Mika 7
Kaĩ ndĩ na haaro-ĩ! Ndariĩ ta mũndũ ũrĩa Ũtonaga kĩmanjĩka gĩa thabibũ gĩa kũrĩa, O na kana ngũyũ ĩrĩa yambaga kwĩruha ĩrĩa ndĩriragĩria, Thutha wa gũcokanĩrĩrio kwa matunda ma hĩndĩ ya ũrugarĩ Na kũhaara thutha wa magetha ma thabibũ.
Mũndũ ũrĩa mwega nĩ athirĩte akahuka thĩinĩ wa thĩ; Gũtirĩ mũndũ mũrũngĩrĩru gatagatĩ-inĩ ka andũ. Othe maikaraga mohetie nĩguo maite thakame. O mũndũ ahĩtaga mũrũ wa ithe na neti ya gũtega.
Moko mao nĩ moĩ mũno gwĩka ũũru; Mũnene nĩ etagia nduhi, Mũtuanĩri cira agetia ngerenwa, Mũndũ ũrĩa ũrĩ igweta nĩ amenyithanagia merirĩria make, Na makahingia ũndũ ũcio marĩ hamwe.
Ũrĩa mwega mũno harĩ o atariĩ ta mĩigua, Ũrĩa mũrũngĩrĩru mũno harĩ o nĩ mũũru gũkĩra rũgiri rwa mĩigua. Mũthenya wa arangĩri aku na mũthenya waku wa ituĩro nĩ ũgaakinya. Hĩndĩ ĩyo nĩ makaanyitwo nĩ guoya.
Ndũgetĩkie mũrata waku Kana wĩhoke mũrata wa hakuhĩ. Menyerera ũndũ ũrĩa ũrera mũndũ ũrĩa ũkomaga gĩthũri-inĩ gĩaku.
Tondũ mwanake nĩ anyararaga ithe, Mũirĩtu nĩ okagĩrĩra nyina, Na mũka wa mũriũ agokĩrĩra nyaciarawe; Thũ cia mũndũ nĩ andũ a nyũmba yake.
No niĩ-rĩ, ndĩrĩikaraga njũthĩrĩirie Yahweh. Nĩ ndĩrĩonanagia mwerekera wa gweterera Kĩhoti wa ũhonokio wakwa. Kĩhoti wakwa nĩ arĩnjiguaga.
Ndũkangenerere, wee thũ yakwa. O na gũtuĩka nĩ ngũĩte, nĩ ngookĩra; O na gũtuĩka njikaraga nduma-inĩ, Yahweh nĩ agaatuĩka ũtheri wakwa.
Nĩ ngũkirĩrĩria mangʼũrĩ ma Yahweh —Tondũ nĩ ndĩmwĩhĩirie O nginya rĩrĩa akaandetera cira-inĩ wakwa na atũme nyone itua rĩake irũngĩrĩru rĩa cira Nĩ akaanduta andehe ũtheri-inĩ; Nĩ ngeyonera ũthingu wake.
Thũ yakwa o nayo nĩ ĩkeeyonera, Na thoni nĩ ikaahumba ũcio wanjĩrire atĩrĩ: “Yahweh Kĩhoti waku arĩ kũ?” Maitho makwa nĩ makaamwĩrorera. Akaarangĩrĩrio ta ndoro barabara-inĩ.
Mũthenya ũcio ũgaakorũo ũrĩ wa gwaka thingo ciaku cia mahiga; Mũthenya ũcio mũhaka nĩ ũkaaramio.
Mũthenya ũcio nĩ magooka kũrĩ wee Moimĩte Ashuri na matũũra ma Misiri, Kuuma Misiri o nginya Rũũĩ-inĩ; Kuuma iria rĩmwe nginya rĩrĩa rĩngĩ na kuuma kĩrĩma kĩmwe nginya kĩrĩa kĩngĩ.
O na kũhana ũguo, bũrũri nĩ ũgaatuĩka kũndũ gũtiganĩrie nĩ ũndũ wa aikari aguo, Tondũ wa maũndũ marĩa mekĩte.
Rĩithia andũ aku na rũthanju rwaku, o acio rũũru rwa igai rĩaku, O ũcio waikaraga arĩ wiki mũtitũ-inĩ—gatagatĩ-inĩ ka mũgũnda wa matunda. Reke marĩage kũu Bashani na Gileadi o ta matukũ marĩa ma tene.
“O ta matukũ-inĩ marĩa woimire bũrũri-inĩ wa Misiri, Nĩ ngaamuonia maũndũ ma magegania.
Ndũrĩrĩ nĩ ikoona na iconoke o na gũtuĩka irĩ na hinya mũingĩ. Nĩ ikaahumbĩra kanua gacio na guoko; Matũ ma cio nĩ magaatiga kũigua.
Igaacũna rũkũngũ ta nyoka; Ikooima mĩĩgitio-inĩ yacio ikĩinainaga, o ta nyamũ iria itambaga thĩ. Igooka kũrĩ Yahweh Kĩhoti witũ irĩ na guoya mũingĩ, Na nĩ igaagwĩtigĩra.”
Nĩ El ũrĩkũ ũhaana tawe, Ũrĩa wohanagĩra mahĩtia na akaga gũtindanĩra na mehia ma matigari ma igai rĩake? Ndegũtũũra arĩ mũrakaru tene na tene, Tondũ nĩ akenaga akĩiguanĩra tha.
Nĩ agaatũiguĩra tha rĩngĩ; nĩ agaatooria mahĩtia maitũ. Nĩ ũgaaikia mehia mao mothe kũndũ kũriku iria-inĩ.
Nĩ ũkoonia Jakubu ũhoro waku wa ma, Na wonie Iburahimu tha ciaku, O ta ũrĩa wehĩtire harĩ maithe maitũ ma tene kuuma matukũ ma tene.