Mika 4

Ihinda-inĩ rĩa mũthia rĩa matukũ, Kĩrĩma kĩa nyũmba ya Yahweh Nĩ gĩkaahandwo kĩrũmĩte wega igũrũ rĩa tũcũmbĩrĩ twa irĩma, Na nĩ gĩgaatũũgĩrio igũrũ rĩa tũthũngũri, Na kũu nĩkuo ikundi cia andũ igaathiaga.

Na ndũrĩrĩ nyingĩ nĩ igaathiĩ na ciuge atĩrĩ: “Ũkai, nĩ twambatei kĩrĩma-inĩ kĩa Yahweh Na tũthiĩ nyũmba-inĩ ya Kĩhoti wa Jakubu. Nake nĩ arĩtũrutaga ũhoro wĩgiĩ njĩra ciake, Na ithuĩ tũgeragĩre tũcĩra-inĩ twake.” Nĩ gũkorũo Watho nĩ ũkooima Zayuni, Na kiugo kĩa Yahweh kiume Yahrushalayim.

Nake nĩ agaatuithania cira gatagatĩ-inĩ ka ikundi nyingĩ cia andũ Na arũnge maũndũ harĩ ndũrĩrĩ irĩ hinya cia kũndũ kũraya. Nao nĩ magaatura hiũ ciao cia njora ituĩke hiũ cia mĩraũ Na matimũ mao matuĩke hiũ cia gũceha. Rũrĩrĩ rũtikoera rũrĩrĩ rũrĩa rũngĩ rũhiũ rwa njora, O na matikeruta mbaara rĩngĩ.

Magaaikaraga thĩ, o mũndũ rungu rwa mũthabibũ wake na rungu rwa mũtĩ wake wa mũkũyũ, Na gũtirĩ mũndũ ũgaatũma maigue guoya, Nĩ gũkorũo kanua ka Yahweh mũnene wa ita nĩko koigĩte ũguo.

Tondũ ikundi ciothe cia andũ igaathiaga, o mũndũ na rĩĩtwa rĩa kĩhoti wake, No ithuĩ tũgaathiaga na rĩĩtwa rĩa Yahweh Kĩhoti witũ tene na tene.

Yahweh oigĩte atĩrĩ, “Mũthenya ũcio, Nĩ ngaacokanĩrĩria mũndũ ũrĩa wathuaga, Na njokanĩrĩrie ũrĩa ũhurunjũkĩte, O hamwe na arĩa ndahinyĩrĩirie.

Nĩ ngaatũma ũrĩa wathuaga atuĩke matigari, Na ũrĩa watwarĩtwo kũndũ kũraya ndũme atuĩke rũrĩrĩ rũrĩ hinya; Na Yahweh nĩ arĩathanaga arĩ mũthamaki igũrũ rĩao Kĩrĩma-inĩ gĩa Zayuni, Kuuma rĩu nginya tene na tene.

Ha ũhoro waku, wee nyũmba ndaya na igũrũ ya rũũru, O wee karĩma ka mwarĩ wa Zayuni, Wathani ũrĩa wa mbere nĩ ũgaagũcokerera, ti itherũ nĩ ũgaagũcokerera, Ũthamaki ũrĩa wa mwarĩ wa Yahrushalayim.

Rĩu-rĩ, nĩ kĩĩ kĩratũma wanĩrĩre na mũgambo mũnene? Kaĩ ũtarĩ na mũthamaki, Kana hihi ũrĩa ũgũtaaraga nĩ akuĩte, Atĩ nĩkĩo ũnyitĩtwo nĩ ruo ta rwa mũtumia akĩgĩa mwana?

Wĩnyogonde na ũcaye, wee mwarĩ wa Zayuni, O ta mũtumia ũragĩa mwana, Tondũ rĩu nĩ ũgũthiĩ wehere itũũra-inĩ ũgaikarage mĩgũnda-inĩ. Ũgaathiĩ o nginya Babuloni, Na kũu nĩkuo ũkaahonokerio; Kũu nĩkuo Yahweh agaakũgũra akũrute guoko-inĩ gwa thũ ciaku.

Ndũrĩrĩ nyingĩ nĩ igaacokanĩrĩra igũũkĩrĩre; Ikoiga ũũ, ‘Reke athahio, Reke maitho maitũ mone ũndũ ũyũ ũkĩhaanĩka harĩ Zayuni.’

No matiũĩ meciria ma Yahweh, Matitaũkagĩrũo nĩ muoroto wake; Nĩ gũkorũo akaamacokanĩrĩria o ta ciohe iria itinĩtio cia ngano irĩ kĩhuuhĩro-inĩ.

Ũkĩra ũhũũre ngano, wee mwarĩ wa Zayuni; Tondũ nĩ ngaagarũra hĩa ciaku ituĩke kĩgera, Na ngarũre mahũngũ maku matuĩke gĩcango, Na nĩ ũkaamemenda ikundi nyingĩ cia andũ. Na nĩ ũkaamũrĩra Yahweh uumithio wacio, Na indo ciacio ũciamũrĩre Mwathi ũrĩa wa ma wa thĩ yothe.”