Ndari 14
Nakĩo kĩrĩndĩ gĩothe gĩkĩanĩrĩra na mũgambo mũnene, na andũ magĩthiĩ na mbere kũrĩra na gũcakaya ũtukũ ũcio wothe
Ciana cia Isiraeli ciothe igĩkĩambĩrĩria kũnugunĩra Musa na Haruni, na kĩrĩndĩ gĩothe gĩkĩaria kĩmokĩrĩire, gĩkiuga atĩrĩ; “Na arĩ korũo nĩ twakuĩrĩire bũrũri-inĩ wa Misiri, na arĩ korũo twakuĩra werũ-inĩ ũyũ
Nĩ kĩĩ gĩgũtũma Yahweh atũtware bũrũri-inĩ ũcio nĩguo tũũragwo na rũhiũ rwa njora? Atumia aitũ o hamwe na ciana citũ no gũtahwo megũtahwo. Githĩ ti kaba tũcoke Misiri?”
O na meeranaga atĩrĩ: “Nĩ tũthuurei mũtongoria na tũcoke Misiri!”
Nĩ ũndũ ũcio Musa na Haruni makĩĩgũithia magĩturumithia mothiũ mao thĩ marĩ mbere ya kĩũngano kĩu gĩothe kĩonganĩte gĩa ciana cia Isiraeli
Nao Joshua mũrũ wa Nuni na Kalebu mũrũ wa Jefune, arĩa maarĩ gatagatĩ-inĩ ka andũ arĩa maathiganĩte bũrũri ũcio, magĩtembũra nguo ciao,
na makĩĩra kĩrĩndĩ gĩothe gĩa ciana cia Isiraeli ũũ: “Bũrũri ũcio twatuĩkanirie tũkĩũthigana, nĩ bũrũri mwega mũno mũno
Angĩkorũo Yahweh nĩ akenetio nĩ ithuĩ, hatarĩ nganja nĩ egũtũtwara bũrũri-inĩ ũcio na aũheane kũrĩ ithuĩ, bũrũri ũiyũire iria na ũũkĩ
No mũtikaremere Yahweh, na mũtiagĩrĩirũo gwĩtigĩra andũ a bũrũri ũcio, nĩ gũkorũo tũkũmatambura biũ. Ũgitĩri wao nĩ mweherie kuuma harĩ o, na Yahweh arĩ hamwe na ithuĩ. Mũtikametigĩre.”
O na kũrĩ ũguo, kĩrĩndĩ gĩothe gĩkĩaria ũhoro wa kũmahũũra na mahiga. Naguo riri wa Yahweh ũkiumĩra igũrũ rĩa hema ya gũtũnganwo harĩ andũ othe a Isiraeli.
Nake Yahweh akĩra Musa atĩrĩ: “Andũ aya megũthiĩ na mbere kũnjagĩra gĩtĩo nginya rĩ, mekwaga wĩtĩkio harĩ niĩ nginya rĩ, o na thutha wa ciama iria ciothe ningĩte gatagatĩ-inĩ kao
Reke ndĩmarehere ihũũra rĩa mũrimũ mũũru na ndĩmaniine, njoke ngũtue rũrĩrĩ rũnene na rwĩ na hinya kũmakĩra.”
No Musa akĩra Yahweh atĩrĩ: “Nao Amisiri, o acio warutire andũ aya gatagatĩ-inĩ kao kũgerera hinya waku, mekũigua ũhoro ũcio,
na meere aikari a bũrũri ũcio ũhoro ũcio. Andũ acio o nao nĩ maiguĩte atĩ wee, Yahweh, ũrĩ gatagatĩ-inĩ ka andũ aya na wanamoimĩrĩra ũthiũ kwa ũthiũ. Wee nĩwe Yahweh, na itu rĩaku rĩrũgamaga igũrũ rĩao, na mũthenya ũthiaga ũrĩ mbere yao gĩtugĩ-inĩ kĩa itu naguo ũtukũ ũrĩ gĩtugĩ-inĩ kĩa mwaki
Ũngĩũraga andũ aya othe o rĩmwe, ndũrĩrĩ iria ciiguĩte ũhoro wa ngumo yaku cingiuga ũũ:
‘Yahweh aaremirũo nĩ gũtwara andũ acio bũrũri-inĩ ũrĩa eehĩtire atĩ nĩ akaamahe, nĩ ũndũ ũcio akĩmoragĩra werũ-inĩ.’
Rĩu Yahweh ndagũthaitha, reke hinya waku ũingĩhe, o ta ũrĩa weranĩire rĩrĩa woigire ũũ:
‘Yahweh ndahiũhaga kũrakara na nĩ aiyũirũo nĩ wendo mwĩhokeku, nĩ ohanagĩra mahĩtia o na mehia, no gũtirĩ hĩndĩ akaga kũherithia ũrĩa wĩhĩtie, aherithagia ariũ nĩ ũndũ wa mahĩtia ma maithe mao, nginya rũciaro rwa gatatũ o na rũciaro rwa kana.’
Ndagũthaitha wohere andũ aya mahĩtia mao nĩ ũndũ wa wendo waku mũnene na mwĩhokeku, o ta ũrĩa ũkoretwo ũkĩohera andũ aya kuuma Misiri nginya rĩu.”
