Mika 3

Na niĩ ngiuga atĩrĩ: “Ta thikĩrĩriai inyuĩ atongoria a Jakubu O na inyuĩ anene a nyũmba ya Isiraeli. Githĩ mũtiagĩrĩirũo kũmenya ũndũ ũkoniĩ matua ma cira Marũngĩrĩru?

No inyuĩ nĩ mũthũire ũndũ ũrĩa mwega na mũkenda ũrĩa mũũru; Mũũnũraga andũ akwa ngothi na mũkaruta nyama kuuma mahĩndĩ-inĩ mao.

Ningĩ nĩ mũrĩaga nyama cia mĩĩrĩ ya andũ akwa Na mũkamonũra ngothi, Mũkoinanga mahĩndĩ mao, mũkamahehenja magatuĩka tũcunjĩ, O ta kĩndũ kĩrarugĩrũo nyũngũ-inĩ, ta nyama irĩ nyũngũ-inĩ ya kũrugĩra.

Hĩndĩ ĩyo nĩ magaakaĩra Yahweh amateithie, No ndakaamacokeria. Hĩndĩ ĩyo nĩ akaahitha ũthiũ wake kuuma harĩ o, Tondũ wa ciĩko ciao cia waganu.

Yahweh ekuuga ũũ kwerekera anabii acio mahĩtithagia andũ akwa, Arĩa makayũrũrũkaga makoiga ‘Thayũ!’ Makĩrũmaga na magego mao No makanĩrĩra mbaara kwerekera mũndũ ũrĩa ũtekagĩra kĩndũ tũnua-inĩ twao:

‘Nĩ mũgaakorũo na ũtukũ; gũtigaakorũo na kĩoneki; Nduma noyo mũgaakorũo nayo, mũtikaaragũra. Riũa nĩ rĩgaathũa harĩ anabii, Naguo mũthenya nĩ ũkaagarũrũka ũtuĩke nduma harĩ o.

Arĩa monaga cioneki nĩ magaaconorithio, Nao aragũri nĩ magaaconoka. Othe nĩ makaahumbĩra tũnua twao, Tondũ wa kwaga macokio kuuma kũrĩ Kĩhoti.’”

No niĩ-rĩ, nĩ njiyũrĩtwo nĩ hinya kũgerera roho wa Yahweh, Na ngaiyũrũo nĩ Matua Marũngĩrĩru na ũhoti, Nĩguo njĩre Jakubu ũremi wake na njĩre Isiraeli mehia make.

Ta thikĩrĩriai ũndũ ũyũ, inyuĩ atongoria a nyũmba ya Jakubu O na inyuĩ anene a nyũmba ya Isiraeli, O inyuĩ mũthũire matua marũngĩrĩru ma cira na mũkogomia maũndũ marĩa mothe marũngarũ,

O inyuĩ mwakaga Zayuni na ũiti wa thakame na mũgaka Yahrushalayim na maũndũ matarĩ ma ũthingu.

Atongoria a kuo matuanagĩra cira nĩguo maheo ihaki, Athĩnjĩri-Yahweh a kuo marutanaga nĩguo marĩhwo, Nao anabii a kuo maragũranagĩra nĩguo maheo mbeca. Ĩndĩ nĩ megiritanagia na Yahweh, makoiga ũũ: “Na githĩ Yahweh ndarĩ hamwe na ithuĩ? Gũtirĩ ũũru ũgaatũkora.”

Nĩ ũndũ wanyu-rĩ, Zayuni ĩkaarĩmwo o ta mũgũnda, Yahrushalayim ĩgaatuĩka hĩba cia mwanangĩko, Nakĩo kĩrĩma kĩa Nyũmba gĩkaahaana ta kũndũ gũtũũgĩru thĩinĩ wa mũtitũ.