Maũndũ ma Matukũ wa Mbere 17

Na rĩrĩa Daudi aaikarire gwake nyũmba, akĩĩra mũnabii Nathani ũũ: “Atĩrĩrĩ, njikaraga nyũmba-inĩ yakĩtwo na mĩtarakwa no ithandũkũ rĩa kĩrĩkanĩro kĩa Yahweh rĩikaraga rungu rwa itambaya cia hema.”

Nathani agĩcokeria Daudi ũũ: “Ĩka ũrĩa wothe ũrĩ ngoro-inĩ yaku, nĩ gũkorũo Kĩhoti ũrĩa wa ma arĩ hamwe nawe.”

Ũtukũ o ro ũcio, kiugo gĩa Kĩhoti gĩgĩkinyĩra Nathani, akĩmwĩra atĩrĩ:

“Thiĩ wĩre Daudi ndungata yakwa atĩrĩ, ‘Ũũ nĩguo Yahweh oigĩte: “Wee tiwe ũkũnjakĩra nyũmba ĩrĩa ndĩikaraga

Nĩ gũkorũo ndirĩ ndaikara thĩinĩ wa nyũmba kuuma mũthenya ũrĩa ndarutire andũ a Isiraeli Misiri nginyagia mũthenya ũyũ wa ũmũthĩ, ĩndĩ ndũũraga thaamathaamaga kuuma hema-inĩ ĩmwe nginya hema-inĩ ĩrĩa ĩngĩ na kuuma gĩikaro-inĩ kĩmwe kĩrĩa kĩamũre nginya kĩrĩa kĩngĩ

Ihinda-inĩ rĩrĩa rĩothe ndathiaga hamwe na andũ othe a Isiraeli-rĩ, hihi nĩ harĩ hĩndĩ ndaririe kiugo o na kĩmwe harĩ mũtiirĩrĩri bũrũri o na ũmwe wa Isiraeli harĩ arĩa ndaamũrire marĩithagie andũ akwa, ngiuga ũũ, ‘Mũregete kũnjakĩra nyũmba ya mĩtarakwa nĩkĩ?’”’

Rĩu ĩra Daudi ndungata yakwa atĩrĩ, ‘Ũũ nĩguo Yahweh mũnene wa ita oigĩte: “Ndakũrutire kũndũ gwa kũrĩithia, ũgĩtiga kũrũmĩrĩra rũũru, nĩguo ũtuĩke mũtongoria wa gũtongoragia andũ akwa Isiraeli

Na ndĩrĩkoragwo hamwe nawe kũrĩa guothe ũrĩthiaga, na nĩ ngũniina thũ ciaku ciothe ciehere mbere yaku; na nĩ ngũgũthondekera rĩĩtwa, o ta rĩĩtwa rĩa andũ arĩa marĩ igweta thĩinĩ wa thĩ

Nĩ ngũthuura kũndũ nĩ ũndũ wa andũ akwa Isiraeli na ndĩmahe maikarage kuo, na kũu nĩkuo megũtũũra na gũtirĩ hĩndĩ magaacoka gũthumbũrũo; na andũ arĩa aganu matikamahinyĩrĩria rĩngĩ ta ũrĩa meekaga ihinda-inĩ rĩrĩa ihĩtũku,

kuuma mũthenya ũrĩa ndaamũrire atiirĩrĩri bũrũri a gũtiirĩrĩra andũ akwa Isiraeli. Na nĩ ngũtooria thũ ciaku ciothe. Makĩria ma ũguo, ndĩrakwĩra ũũ, ‘Yahweh nĩ egũgwakĩra nyũmba.’

“‘“Rĩrĩa matukũ maku magaakinya mũthia na ũthiĩ kũrĩ maithe manyu ma tene, nĩ ngaarahũra mbeũ yaku ĩrĩa ĩgooka thutha waku, ũmwe wa ariũ aku, na nĩ ngaahanda ũthamaki wake ũrũme biũ

Ũcio nĩwe ũkaanjakĩra nyũmba, na nĩ ngaahanda gĩtĩ gĩake kĩa ũnene kĩrũme tene na tene

Nĩ ngaatuĩka ithe, nake atuĩke mũrũ wakwa. Na ndikamũthengeria tha ciakwa ta ũrĩa ndathengirie kuuma harĩ ũrĩa warĩ mbere yaku

Na nĩ ngaatũma ehande nyũmba-inĩ yakwa na ũthamaki-inĩ wakwa tene na tene, na gĩtĩ gĩake kĩa ũnene gĩgaatũũra tene na tene.”’”