Nake Yahweh akiuga ũũ: “Nĩ ndamohera o ta ũguo woiga
O na kũrĩ ũguo, o ta ũrĩa ndũũraga muoyo, thĩ yothe nĩ ĩkaaiyũrũo nĩ riri wa Yahweh
No rĩrĩ, gũtirĩ mũndũ o na ũmwe harĩ arĩa moonire riri wakwa na ciama ciakwa iria ndaaringire Misiri na werũ-inĩ na agathiĩ na mbere kũngeria maita maya ikũmi na akaga gũthikĩrĩria mũgambo wakwa,
ũkoona bũrũri ũcio nderĩire maithe mao. Gũtirĩ o na ũmwe wa arĩa manjagagĩra gĩtĩo ũkaawona
No tondũ Kalebu ndungata yakwa aarĩ na roho ngũrani nao na aaikarire anũmĩrĩire na ngoro yake yothe, hatarĩ nganja nĩ ngaamũkinyia bũrũri-inĩ ũcio aathiĩte, na rũciaro rwake nĩ rũkaawĩgwatĩra
Na tondũ Aamaleki na Akanaani maikaraga mũkuru-inĩ, rũciũ mwagĩrĩirũo gũcoka na thutha mũgerere werũ-inĩ njĩra-inĩ ya Iria Itune.”
Yahweh agĩcoka akĩra Musa na Haruni ũũ:
“Kĩrĩndĩ gĩkĩ kĩũru ũũ gĩgũthiĩ na mbere kũũnugunĩra nginya rĩ? Nĩ njiguĩte ũrĩa ciana cia Isiraeli iranugunĩra
Meerei atĩrĩ, Yahweh oigĩte ũũ, ‘“O ta ũrĩa ndũũraga muoyo, ngũmwĩka o ta ũguo njiguĩte mũkiuga
Ciimba cianyu ikaagwa werũ-inĩ ũyũ, ĩni, mũigana wanyu wothe wa arĩa marĩ na mĩaka 20 gũthiĩ na igũrũ arĩa maandĩkithirio, inyuothe arĩa mũũnugunĩire
Gũtirĩ mũndũ o na ũmwe wanyu ũkaaingĩra bũrũri-inĩ ũcio ndehĩtire atĩ nĩ mũgaatũũra kuo, o tiga Kalebu mũrũ wa Jefune na Joshua mũrũ wa Nuni.
“‘“Na rĩrĩ, ciana cianyu, icio muugĩte atĩ nĩ gũtahwo igaatahwo, nĩcio ngaatwara na nĩ ikaamenya bũrũri ũcio inyuĩ mũregete
No ciimba cianyu ikaagwa werũ-inĩ ũyũ
Na ariũ anyu megũtuĩka arĩithi werũ-inĩ mĩaka 40, na mekũrĩhĩra ciĩko cianyu cia kwaga wĩhokeku o nginya rĩrĩa kĩimba kĩa mũico harĩ inyuĩ gĩkaagwa werũ-inĩ
Kũringana na mũigana wa thikũ iria mwathiganire bũrũri ũcio, thikũ 40, o thikũ ĩkĩrũgamĩrĩra mwaka ũmwe, o thikũ mwaka ũmwe, mũkũrĩhĩra mehia macio manyu mĩaka 40, nĩguo mũmenye moimĩrĩro ma kũregana na niĩ.
“‘“Niĩ Yahweh, nĩ niĩ ndoiga ũguo. Ũguo nĩguo ngwĩka harĩ kĩrĩndĩ gĩkĩ kĩũru, kĩrĩa kĩũnganĩte hamwe nĩguo kĩĩnugunĩre: Werũ-inĩ ũyũ nĩkuo magaathirĩra, na gũkũ nĩkuo magaakuĩra
Arũme arĩa Musa aatũmire magathigane bũrũri ũcio o acio maatũmire kĩrĩndĩ gĩothe kĩĩnugunĩre rĩrĩa maacokire na riboti njũru ĩgiĩ bũrũri ũcio,
ti itherũ, arũme acio othe maarehire riboti njũru ĩgiĩ bũrũri ũcio nĩ kũũragwo makooragwo mbere ya Yahweh
No Joshua mũrũ wa Nuni na Kalebu mũrũ wa Jefune, arĩa maarĩ gatagatĩ-inĩ ka acio maathiĩte gũthigana bũrũri ũcio, nĩ megũthiĩ na mbere gũtũũra muoyo.”’”
Rĩrĩa Musa eerire ciana cia Isiraeli ciothe ũhoro ũcio, andũ acio makĩambĩrĩria gũcakaya mũno
Ningĩ magĩũkĩra rũcinĩ tene na makĩgeria kwambata kĩrĩma igũrũ, makiugaga ũũ: “Nĩ twĩhaarĩirie kwambata tũthiĩ kũu Yahweh arĩtie ũhoro wakuo, nĩ gũkorũo nĩ twĩhĩtie.”
No Musa akĩmeera atĩrĩ: “Nĩ kĩĩ kĩratũma mwagarare watho wa Yahweh? Ũndũ ũcio ndũkũgaacĩra
Mũtikambate, nĩ gũkorũo Yahweh ndarĩ hamwe na inyuĩ; na nĩ mũgũtoorio nĩ thũ cianyu
Tondũ Aamaleki na Akanaani marĩ kũu na nĩ mekũng’ethanĩra na inyuĩ, na nĩ mũkũũragwo na rũhiũ rwa njora. Tondũ nĩ mũtigĩte kũrũmĩrĩra Yahweh, Yahweh ndegũkorũo hamwe na inyuĩ.”
No nĩ ũndũ wa mwĩĩkĩrĩro makĩambata merekeire igũrũ rĩa kĩrĩma, no ithandũkũ rĩa kĩrĩkanĩro kĩa Yahweh rĩtioimire gatagatĩ wa kambĩ o na Musa ndoimire ho
Nao Aamaleki na Akanaani arĩa maaikaraga kĩrĩma-inĩ kĩu magĩikũrũka makĩmatharĩkĩra, magĩtũma mahurunjũke o nginya Horoma.