Ndari 12

Na rĩrĩ, Miriamu na Haruni makĩambĩrĩria kwaria mokĩrĩire Musa tondũ wa mũtumia Mũkushi ũrĩa aahikĩtie, nĩ gũkorũo aahikĩtie mũtumia Mũkushi

Mooigaga atĩrĩ: “Kaĩ Yahweh aragia kũgerera harĩ o Musa tu? Githĩ ndaragia kũgerera harĩ ithuĩ o na ithuĩ?” Na Yahweh nĩ aathikagĩrĩria ũhoro ũcio

Na rĩrĩ, Musa nĩwe warĩ mũndũ ũrĩa mũhooreri mũno gũkĩra andũ othe thĩinĩ wa thĩ.

O hĩndĩ ĩyo Yahweh akĩra Musa na Haruni na Miriamu ũũ: “Umai nja inyuothe atatũ, mũthiĩ hema-inĩ ya gũtũnganwo.” Kwoguo othe atatũ makiuma nja

Nake Yahweh agĩikũrũka arĩ gĩtugĩ-inĩ kĩa itu na akĩrũgama mũromo-inĩ wa hema ĩyo na agĩta Haruni na Miriamu. Nao eerĩ magĩthiĩ hau mbere

Agĩcoka akiuga atĩrĩ: “Ta thikĩrĩriai ciugo ciakwa. Kũngĩkorũo na mũnabii wa Yahweh gatagatĩ-inĩ kanyu, no nginya ndĩmenyithanie kũrĩ we kũgerera kĩoneki, na njarie nake kũgerera kĩroto

No ũguo tiguo kũrĩ ũhoro-inĩ wĩgiĩ ndungata yakwa Musa! We ehokeirũo nyũmba yakwa yothe

Njaragia nake ũthiũ kwa ũthiũ, cara-rũkũ, itekũmwarĩria na ndaĩ; na mũhianĩre wa Yahweh nĩguo onaga. Nĩ kĩĩ gĩtũmire mwage gwĩtigĩra kwaria mũũkĩrĩire ndungata yakwa Musa?”

Nĩ ũndũ ũcio Yahweh agĩcinwo nĩ marakara nĩ ũndũ wao, na akiuma harĩ o agĩthiĩ

Itu rĩkĩehera igũrũ rĩa hema ĩyo, na rĩrĩ, Miriamu akĩhũũrũo na mangũ ma rangi mwerũ o ta mbarabu. Haruni nake akĩĩhũgũra mwena ũrĩa Miriamu aarĩ, akĩona atĩ Miriamu nĩ ahũũrũo na mangũ

O hĩndĩ ĩyo Haruni akĩra Musa atĩrĩ: “Ndagũthaitha mwathi wakwa! Ndũkareke tũrũithio nĩ ũndũ wa rĩhia rĩrĩ! Ũguo twĩkĩte nĩ gĩĩko kĩa ũrimũ

Ndagũthaitha ndũkareke athiĩ na mbere gũkorũo ahaana o ta mũndũ mũkuũ, ũrĩa nuthu ya mwĩrĩ wake ĩkoragwo ĩbuthĩte agĩciarũo!”

Nake Musa akĩambĩrĩria gũkaĩra Yahweh, akĩmwĩra ũũ: “Wee Kĩhoti, ndagũthaitha mũhonie! Ndagũthaitha!”

Yahweh agĩcokeria Musa atĩrĩ: “Korũo ithe no amũtuĩre mata ũthiũ-inĩ wake-rĩ, githĩ ndangĩconorithio thikũ mũgwanja? Nĩ aigwo handũ mwanya thikũ mũgwanja nja ya kambĩ, na thutha ũcio no acokio thĩinĩ.”

Nĩ ũndũ ũcio Miriamu akĩigwo handũ mwanya thikũ mũgwanja nja ya kambĩ, nao andũ matiathaamirie kambĩ o nginya rĩrĩa Miriamu aacokirio thĩinĩ

Thutha ũcio andũ acio makiuma Hazerothu na makĩamba hema ciao werũ-inĩ wa Parani na makĩambĩrĩria gũikara kuo.