Nathani akĩĩra Daudi ciugo icio ciothe o hamwe na kĩoneki kĩu gĩothe.

Hĩndĩ ĩyo Mũthamaki Daudi akĩingĩra na agĩikara thĩ mbere ya Yahweh na akiuga ũũ: “Niĩ ndĩ ũ, wee Yahweh Kĩhoti? Nayo nyũmba yakwa nĩ kĩĩ atĩ nĩguo ũnginyie haha ũnginyĩtie

Makĩria ma ũguo, wee Kĩhoti, ningĩ nĩ warĩtie ũhoro wa nyũmba ya ndungata yaku wĩgiĩ ihinda rĩrĩa rĩgooka thutha-inĩ; na ũndorete o ta ndĩ mũndũ wagĩrĩire gũtũũgĩrio makĩria, wee Yahweh Kĩhoti

Nĩ atĩa ũngĩ ndungata yaku Daudi ĩngĩkwĩra wĩgiĩ gĩtĩo kĩrĩa nyonetio na nĩ ũĩ ndungata yaku wega

Wee Yahweh, nĩ ũndũ wa ndungata yaku na nĩ ũndũ wa gũkorũo wĩtĩkanĩtie na ũndũ ũcio ngoro-inĩ yaku, nĩkĩo wĩkĩte maũndũ macio mothe manene na njĩra ya kũguũria ũnene waku

Wee Yahweh, gũtirĩ ũngĩ ũhaana tawe, na gũtirĩ Kĩhoti ũngĩ tiga wee; maũndũ mothe marĩa twĩiguĩrĩire na matũ maitũ nĩ maheanĩte ũira wa ũndũ ũcio

Na nĩ rũrĩrĩ rũrĩkũ rũngĩ rũtariĩ ta andũ aku Isiraeli? Kĩhoti ũrĩa wa ma aathiire na akĩmakũũra magĩtuĩka andũ ake. Ũgĩĩthondekera rĩĩtwa na njĩra ya gwĩka maũndũ manene na ma magegania, ũkĩingata ndũrĩrĩ ciehere mbere ya andũ aku, arĩa wakũũrire kuuma Misiri

Ũgĩtũma andũ aku Isiraeli matuĩke andũ aku mwene mahinda mothe; nawe Yahweh, ũgĩtuĩka Kĩhoti wao

Rĩu wee Yahweh, kĩĩranĩro kĩrĩa wĩranĩire ũhoro-inĩ wĩgiĩ ndungata yaku na nyũmba yayo kĩrotuĩka gĩa kwĩhokeka mahinda-inĩ mothe, na ũroeka o ta ũrĩa wĩranĩire

Rĩĩtwa rĩaku rĩrotũũra na rĩtũũgĩrio tene na tene, nĩgetha andũ moige atĩrĩ, ‘Yahweh mũnene wa ita, Kĩhoti wa Isiraeli, nĩwe Kĩhoti harĩ Isiraeli,’ na nyũmba ya Daudi ndungata yaku ĩroehanda wega mbere yaku

Nĩ gũkorũo wee Kĩhoti wakwa, nĩ ũguũrĩirie ndungata yaku muoroto waku wa kũmĩakĩra nyũmba. Nĩkĩo ndungata yaku ĩrĩ na ũmĩrĩru wa gũkũhoya ihoya rĩrĩ

Na rĩu, wee Yahweh, wee nĩwe Kĩhoti ũrĩa wa ma, na nĩ wĩranĩire maũndũ macio mega ũhoro-inĩ wĩgiĩ ndungata yaku

Kwoguo ũrokenio nĩ kũrathima nyũmba ya ndungata yaku, na ĩrotũũra tene na tene mbere yaku; nĩ gũkorũo wee Yahweh, nĩ ũmĩrathimĩte, na nĩ ndathime tene na tene.”