Mika 1

Gĩkĩ nĩkĩo kiugo kĩa Yahweh kĩrĩa gĩakinyĩire Mika wa kuuma Moreshethu, matukũ-inĩ ma Jothamu, Ahazu, na Hezekia, athamaki a Yahuda, kĩrĩa aamũkĩrire kĩoneki-inĩ gĩkoniĩ Samaria na Yahrushalayim:

“Thikĩrĩriai, inyuĩ ikundi ciothe cia andũ! Tega matũ, wee thĩ ĩno na kĩrĩa kĩiyũire thĩinĩ waku. Na Mũthamaki Yahweh arotuĩka mũira wa gũgũũkĩrĩra —O we Yahweh arĩ thĩinĩ wa hekarũ yake nyamũre.

Tondũ rĩrĩ, Yahweh nĩ ekuumagara kuuma gĩikaro-inĩ gĩake; Nĩ akaaharũrũka na athiĩre kũndũ kũrĩa gũtũũgĩru thĩinĩ wa thĩ.

Irĩma nĩ igaatweka rungu rwake, Nayo mĩkuru yatũkane O ta mũhũra ũrĩ mwaki-inĩ, Ta maĩ maitĩtwo handũ kĩharũrũka-inĩ kĩnene.

Maũndũ macio mothe mageekwo nĩ ũndũ wa ũremi wa Jakubu, Nĩ ũndũ wa mehia ma nyũmba ya Isiraeli. Hihi ũremi wa Jakubu nĩ ũrĩkũ? Na githĩ ti Samaria? Na hihi kũndũ kũrĩa gũtũũgĩru kwa Yahuda nĩ kũ? Na githĩ ti Yahrushalayim?

Nĩ ngaatũma Samaria ĩtuĩke hĩba ya mwanangĩko mũgũnda-inĩ, Kũndũ gwa kũhandwo mĩthabibũ; Nĩ ngaaikia mahiga mayo mũkuru-inĩ, Na thikũrie mĩthingi yayo.

Mĩhianano yayo yothe ya gwacũhio nĩ ĩkaahehenjwo ĩtuĩke tũcunjĩ, Na iheo ciothe iria yaheagwo nĩ ũndũ wa ũmaraya wayo icinwo na mwaki. Nĩ ngaananga mĩhianano yayo yothe. Nĩ gũkorũo yamĩcokanĩrĩirie kũgerera marĩhi ma ũmaraya, Na nĩ ĩgaatuĩka marĩhi ma ahũũri maraya o rĩngĩ.”

Nĩ ũndũ ũcio nĩ ngaacakaya na ndĩre; Ngaathiĩ ndĩ magũrũ matheri na ndĩ njaga. Kĩrĩro gĩakwa gĩkaahaana ta kĩa ngui cia gĩthaka, Na gũcakaya gwakwa kũhaane ta kwa nyaga.

Tondũ kĩronda kĩayo gĩtingĩhona; Gĩthiĩte gĩgakinya nginya Yahuda. Ihũũra rĩu rĩtheremete nginya kĩhingo-inĩ kĩa andũ akwa, nginya Yahrushalayim.

“Mũtikamenyithanie ũndũ ũcio kũu Gathu; Mũtikarĩre o na hanini. Mwĩgaragariei rũkũngũ-inĩ kũu Bethi-afara.

Ringai mũthiĩ mũrĩ njaga na mũconokete, inyuĩ aikari a Shafira. Aikari a Zaanani matiumagarĩte. Bethi-ezeli nĩ ĩgaakorũo na kĩrĩro, na nĩ ĩgaatiga kũmũteithia.

Nĩ gũkorũo aikari a Marothu nĩ metereire ũndũ mwega, Ĩndĩ ũndũ ũrĩa mũũru nĩ ũikũrũkĩte kuuma kũrĩ Yahweh o nginya kĩhingo-inĩ kĩa Yahrushalayim.

Ohererai ngaari ya mbarathi gĩkundi-inĩ kĩa mbarathi, inyuĩ aikari a Lakishi. Nĩ inyuĩ mwarĩ kĩambĩrĩria kĩa mehia ma mwarĩ wa Zayuni, Nĩ gũkorũo thĩinĩ waku nĩ kuonekete ciĩko cia ũremi cia Isiraeli.

Nĩ ũndũ ũcio nĩ ũkaahe Moreshethu-gathu iheo cia kuuganĩra ũhoro. Nyũmba cia Akizibu ciarĩ kĩndũ kĩa maheeni harĩ athamaki a Isiraeli.

Nĩ ngaarehe mũtoorania thĩinĩ wanyu, inyuĩ aikari a Maresha. Ũcio riri wa Isiraeli nĩ agaathiĩ o nginya Adulamu.

Mwĩyenjei mũgĩe kĩhara na mwenje njuĩrĩ cianyu nĩ ũndũ wa ciana icio cianyu mwendete. Mwĩyenjei mũgĩe kĩhara o ta nderi, Tondũ ciana icio nĩ cioetwo kuuma kũrĩ inyuĩ igatwarũo ithamĩrio.”