Maũndũ ma Matukũ wa Mbere 16
Magĩgĩkinyia Ithandũkũ rĩa Kĩhoti ũrĩa wa ma na makĩrĩiga thĩinĩ wa hema ĩrĩa Daudi aambĩte nĩ ũndũ warĩo; na makĩruta magongona ma njino o hamwe na magongona ma ũiguano mbere ya Kĩhoti ũrĩa wa ma
Rĩrĩa Daudi aarĩkirie kũruta magongona ma njino na magongona ma ũiguano, akĩrathima andũ thĩinĩ wa rĩĩtwa rĩa Yahweh
Nao andũ a Isiraeli othe, arũme o na andũ-a-nja, mũndũ o mũndũ akĩmahe mũgate ũmwe na gĩcunjĩ kĩa nyama, o na gĩkũmba gĩa thabibũ nyũmũ
Agĩcoka akĩamũra Alawii amwe matungatage mbere ya Ithandũkũ rĩa Yahweh, mandĩkage, macokagie ngatho, na makagooca Yahweh Kĩhoti wa Isiraeli
Asafu nĩwe warĩ mũtongoria, na wa kerĩ kuuma harĩ we aarĩ Zakaria; na Jeieli, Shemiramothu, Jehieli, Matithia, Eliabu, Benaia, Obedi-edomu, na Jeieli maahũũraga inanda cia ndigi na inanda cia mũgeeto; na Asafu aahũũrithanagia thani iria ihũũrithanagio,
nao Benaia na Jahazieli athĩnjĩri-Yahweh maahuuhaga tũrumbeta hĩndĩ ciothe mbere ya ithandũkũ rĩa kĩrĩkanĩro gĩa Kĩhoti ũrĩa wa ma.
Mũthenya ũcio nĩguo Daudi aarutire rwĩmbo riita rĩa mbere rwa gũcokia ngatho harĩ Yahweh kũgerera Asafu na ariũ a ithe:
“Cokeriai Yahweh ngatho, kaĩrai rĩĩtwa rĩake, Menyithaniai mawĩko make gatagatĩ-inĩ ka ikundi cia andũ!
Mũinĩrei, inai nyĩmbo cia kũmũgooca, Mwĩcũraniei igũrũ rĩgiĩ mawĩra make mothe ma magegania.
Mwĩrahei nĩ ũndũ wa rĩĩtwa rĩake rĩamũre. Ngoro cia arĩa macaragia Yahweh nĩ icanjamũke.
Caragiai Yahweh o na hinya wake. Caragiai ũthiũ wake hingo ciothe.
Ririkanai mawĩra ma magegania marĩa ekĩte, O na ciama ciake na matuĩro marĩa amenyithanĩtie,
Inyuĩ mbeũ ya Isiraeli ndungata yake, Inyuĩ ariũ a Jakubu, o inyuĩ aathuurire.
We nĩ Yahweh Kĩhoti witũ. Matuĩro make ma ciira marĩ kũndũ guothe thĩinĩ wa thĩ.
Ririkanai kĩrĩkanĩro gĩake tene na tene, Kĩĩranĩro kĩrĩa eerĩire nginya njiarũa ngiri,
Kĩrĩkanĩro kĩrĩa aarĩkanĩire na Iburahimu, Na mwĩhĩtwa ũrĩa eehĩtĩire Isaaka,
Ũrĩa aahandire ũrĩ ta watho harĩ Jakubu Na ũrĩ kĩrĩkanĩro gĩa gũtũũra harĩ Isiraeli,
Akiuga atĩrĩ, ‘Nĩ ngaakũhe bũrũri wa Kanaani Ũtuĩke igai rĩanyu rĩrĩa mũgaĩirũo.’
Hĩndĩ ĩyo nĩ rĩrĩa mwarĩ o andũ anini, Andũ anini mũno, na mwarĩ ageni bũrũri-inĩ.
Maathiaga kuuma bũrũri ũmwe nginya ũrĩa ũngĩ, Kuuma ũthamaki ũmwe nginya kũrĩ andũ angĩ.
Ndeetĩkĩririe mũndũ o wothe amahinyĩrĩrie, No nĩ aarũithirie athamaki nĩ ũndũ wao,
Akiuga ũũ, ‘Mũtikahutie arĩa akwa aitĩrĩrie maguta, Na mũtigeke anabii akwa ũndũ mũũru.’
Inĩrai Yahweh, inyuĩ thĩ yothe! Menyithaniai ũhoro wĩgiĩ ũhonokio wake o mũthenya o mũthenya!
