithanagio.

Nĩ ũndũ ũcio Alawii magĩthuura Hemani mũrũ wa Joeli, na kuuma harĩ ariũ a ithe wao, Asafu mũrũ wa Berekia, na kuuma harĩ ariũ a ithe wao Amerari, Ethani mũrũ wa Kushaia

Na maarĩ hamwe na ariũ a ithe wao a gĩkundi gĩa kerĩ, Zakaria, Beni, Jaazieli, Shemiramothu, Jehieli, Uni, Eliabu, Benaia, Maaseia, Matithia, Elifelehu, na Mikineia na Obedi-edomu na Jeieli arangĩri a ihingo

Aini Hemani, Asafu, na Ethani maarĩ a kũhũũrithania thani cia gĩcango iria ihũũrithanagio;

na Zakaria, Azieli, Shemiramothu, Jehieli, Uni, Eliabu, Maaseia, na Benaia maahũũraga inanda cia ndigi na mũgambo wa Alamothu;

na Matithia, Elifelehu, Mikineia, Obedi-edomu, Jeieli, na Azazia maahũũraga inanda cia mũgeeto na mũgambo wa Sheminithu, magakorũo marĩ arũgamĩrĩri

Kenania mũnene wa Alawii aarũgamagĩrĩra wĩra wa ũkuui, nĩ gũkorũo aarĩ njorua yaguo,

na Berekia na Elikana maarĩ arangĩri a ihingo nĩ ũndũ wa Ithandũkũ

Athĩnjĩri-Yahweh Shebania, Joshafatu, Nethaneli, Amasai, Zakaria, Benaia, na Eliezeri maahuuhaga tũrumbeta na mũgambo mũnene marĩ mbere ya Ithandũkũ rĩa Kĩhoti ũrĩa wa ma, na Obedi-edomu na Jehia o nao maatungataga marĩ arangĩri a ihingo nĩ ũndũ wa Ithandũkũ.

Nake Daudi hamwe na athuri a Isiraeli na anene a andũ ngiri maathiaga magereire mwena-inĩ nĩguo mambatie ithandũkũ rĩa kĩrĩkanĩro kĩa Yahweh kuuma nyũmba-inĩ ya Obedi-edomu makenete mũno

Rĩrĩa Kĩhoti ũrĩa wa ma aateithirie Alawii arĩa maakuuĩte ithandũkũ rĩa kĩrĩkanĩro kĩa Yahweh, makĩruta igongona rĩa tũtegwa mũgwanja na ndũrũme mũgwanja

Daudi eehumbĩte kagooti gatarĩ moko ka ngora ĩrĩa njega, o ta Alawii othe arĩa maakuuĩte Ithandũkũ rĩu, aini, na Kenania mũnene wa ũkuui na wa aini; ningĩ Daudi nĩ eehumbĩte ebodi ya gatani

Andũ a Isiraeli othe magĩkĩrehe ithandũkũ rĩa kĩrĩkanĩro kĩa Yahweh makiugagĩrĩria makenete, makĩhuuhaga coro, na marĩ na tũrumbeta, na thani iria ihũũrithanagio, makĩhũũraga inanda cia ndigi na inanda cia mũgeeto na mũgambo mũnene.

No rĩrĩa ithandũkũ rĩa kĩrĩkanĩro kĩa Yahweh rĩakinyire Itũũra-inĩ rĩa Daudi, Mikali mwarĩ wa Saulu agĩcũthĩrĩria thĩ ndirica-inĩ akĩona Mũthamaki Daudi akĩrũgarũga na agĩkũngũĩra; na akĩambĩrĩria kũmũnyarara ngoro-inĩ yake.