Ndari 11
Na rĩrĩ, andũ makĩambĩrĩria gũteta marĩ na marũrũ mbere ya Yahweh. Rĩrĩa Yahweh aamaiguire, agĩcinwo nĩ marakara, na mwaki kuuma kũrĩ Yahweh ũkĩambĩrĩria kũmarĩrĩmbũkĩra na ũgĩcina andũ amwe kũu mĩthia-inĩ ya kambĩ
Rĩrĩa andũ maambĩrĩirie gũkaĩra Musa, agĩthaitha Yahweh, na mwaki ũcio ũkĩhora
Kwoguo handũ hau hagĩtwo Tabera, tondũ mwaki kuuma kũrĩ Yahweh nĩ wamarĩrĩmbũkĩire.
Kĩrĩndĩ kĩa andũ matukanĩte arĩa maarĩ gatagatĩ-inĩ kao makĩonania merirĩria ma mwĩyendo, na ciana cia Isiraeli o nacio ikĩambĩrĩria kũrĩra rĩngĩ ikiugaga ũũ: “Nũũ ũgũtũhe nyama tũrĩe
Na nĩguo tũririkanaga thamaki iria twarĩaga Misiri tũtekũgũra, nginya matunda ma rũkiri, meroni, itũngũrũ cia mahuti, itũngũrũ cia ngwacĩ, na itũngũrũ thumu
No rĩu no kũhooha tũrahooha. Hatirĩ kĩndũ kĩngĩ tũrona tiga o maana maya.”
Na rĩrĩ, maana macio maatariĩ ta mbegũ cia ndania, na maahaanaga ta ngamu ya bendora
Andũ maathiaga kũu guothe makamongania na makamathĩa na gĩthĩi kana makamakima na mũũthĩ. Magacoka makamatherũkia nyũngũ-inĩ kana magathondeka mĩgate, na maacamaga ta keki ĩrĩ na mũrĩo ĩrugĩtwo na maguta
Ime rĩagĩa kambĩ-inĩ ũtukũ, nĩrĩo namo maana macio maaitĩkaga igũrũ rĩarĩo.
Musa akĩigua andũ makĩrĩra, kuuma mbarĩ ĩmwe nginya ĩrĩa ĩngĩ, o mũndũ arĩ mũromo-inĩ wa hema yake. Na Yahweh akĩrakara mũno, o nake Musa akĩigua ũũru mũno
Musa agĩkĩũria Yahweh atĩrĩ: “Nĩ kĩĩ gĩtũmĩte ũnyamarie ndungata yaku? Nĩ kĩĩ gĩtũmĩte njage gwĩtĩkĩrĩka maitho-inĩ maku, o nginya ũkanjigĩrĩra mũrigo wa andũ aya othe
Kaĩ arĩ niĩ ndagĩire nda ya andũ aya othe? Kaĩ arĩ niĩ ndamaciarire, atĩ nĩguo ũnjĩre atĩrĩ, ‘Makuue gĩthũri-inĩ gĩaku, o ta ũrĩa ndungata ĩkuuaga mwana,’ nginya bũrũri-inĩ ũrĩa wehĩtire kũhe maithe mao ma tene
Ngũruta kũ nyama cia kũhe andũ aya othe? Nĩ gũkorũo maratinda makĩndĩrĩra makiugaga atĩrĩ, ‘Tũhe nyama tũrĩe!’
Ndingĩhota andũ aya othe ndĩ wiki; nĩ nditũhĩirũo mũno
Angĩkorũo ũũ nĩguo ũkũnjĩka-rĩ, ndagũthaitha ũnjũrage o rĩu. Angĩkorũo nĩ njĩtĩkĩrĩkĩte maitho-inĩ maku, ndũkareke nyone thĩna rĩngĩ.”
Yahweh agĩcokeria Musa ũũ: “Njokanĩrĩria arũme 70 kuuma harĩ athuri a Isiraeli, arĩa ũĩ atĩ nĩ athuri arĩa mehokeirũo maũndũ na anene a andũ, ũmatware hema-inĩ ya gũtũnganwo, na marũgame hau hamwe nawe
Na niĩ nĩ ngũikũrũka na ngwarĩrie ũrĩ hau, na nĩ nguoya roho ũmwe ũrĩa ũrĩ naguo na ndĩũige igũrũ rĩao, nao nĩ marĩgũteithagia gũkuua mũrigo wa andũ acio nĩguo ndũkaũkuue ũrĩ wiki
Wagĩrĩirũo kwĩra andũ atĩrĩ, ‘Mwĩyamũrĩrei Yahweh nĩ ũndũ wa rũciũ, nĩ gũkorũo hatarĩ nganja nĩ mũkaarĩa nyama, tondũ nĩ mũrĩrĩte na Yahweh akamũigua na mũkoiga ũũ: “Nũũ ũgũtũhe nyama tũrĩe? Maũndũ maitũ maarĩ mega rĩrĩa twarĩ Misiri.” Hatarĩ nganja Yahweh nĩ ekũmũhe nyama, na inyuĩ mũrĩe
Mũtigũcirĩa mũthenya ũmwe, kana mĩthenya 2 kana mĩthenya 5 kana mĩthenya 10 kana mĩthenya 20,
no mũgũcirĩa mweri mũgima, nginya ciume na maniũrũ na mũcinyire, nĩ gũkorũo nĩ mũregete Yahweh, o we ũrĩa ũrĩ gatagatĩ-inĩ kanyu, na mũkarĩrĩra mbere yake, mũkiugaga ũũ: “Twoimire Misiri nĩkĩ?”’”
