Mika 6

Ta thikĩrĩriai ũrĩa Yahweh aroiga. Arahũkai, mũtware cira mbere ya irĩma, Na tũthũngũri tũroigua mũgambo wanyu.

Inyuĩ irĩma, thikĩrĩriai cira wa Yahweh, Inyuĩ mĩthingi mĩrũmu ya thĩ, Tondũ Yahweh arĩ na cira hamwe na andũ ake; Thitango yake ekwerekeria harĩ Isiraeli:

“Nĩ kĩĩ ndĩmwĩkĩte, inyuĩ andũ akwa? Ndĩmũnogetie na kĩĩ? Rutai ũira wa kũnjũkĩrĩra.

Nĩ gũkorũo nĩ ndamũrutire bũrũri wa Misiri, Ngĩmũkũũra kuuma nyũmba ya ũkombo; Ndatũmire Musa, Haruni, na Miriamu kũrĩ inyuĩ.

Wũũii inyuĩ andũ akwa, ta ririkanai ũndũ ũrĩa Mũthamaki Balaki wa Moabi aabangĩte, Na ũrĩa Balaamu mũrũ wa Beori aamũcokeirie —Ũndũ ũrĩa wekĩkire kuuma Shitimu nginya Giligali Nĩgetha mũmenye ciĩko cia ũthingu cia Yahweh.”

Hihi ngũthiĩ mbere ya Yahweh na kĩĩ? Ngũinamĩrĩra mbere ya Kĩhoti ũrĩa ũrĩ igũrũ na kĩĩ? Hihi ngũthiĩ mbere yake na magongona magima ma njino, Na njaũ cia mwaka ũmwe?

Hihi Yahweh no akenio nĩ ndũrũme ngiri nyingĩ, No akenio nĩ njũũĩ cia maguta ngiri makũmi maingĩ? Hihi no ndute mũriũ wakwa wa irigithathi nĩ ũndũ wa ũremi wakwa, Ndute maciaro ma mwĩrĩ wakwa nĩ ũndũ wa mehia makwa?

Nĩ akwĩrĩte ũndũ ũrĩa mwega, wee mũndũ ũyũ. Na hihi nĩ atĩa Yahweh endaga kuuma harĩ wee? Tiga o wĩkage maũndũ ma kĩhooto, wendage kũiguanĩra tha, Na ũtwaranage na Kĩhoti waku ũrĩ na wĩnyihia!

Mũgambo wa Yahweh nĩ wanagĩrĩra itũũra-inĩ; Andũ arĩa marĩ na ũũgĩ nĩ marĩĩtigagĩra rĩĩtwa rĩaku. Thikĩrĩria rũthanju o na ũthikĩrĩrie ũrĩa warwamũrire.

Hihi kũrĩ o na mĩthithũ ya waganu thĩinĩ wa nyũmba ya mũndũ ũrĩa mwaganu Na gĩthimi kĩa eba gĩtarĩ kĩiyũru kĩrĩa kĩrĩ magigi?

Hihi no ndĩmataranĩrie na arĩa amũre mena ratiri ya waganu, Mena na mũhuko wa mahiga ma gũthima ma maheeni?

Nĩ gũkorũo itonga ciakuo ciyũirũo nĩ ũhinya, Na aikari a kuo maragia maheeni; Rũrĩmĩ rwao nĩ rũheenanagia rũrĩ kanua-inĩ kao.

“Nĩ ũndũ ũcio, nĩ ngaakũgũtha ngũtihie, Ndũme ũtiganĩrio nĩ ũndũ wa mehia maku.

Nĩ ũkaarĩa no ndũkaahũna; Ndũgaakorũo na kĩndũ thĩinĩ waku. Kĩrĩa ũkenyitĩra-rĩ, ndũgaakĩhonokia, Na kĩrĩa ũkaahonokia, ngaakĩneana kũrĩ rũhiũ rwa njora.

Nĩ ũkaahanda mbeũ, no ndũkaagetha. Nĩ ũkaaranga ndamaiyũ, no ndũkaahũthĩra maguta macio; Na nĩ ũgaathondeka ndibei ya mũhihano, no gũtirĩ ndibei ũkaanyua.

Tondũ mũrũmagĩrĩra mawatho ma Omuri na mĩtugo yothe ya nyũmba ya Ahabu, Na mũthiaga kũringana na ũtaaro wao. Nĩkĩo ngaatũma ũtuĩke kĩndũ gĩa kũguoyohia Na aikari a kuo matuĩke kĩndũ gĩa kũhuuhĩrũo mĩrũri; Na nĩ mũkaanyararũo nĩ ikundi cia andũ.”