Nahumu 2

Atĩrĩrĩ, ũrĩa ũgũthithanagia kĩndũ na hinya agakiunanga tũcunjĩ nĩ okĩte gũgũũkĩrĩra. Rangĩra mĩĩgitio. Gitĩra njĩra. Mwĩhotorei na mũcokanĩrĩrie hinya wanyu wothe.

Nĩ gũkorũo Yahweh nĩ agaacokereria mwĩrahĩro wa Jakubu, Hamwe na mwĩrahĩro wa Isiraeli, Nĩ gũkorũo arĩa manangaga nĩ mamanangĩte; Na nĩ mathũkĩtie thuuna ciao.

Ngo cia arũme ake arĩa marĩ hinya ihakĩtwo rangi mũtune, Njamba ciake cia ita ciĩhumbĩte nguo ndune. Igera cia ngaari ciake cia mbaara irahenia ta mwaki Mũthenya ũrĩa arehaarĩria nĩ ũndũ wa mbaara, Na matimũ ma mũtĩ wa mũthengera nĩ manyitĩtwo.

Ngaari cia mbaara iratwarithio ihenya inene barabara-inĩ. Irahanyũka kũndũ na kũndũ ihaaro-inĩ cia mũingĩ. Irahenia ta imũrĩ irakana na ikahenũka ta rũheni.

Nĩ ageeta anene ake. Nĩ makaahĩngwo makiumagara. Nĩ magaatengʼera mathiĩ rũthingo-inĩ rwake; Nĩ makaaiga kĩndũ gĩa kũgitĩra.

Ihingo cia njũũĩ nĩ ikaahingũka, Na nyũmba ya mũthamaki nĩ ĩgaatweka.

Nĩ gwathanĩtwo: Nĩ aguũrĩtio, Nĩ atahĩtwo, na ngombo ciake cia airĩtu nĩ iracakaya; Iragamba ta ndutura ikĩĩhũũraga ithũri.

Nineve aatariĩ ta karia ka maĩ matukũ-inĩ make mothe, No rĩu nĩ kũũra marora. “Rũgamai! Rũgamai!” No gũtirĩ mũndũ ũrehũgũra.

Tahai betha, tahai thahabu! Mĩthithũ nĩ mĩingĩ mũno. Kũiyũire mĩthemba yothe ya indo cia goro.

Itũũra rĩtigĩtwo ũtheri, rĩgatiganĩrio, rĩkanangĩka! Ngoro ciao itwekete nĩ ũndũ wa guoya, maru mao makaregera, ciero ciao ikainaina; Mothiũ mao mothe nĩ mathitĩte.

Kĩmamo kĩa mĩrũthi kĩrĩ ha, kũrĩa mĩrũthi mĩthĩ ĩrĩagĩra, Kũrĩa mũrũthi uumaga ũtongoretie kaana kaguo, Gũtarĩ mũndũ ũgũtũma ĩigue guoya?

Mũrũthi watamburaga nyama cia kũigana twana twaguo Na ũgaita nyamũ nĩ ũndũ wa mĩrũthi yaguo ya mũgoma. Waiyũragia imamo ciaguo nyama, Ũkaiyũria imamo ciaguo nyamũ iria ũtamburĩte.

“Rĩu kĩone, nĩ ngũgũũkĩrĩra,” ũguo nĩguo Yahweh mũnene wa ita ekuuga, “Nĩ ngaacina ngaari ciake cia mbaara ndogo-inĩ, Na rũhiũ rwa njora nĩ rũkaaniina mĩrũthi yaku mĩthĩ. Ndũgaacoka kuona kĩndũ gĩa kũhĩta thĩinĩ wa thĩ, Na mũgambo wa atũmwo aku ndũkaaiguĩka rĩngĩ.”