Ndari 15

Yahweh agĩthiĩ na mbere kwaria na Musa, akĩmwĩra ũũ:

“Aria na ciana cia Isiraeli ũciĩre atĩrĩ, ‘Rĩrĩa mũkaaingĩra bũrũri-inĩ ũrĩa ndĩramũhe mũikarage

na mũrutĩre Yahweh igongona rĩa gũcinwo na mwaki kuuma harĩ rũũru rwa ng’ombe kana rũũru rwa mbũri kana ng’ondu—rĩrĩ igongona rĩa njino kana igongona rĩa kũhingia mwĩhĩtwa wa mwanya kana igongona rĩa kwĩyendera kana igongona rĩa ciathĩ cianyu iria ituĩtwo, nĩgetha rĩkorũo rĩrĩ mũtararĩko mwega harĩ Yahweh

ũrĩa ũrarehe igongona rĩu no mũhaka ningĩ arehere Yahweh igongona rĩa mũtu mũhinyu, gĩcunjĩ kĩmwe harĩ ikũmi kĩa eba, ũtukanĩtio na gĩcunjĩ kĩmwe harĩ inya kĩa hini kĩa maguta

Ningĩ wagĩrĩirũo kũrehe ndibei gĩcunjĩ kĩmwe harĩ inya kĩa hini ĩtuĩke igongona rĩa ndibei, hamwe na igongona rĩa njino kana nĩ ũndũ wa o gatũrũme ka igongona

Kana angĩkorũo nĩ ndũrũme, wagĩrĩirũo kũrehe igongona rĩa mũtu icunjĩ igĩrĩ harĩ ikũmi cia gĩthimi kĩa eba cia mũtu mũhinyu ũtukanĩtio na gĩcunjĩ gĩa ithatũ harĩ ikũmi kĩa hini kĩa maguta

Ningĩ wagĩrĩirũo kũrehe ndibei gĩcunjĩ gĩa ithatũ harĩ ikũmi kĩa hini, ĩtuĩke igongona rĩa ndibei, rĩa mũtararĩko mwega harĩ Yahweh.

“‘Ĩndĩ ũngĩrehe ndegwa kuuma rũũru-inĩ ĩrĩ igongona rĩa njino kana igongona rĩa kũhingia mwĩhĩtwa wa mwanya kana magongona ma ũiguano harĩ Yahweh-rĩ,

wagĩrĩirũo kũrehe ndegwa ĩyo ya kuuma rũũru-inĩ hamwe na igongona rĩa mũtu icunjĩ ithatũ harĩ ikũmi cia gĩthimi kĩa eba ũtukanĩtio na nuthu ya hini ya maguta

Ningĩ wagĩrĩirũo kũrehe ndibei nuthu ya hini ĩtuĩke igongona rĩa ndibei, rĩrĩ igongona rĩa gũcinwo na mwaki, rĩa mũtararĩko mwega harĩ Yahweh

Ũguo nĩguo kwagĩrĩire gwĩkwo harĩ o ndegwa kana harĩ o ndũrũme kana harĩ o gatũrũme kana harĩ o mbũri

O mũigana ũrĩa wothe ũngĩruta, ũguo nĩguo wagĩrĩirũo gwĩka harĩ o ĩmwe yacio, kũringana na mũigana wacio

Ũguo nĩguo Mũisiraeli o wothe ũciarĩirũo bũrũri-inĩ wao agĩrĩirũo kũrehe igongona rĩa gũcinwo na mwaki, rĩa mũtararĩko mwega harĩ Yahweh.

“‘Mũndũ wa kũngĩ ũrĩa ũtũũranagia na inyuĩ kana mũndũ ũrĩa ũtũũrĩte gatagatĩ-inĩ kanyu njiarũa-inĩ cianyu nyingĩ, o nake angĩkorũo akĩrehe igongona rĩa gũcinwo na mwaki rĩa mũtararĩko mwega harĩ Yahweh, agĩrĩirũo gwĩka o ta ũrĩa mwĩkaga

Inyuĩ a kĩũngano, o hamwe na mũndũ wa kũngĩ ũrĩa ũtũũranagia na inyuĩ, mũrĩkoragwo na watho ũmwe. Ũrĩkoragwo ũrĩ watho wa gũtũũra ũrũmagĩrĩrũo njiarũa-inĩ cianyu ciothe. Mũndũ wa kũngĩ arĩkoragwo atariĩ o ta inyuĩ mbere ya Yahweh

Kũrĩkoragwo na watho ũmwe na ituĩro rĩmwe rĩa ciira harĩ inyuĩ na harĩ mũndũ wa kũngĩ ũrĩa ũtũũranagia na inyuĩ.’”

Yahweh agĩthiĩ na mbere kwĩra Musa ũũ:

“Aria na ciana cia Isiraeli ũciĩre atĩrĩ, ‘Rĩrĩa mũgaakinya bũrũri ũrĩa ndĩramũtwara 19 na mũrĩe mũgate o wothe wa bũrũri ũcio, nĩ mwagĩrĩirũo kũrutĩra Yahweh mũhothi

na mũrĩe mũgate o wothe wa bũrũri ũcio, nĩ mwagĩrĩirũo kũrutĩra Yahweh mũhothi

Mwagĩrĩirũo kũruta mũhothi wa maciaro ma mbere ma mũtu wanyu ũtarĩ mũkonyore ũrĩ mĩgate . O ta ũrĩa mũrutaga mũhothi wa kĩhuuhĩro-inĩ noguo mwagĩrĩirũo kũruta mũhothi ũcio

Mwagĩrĩirũo kũrehaga mũtu ũtarĩ mũkonyore wa maciaro mamwe manyu ma mbere ũrĩ mũhothi harĩ Yahweh njiarũa-inĩ cianyu ciothe.