Nake Musa akiuga: “Andũ arĩa marĩ na niĩ nĩ arũme 600,000 a gũthiĩ na magũrũ, nawe no ũranjĩra ũũ, ‘Nĩ ngũmahe nyama, na nĩ mekũrĩa maiganie kwa ihinda rĩa mweri mũgima’
O na ndũũru ciothe cia mbũri na ng’ondu na cia ng’ombe ingĩthĩnjwo-rĩ, hihi no cimaigane? Kana thamaki ciothe cia iria-inĩ ingĩtegwo-rĩ, hihi no cimaigane?”
Yahweh agĩkĩra Musa atĩrĩ: “Kaĩ guoko kwa Yahweh gwĩ gũkuhĩ? Rĩu nĩ ũkuona kana ũndũ ũrĩa ndĩroiga nĩ ũgwĩkĩka harĩ wee kana ndũgwĩkĩka.”
Kwoguo Musa akiuma na akĩra andũ ciugo cia Yahweh. Na agĩcokanĩrĩria arũme 70 kuuma harĩ athuri a kĩrĩndĩ na akĩmarũgamia mathiũrũrũkĩirie hema ĩyo
Yahweh agĩcoka agĩikũrũka arĩ itu-inĩ, akĩmwarĩria na akĩoya roho ũmwe ũrĩa aarĩ naguo akĩũiga igũrũ rĩa o ũmwe wa athuri acio 70. Na rĩrĩa roho ũcio wamagĩire, makĩambĩrĩria gwĩka ta anabii, no matiathire na mbere gwĩkaga ũguo.
Na rĩrĩ, nĩ kwarĩ na arũme erĩ maatigĩtwo kambĩ-inĩ. Meetagwo Elidadi na Medadi. Naguo roho ũkĩambĩrĩria kũmagĩa, nĩ gũkorũo maarĩ amwe a arĩa marĩĩtwa mao maandĩkĩtwo, no matiathiĩte hema-inĩ ĩyo. Kwoguo makĩambĩrĩria gwĩka ta anabii kũu kambĩ-inĩ
Mwanake ũmwe agĩthiĩ ateng’erete akĩmenyithia Musa atĩrĩ: “Elidadi na Medadi mareka ta anabii kambĩ-inĩ!”
Nake Joshua mũrũ wa Nuni, ndungata ya Musa kuuma wĩthĩ-inĩ wake, akĩmwĩra ũũ: “Musa mwathi wakwa, makaanie!”
No we Musa akĩmũcokeria: “Kaĩ ũraigua ũiru handũ-inĩ hakwa? Aca tiga, na arĩ korũo andũ othe a Yahweh nĩ anabii na Yahweh amahe roho wake!”
Thutha-inĩ Musa agĩcoka kambĩ-inĩ marĩ hamwe na athuri acio a Isiraeli.
Naruo rũhuho ruumĩte kũrĩ Yahweh rũkĩhurutana na rũkĩambĩrĩria kũrehe tũmakia arũme kuuma iria-inĩ, rũgĩtũma tũgwe tũthiũrũrũkĩirie kambĩ itĩna rĩa rũgendo rwa mũthenya ũmwe mwena ũmwe na itĩna rĩa rũgendo rwa mũthenya ũmwe mwena ũrĩa ũngĩ, gũthiũrũrũkĩria kambĩ, na twarĩ mĩkono ĩĩrĩ kuuma thĩ
Kwoguo mũthenya ũcio wothe na ũtukũ wothe nginya mũthenya ũrĩa warũmĩrĩire, andũ maathiire o na mbere kũngania tũmakia arũme tũu. Gũtirĩ mũndũ wonganirie tũnyihĩire homeri ikũmi, na magĩthiĩ na mbere gũtwanĩka kũndũ guothe gũthiũrũrũka kambĩ nĩ ũndũ wao ene
No nyama irĩ o magego-inĩ mao, o na matatanukĩte, Yahweh agĩcinwo nĩ marakara kwerekera andũ acio, na Yahweh akĩambĩrĩria kũhũũra andũ acio ihũũra inene mũno rĩa kũmaniina.
Nĩ ũndũ ũcio magĩta handũ hau Kibirothu-hataava, nĩ gũkorũo nĩho maathikire andũ arĩa moonanirie merirĩria ma mwĩyendo
Andũ acio makiuma Kibirothu-hataava magĩthiĩ Hazerothu, na magĩikara kũu Hazerothu.