Nahumu 1

Ndũmĩrĩri nditũ ĩkoniĩ Nineve: Rĩrĩ nĩ ibuku rĩa kĩoneki kĩa Nahumu ũrĩa Mũelikoshi:

Yahweh nĩ El wĩ ũiru na nĩ erĩhagĩria; Yahweh nĩ erĩhagĩria, na akoragwo ehaarĩirie kuonania mangʼũrĩ make. Yahweh nĩ erĩhagĩria harĩ thũ ciake, Na akaigĩra thũ ciake mangʼũrĩ.

Yahweh ndahiũhaga kũrakara na nĩ arĩ hinya mũingĩ, No Yahweh ndagaga kũherithia arĩa magĩrĩire kũherithio. Njĩra yake ĩrĩ thĩinĩ wa rũhuho rwa kwananga na kĩhuhũkanio, Na matu nĩmo rũkũngũ rwa makinya make.

Nĩ akũũmaga iria na akarĩniaria; Na nĩ atũmaga njũũĩ ciothe ihũe. Bashani na Karimeli nĩ kũhoohete, Na kĩro kĩa Lebanoni nĩ kĩhoohete.

Irĩma nĩ ithingithaga nĩ ũndũ wake, Natuo tũrĩma tũgatweka. Thĩ nĩ ĩgaathingitha nĩ ũndũ wa ũthiũ wake, O hamwe na bũrũri na arĩa othe maikaraga thĩinĩ waguo.

Nũũ ũngĩhota gwĩtiiria mangʼũrĩ make? Na nũũ ũngĩhota gwĩtiiria marakara make mahiũ? Mangʼũrĩ make magaaitũrũrũo o ta mwaki, Nacio ndwaro cia mahiga nĩ ikaahehenjwo nĩ ũndũ wake.

Yahweh nĩ mwega, akoragwo arĩ mwĩgitio mũthenya wa mĩtangĩko. Nĩ eciragia arĩa moragĩra harĩ we.

Nĩ akaaniina Nineve biũ na mũiyũro wa kũhaata, Na nduma nĩ ĩgaathingata thũ ciake.

Nĩ ũndũ ũrĩkũ mũkaabanga wa gũũkĩrĩra Yahweh? We nĩ akaamũniina biũ. Mĩtangĩko ndĩkoimĩra riita rĩa kerĩ.

Tondũ makoragwo marigicanĩte o ta mĩigua, Na matariĩ ta andũ marĩĩtwo nĩ njohi; No magaacinwo o ta mahuti momũ.

Thĩinĩ waku nĩ gũkooimĩra mũndũ wa kũbanga ũndũ mũũru kwerekera Yahweh, Aheanage ũtaaro wa tũhũ.

Yahweh oigĩte ũũ: “O na gũtuĩka maarĩ na hinya mũingĩ na maarĩ aingĩ, Nĩ makaanangwo na mathire. Nĩ ngũherithĩtie, no ndigaakũherithia rĩngĩ.

Na rĩu nĩ nguunanga mũtĩ wake wa icoki ũkweherere, Na nduange mĩnyororo yaku ĩtuĩke icunjĩ igĩrĩ.

Yahweh nĩ arutĩte watho ũgũkoniĩ akoiga, ‘Rĩĩtwa rĩaku rĩtigaatwarithio na mbere rĩngĩ. Nĩ ngaaniina mĩhianano ya gwacũhio na mĩhianano ya cuma ndĩmĩeherie thĩinĩ wa nyũmba ya ihoti ciaku. Nĩ ngaagũthondekera mbĩrĩra, tondũ wee ũrĩ kĩndũ gĩtarĩ kĩene.’

Tarorai muonee! Irĩma igũrũ kũrĩ na magũrũ ma ũrĩa ũrarehe ũhoro mwega, Ũrĩa ũhunjagia ũhoro wa thayũ. Kũngũĩra ciathĩ ciaku, wee Yahuda, hingia mĩĩhĩtwa yaku, Tondũ mũndũ ũrĩa ũtarĩ kĩene gũtirĩ hĩndĩ agaatuĩkanĩria thĩinĩ waku rĩngĩ. Nĩ akaanangwo biũ.”