Menyithaniai riri wake gatagatĩ-inĩ ka ndũrĩrĩ, Mũmenyithanie mawĩra make ma magegania gatagatĩ-inĩ ka ikundi ciothe cia andũ.
Nĩ gũkorũo Yahweh nĩ mũnene na nĩ agĩrĩire mũno kũgoocagwo Nĩ wa gwĩtigĩrũo gũkĩra ihoti iria ingĩ ciothe.
Ihoti ciothe cia ikundi cia andũ nĩ ihoti itarĩ kĩene, Ĩndĩ Yahweh nĩwe wombire igũrũ.
Mbere yake hakoragwo na ũnene na riri; Hinya na gĩkeno ikoragwo thĩinĩ wa gĩikaro gĩake.
Hei Yahweh kĩrĩa kĩmwagĩrĩire, inyuĩ mbarĩ cia ikundi cia andũ, Hei Yahweh kĩrĩa kĩmwagĩrĩire tondũ wa riri o na hinya wake.
Hei Yahweh riri ũrĩa wagĩrĩire rĩĩtwa rĩake; Rehei kĩheo na mũũke mbere yake. Inamĩrĩrai Yahweh mwĩhumbĩte nguo nyamũre.
Inainai mũrĩ mbere yake, inyuĩ thĩ yothe! Thĩ nĩ ĩhandĩtwo ĩkarũma wega; ndĩngĩeherio.
Igũrũ nĩ rĩkene, nayo thĩ ĩcanjamũke; Menyithaniai ũũ gatagatĩ-inĩ ka ndũrĩrĩ: ‘Yahweh nĩ atuĩkĩte Mũthamaki!’
Iria nĩ rĩrurume o na kĩrĩa gĩothe kĩiyũrĩte thĩinĩ warĩo; Mĩgũnda nĩ ĩkene hamwe na kĩrĩa gĩothe kĩrĩ thĩinĩ wayo.
Hĩndĩ o ro ĩyo mĩtĩ yothe ya mũtitũ nĩ yanĩrĩre ĩkenete mbere ya Yahweh, Nĩ gũkorũo nĩ aroka gũtuĩra thĩ ciira.
Cokeriai Yahweh ngatho, tondũ nĩ mwega; Tha ciake itũũraga tene na tene.
Na muuge, ‘Tũhonokie, wee Kĩhoti wa ũhonokio witũ, Tũcokanĩrĩrie na ũtũhonokie kuuma ndũrĩrĩ-inĩ, Nĩguo tũcokagĩrie rĩĩtwa rĩaku rĩamũre ngatho Na tũkenage nĩ ũndũ wa gũkũgooca.
Yahweh Kĩhoti wa Isiraeli arogoocwo Tene na tene.’” Na andũ othe makiuga, “Amein!” na makĩgooca Yahweh.
Daudi agĩcoka agĩtiga Asafu na ariũ a ithe hau mbere ya ithandũkũ rĩa kĩrĩkanĩro kĩa Yahweh matungatage hĩndĩ ciothe mbere ya Ithandũkũ rĩu, kũringana na ũrĩa gwekagwo o mũthenya
Obedi-edomu na ariũ a ithe, arĩa mũigana wao warĩ 68, na Obedi-edomu mũrũ wa Jeduthuni, na Hosa maarĩ arangĩri a ihingo;
na Zadoku mũthĩnjĩri-Yahweh na athĩnjĩri-Yahweh acio angĩ maarĩ mbere ya gĩikaro kĩrĩa kĩamũre kĩa Yahweh thĩinĩ wa handũ harĩa hatũũgĩru kũu Gibeoni
nĩgetha marutagĩre Yahweh magongona ma njino hĩndĩ ciothe kĩgongona-inĩ kĩa magongona ma njino, rũcinĩ na hwaĩ-inĩ, na mekage maũndũ marĩa mothe mandĩkĩtwo Watho-inĩ wa Yahweh marĩa aathire Isiraeli.
Maarĩ hamwe na Hemani na Jeduthuni na arũme acio angĩ maamũrĩtwo na magathuurũo na marĩĩtwa mao marĩ a gũcokeria Yahweh ngatho, tondũ “tha ciake itũũraga tene na tene”;
na maarĩ hamwe na Hemani na Jeduthuni marĩ a kũhuuha tũrumbeta, kũhũũrithania thani iria ihũũrithanagio, na indo cia ũini iria ihũthagĩrũo kũgooca Kĩhoti ũrĩa wa ma; nao ariũ a Jeduthuni maakoragwo kĩhingo-inĩ
Thutha ũcio andũ othe makĩinũka kwao mĩciĩ, na Daudi agĩthiĩ kũrathima andũ a nyũmba yake.