“‘Na rĩrĩ, mũngĩka ihĩtia rĩa kwaga kũrũmĩrĩra maathani macio mothe Yahweh erĩte Musa,

marĩa mothe Yahweh amwathĩte kũgerera Musa kuuma mũthenya ũrĩa Yahweh aathanire na gũthiĩ na mbere njiarũa-inĩ cianyu,

na angĩkorũo ũndũ ũcio wĩkĩtwo na mahĩtia kĩrĩndĩ gĩtekũmenya, kĩrĩndĩ kĩu gĩothe no mũhaka kĩrehe gategwa karĩ igongona rĩa njino rĩa mũtararĩko mwega harĩ Yahweh, hamwe na igongona rĩako rĩa mũtu na igongona rĩako rĩa ndibei kũringana na mũtaratara ũrĩa ũrũmagĩrĩrũo, o hamwe na kabũri ka igongona rĩa mehia

Mũthĩnjĩri-Yahweh agĩrĩirũo kũruta igongona rĩa kũhumbĩra mehia nĩ ũndũ wa kĩrĩndĩ kĩu gĩothe gĩa ciana cia Isiraeli, na nĩ kĩrĩohagĩrũo, nĩ gũkorũo gĩkĩte ũndũ ũcio gĩtekũmenya, na nĩ kĩrehete igongona rĩa gũcinwo na mwaki rĩrĩ igongona rĩakĩo harĩ Yahweh na igongona rĩakĩo rĩa mehia mbere ya Yahweh nĩ ũndũ wa ihĩtia rĩu rĩakĩo

Kĩrĩndĩ kĩu gĩothe gĩa ciana cia Isiraeli nĩ kĩrĩohagĩrũo o hamwe na mũndũ wa kũngĩ ũrĩa ũtũũranagia nakĩo, tondũ nĩ andũ othe mekĩte ũguo matekũmenya.

“‘Mũndũ o wothe angĩhia atekũmenya, no mũhaka arehe harika ĩrĩ mwaka-inĩ wayo wa mbere ĩrĩ igongona rĩa mehia

Nake mũthĩnjĩri-Yahweh akaruta igongona rĩa kũhumbĩra mehia mbere ya Yahweh nĩ ũndũ wa mũndũ ũcio wĩhĩtie atekũmenya, nĩgetha ahumbĩre mehia macio, nake akoherũo

Harĩ Mũisiraeli ũrĩa ũciarĩirũo bũrũri-inĩ wao o hamwe na mũndũ wa kũngĩ ũrĩa ũtũũrĩte gatagatĩ-inĩ kao, kwagĩrĩire gũkorũo na watho ũmwe harĩ inyuĩ ũhoro-inĩ wĩgiĩ mũndũ kwĩhia atekũmenya.

“‘No mũndũ ũrĩa ũrĩĩhagia akĩmenyaga-rĩ, kana nĩ mũndũ ũciarĩirũo bũrũri-inĩ wanyu kana nĩ mũndũ wa kũngĩ, nĩ kũnyũrũria arĩkoragwo akĩnyũrũria Yahweh na no mũhaka eherio gatagatĩ-inĩ ka andũ ao

Nĩ gũkorũo nĩ anyararĩte uuge wa Yahweh na akoina rĩathani rĩake, hatarĩ nganja mũndũ ũcio agĩrĩire kweherio. Nĩ arĩcokagĩrĩrũo nĩ mahĩtia macio make.’”

Na hĩndĩ ĩyo ciana cia Isiraeli ciarĩ werũ-inĩ, ikĩona mũndũ ũmwe akiuna ngũ mũthenya wa Thabatũ

Arĩa maamũkorire akiuna ngũ makĩmũtwara kũrĩ Musa na Haruni na kĩrĩndĩ gĩothe

Makĩmũhingĩra tondũ gũtiamenyekete wega ũrĩa aagĩrĩire gwĩkwo.

Nake Yahweh akĩra Musa ũũ: “Mũndũ ũcio no mũhaka oragwo, kĩrĩndĩ gĩothe kĩagĩrĩirũo kũmũhũũra na mahiga nja ya kambĩ.”

Nĩ ũndũ ũcio kĩrĩndĩ gĩothe gĩkĩmuumia nja ya kambĩ na gĩkĩmũhũũra na mahiga, o ta ũrĩa Yahweh aathire Musa.

Yahweh agĩthiĩ na mbere kwĩra Musa ũũ:

“Aria na ciana cia Isiraeli ũciĩre atĩ ciagĩrĩirũo gũthondeka tũkundo icũrĩ-inĩ cia nguo ciao njiarũa-inĩ ciao ciothe, na mekĩre rũrigi rwa mburuu igũrũ wa tũkundo tũu tũrĩ gĩcũrĩ-inĩ kĩa nguo

‘No mũhaka mũgakoragwo na tũkundo tũu icũrĩ-inĩ nĩgetha mũgatuonaga na mũkaririkanaga maathani mothe ma Yahweh na mũkamarũmagĩrĩra. Mũtiagĩrĩirũo kũrũmagĩrĩra ngoro cianyu o na maitho manyu, iria iramũtongoria harĩ ũmaraya

Ũndũ ũcio nĩ ũrĩmũteithagia kũririkana, na mũkarũmagia maathani makwa mothe na mũgakorũo mũrĩ amũre harĩ Kĩhoti wanyu

Niĩ nĩ niĩ Yahweh Kĩhoti wanyu, ũrĩa wamũrutire bũrũri wa Misiri nĩguo ndĩmenyithanie atĩ nĩ niĩ Kĩhoti wanyu. Niĩ nĩ niĩ Yahweh Kĩhoti wanyu.’”